ఓటమిపై స్పందించిన కోహ్లీ.. కొంపముంచింది అవే అంటూ..!

28-11-202028-11-2020 12:09:11 IST
Updated On 28-11-2020 12:28:32 ISTUpdated On 28-11-20202020-11-28T06:39:11.063Z28-11-2020 2020-11-28T06:39:03.985Z - 2020-11-28T06:58:32.348Z - 28-11-2020

ఆస్ట్రేలియా టూర్ ను భారత్ పరాజయంతో మొదలుపెట్టింది. ఆస్ట్రేలియా నిర్ధేశించిన 375 పరుగుల లక్ష్యాన్ని ఛేదించే క్రమంలో భారత్ 50 ఓవర్లలో 8 వికెట్లకు 308 పరుగులు మాత్రమే చేసింది. టీమిండియా ఇన్నింగ్స్ లో ఆల్ రౌండర్ హార్దిక్ పాండ్య 90 పరుగులతో టాప్ స్కోరర్ గా నిలిచాడు. 76 బంతులాడిన పాండ్య 7 ఫోర్లు, 4 సిక్సులతో అలరించాడు. ధావన్ (74) పరుగులతో రాణించాడు. ఆసీస్ పేసర్ జోష్ హేజెల్ వుడ్ టీమిండియా టాపార్డర్ ను దెబ్బతీశాడు.

హేజెల్ వుడ్ ధాటికి మయాంక్ అగర్వాల్ (22), కెప్టెన్ విరాట్ కోహ్లీ (21), శ్రేయాస్ అయ్యర్ (2) పెవిలియన్ చేరారు. కేఎల్ రాహుల్ 12 పరుగులు చేసి నిరాశపరిచాడు. ఈ మ్యాచ్ లో టాస్ గెలిచిన ఆస్ట్రేలియా మొదట బ్యాటింగ్ చేసి 50 ఓవర్లలో 6 వికెట్లకు 374 పరుగులు చేసింది. కెప్టెన్ ఆరోన్ ఫించ్ (114),  స్టీవ్ స్మిత్ (105) సెంచరీలతో ఆకట్టుకున్నారు. 66 బంతుల్లో 11 ఫోర్లు, 4 సిక్సులు బాదిన స్మిత్ కు మ్యాన్ ఆఫ్ ద మ్యాచ్ అవార్డు లభించింది. భారత జట్టు ఓటమికి ముఖ్యంగా ఫీల్డింగ్ లో పొరపాట్లు, టాప్ ఆర్డర్ లో చెత్త షాట్లు ఆడడమని స్పష్టంగా తెలుస్తోంది. 

పరాజయం అనంతరం భారత జట్టు కెప్టెన్‌ విరాట్‌ కోహ్లి తీవ్ర అసంతృప్తి వ్యక్తం చేశాడు. మొదటి వన్డేలో పలు క్యాచ్‌లను వదిలేయడమే తమ పరాజయానికి కారణమన్నాడు. ఆసీస్‌ వంటి పటిష్టమైన జట్టుపై క్యాచ్‌లు వదిలేస్తే ఫలితం ఇలానే ఉంటుందని అసహనం వ్యక్తం చేశాడు. మేము దారుణంగా ఫీల్డింగ్‌ చేశాం. ఏదో అలసిపోయినట్లు ఫీల్డింగ్‌ తప్పిదాలు చేశామన్నాడు. 25 ఓవర్ల తర్వాత మా ఫీల్డింగ్‌ చాలా నిరాశపరిచింది.  ఒక నాణ్యమైన జట్టుతో ఆడేటప్పుడు ఫీల్డింగ్‌ అనేది చాలా ముఖ్యం. ఫీల్దింగ్‌ సరిగా చేయకపోతే ఒక మంచి జట్టు చేతిలో ఇలాంటి పరాభవమే ఎదురవుతుందని అన్నాడు. హార్దిక్‌ పాండ్యా జట్టులో ఉన్నప్పటికీ బౌలింగ్‌ చేయడానికి ఇంకా ఫిట్‌గా లేడని.. ఆరవ బౌలర్ కు సంబంధించిన లోటు గురించి చెప్పుకొచ్చాడు కోహ్లీ. రెండో వన్డే ఆదివారం నాడు జరుగుతుంది. మూడు వన్డేల సిరీస్ లో భారత్ ఇప్పటికే 0-1 తో వెనుకబడి ఉంది. వన్డే సిరీస్ లో నిలిచి ఉండాలంటే ఆదివారం మ్యాచ్ లో భారతజట్టు గెలిచితీరాలి.