వెనక్కు తగ్గిన వాట్సాప్

12-01-202112-01-2021 11:24:05 IST
2021-01-12T05:54:05.154Z12-01-2021 2021-01-12T05:53:46.409Z - - 17-01-2021

సోషల్ మీడియా దిగ్గజం వాట్సాప్ ఇటీవల తమ ప్రైవసీ నిబంధనలలో మార్పులను తీసుకుని వచ్చింది. ఈ ప్రైవసీ నిబంధనల కారణంగా ఎంతో డేటా వాట్సాప్ చేతిలోకి వెళ్లిపోయే ప్రమాదం ఉందని పలువురు ఆరోపించారు. ఎంతో మంది ఇక వాట్సాప్ కు ప్రత్యమ్నాయం వెతుక్కోవలసిన సమయం వచ్చిందంటూ చెప్పుకొచ్చారు. ఇక అంతే తమ గురించి ప్రపంచ వ్యాప్తంగా విమర్శలు వస్తూ ఉన్నాయని భావించగా.. ఆ విషయంలో ప్రజలకు క్లారిటీ ఫేస్ బుక్ సంస్థ భావించింది. ఫేస్ బుక్ అధీనంలో ఉన్న వాట్సాప్, ఈ మేరకు  అన్ని ప్రైవేటు మెసేజ్ లూ 100 శాతం సురక్షితంగా ఉంటాయని, ఈ విషయంలో వస్తున్న ఊహాగానాలను నమ్మవద్దని ట్వీట్ చేసింది. బిజినెస్ ఖాతాలకు సంబంధించిన సమాచారంపైనే పాలసీ నిబంధనల ప్రభావం ఉంటుందని క్లారిటీ ఇచ్చింది. బంధుమిత్రులు, స్నేహితులకు పంపే సమాచారం పూర్తి రహస్యమని చెప్పుకొచ్చింది. 

వాట్సాప్ ద్వారా పంపే సమాచారాన్ని ఫేస్ బుక్ తో కూడా పంచుకోబోమని.. ఎవరి ప్రైవేటు మెసేజ్ లను తాము చూడబోమని, కాల్స్ ను కూడా వినబోమని స్పష్టం చేసింది వాట్సాప్. కేవలం కాల్ లాగ్స్ ను మాత్రం దాచి వుంచుతామని తెలిపింది. ఇక తమ మాధ్యమం ద్వారా లోకేషన్ షేర్ చేసినా, ఆ వివరాలను చూడబోమని స్పష్టం చేసింది. ఫేస్ బుక్ కు ఇవ్వబోమని, కాంటాక్టుల వివరాలను కూడా ఎవరితోనూ పంచుకోబోమని తెలిపింది. ఫేస్ బుక్ యాజమాన్యం కింద ఉన్నప్పటికీ వాట్సాప్ గ్రూప్ ప్రైవేటు సంస్థగానే వ్యవహరిస్తుందని తెలిపింది. యూజర్లు అవసరమనుకుంటే, తమ మెసేజ్ లను నియమిత సమయం తరువాత డిలీట్ చేసే ఆప్షన్ పెట్టుకోవచ్చని సూచించింది. ఎప్పుడు కావాలంటే అప్పుడు డేటాను తిరిగి డౌన్ లోడ్ చేసుకునే సదుపాయాన్ని కల్పిస్తామని అంటోంది. తమ ప్రైవసీ నిబంధనలలో చేసిన మార్పులతో ఇన్ని విమర్శలు వస్తాయని వాట్సాప్ సంస్థ కూడా అనుకుని ఉండదు. ఎలాగైనా తిరిగి ప్రజల నమ్మకాన్ని సొంతం చేసుకోవాలని ఫేస్ బుక్ సంస్థ భావిస్తోంది. దీనిపై యూజర్లు ఏమంటారో చూడాలి.