అశ్విన్‌పై వ్యాఖ్యలతో సిగ్గుపడుతున్నా.. అసీస్ కెప్టెన్ పశ్చాత్తాపం

13-01-202113-01-2021 15:49:56 IST
2021-01-13T10:19:56.547Z13-01-2021 2021-01-13T10:19:47.564Z - - 17-01-2021

సిడ్నీ టెస్టులో టీమిండియాతో జరిగిన చివరి రోజు ఆటలో టీమిండియా స్నిన్నర్ రవిచంద్రన్ అశ్విన్‌పై తాను చేసిన వ్యాఖ్యలకు నిజంగానే సిగ్గుపడు తున్నానని ఆసీస్ క్రికెట్ జట్టు కెప్టెన్ టిమ్ పైన్‌ విచారం వ్యక్తపరిచాడు.  ఆసీస్‌ కెప్టెన్‌ టిమ్‌ పైన్‌ భారత్‌ బౌలర్‌ అశ్విన్‌పై చేసిన వ్యాఖ్యలపై క్రికెట్‌లో అన్నివైపుల నుంచి తీవ్ర విమర్శలు వ్యక్తమైన నేపథ్యంలో తన ప్రవర్తన పట్ల టిమ్ పైన్ క్షమాపణ చెప్పుకున్నాడు. భారత స్పిన్నర్‌ అశ్విన్‌పై తాను చేసిన వ్యాఖ్యల పట్ల సిగ్గుపడుతున్నట్లు పేర్కొన్నాడు.

మైదానంలో స్టంప్‌మైక్‌ ఉంటుందన్న విషయం తెలిసి కూడా దురదృష్టవశాత్తూ నా మాటలతో తప్పుడు సంకేతాలిచ్చాను. అది తెలిసి చాలా బాధపడ్డాను. ఆటలో జాగ్రత్తగా ఉండాలని నిన్న జరిగిన చర్యతో తెలుసుకున్నాడు. భవిష్యత్తులో ఇలా జరగకుండా మంచి పేరు తెచ్చుకోడానికి ప్రయత్నిస్తాను.. అశ్విన్‌తో అలా ప్రవర్తించి ఉండకూడదు.. నా చర్యకు సిగ్గుపడుతున్నానని పైన్ పశ్చాత్తాపం వ్యక్తం చేశాడు.

సిడ్నీ టెస్టు ముగిసిన వెంటనే రవిచంద్రన్ అశ్విన్‌తో తాను మాట్లాడానని, జరిగింది మర్చిపోయి ఇద్దరమూ హాయిగా నవ్వుకున్నామని పైన్ చెప్పాడు. నీతో గొడవ పెట్టుకుని మూర్ఖుడిలా వ్యవహరించాను అని అశ్విన్‌తో చెప్పానన్నాడు. టీమ్‌ను నేను నడిపిన తీరు ఎలా ఉన్నా సరే..మూడోటెస్టు చివరి రోజు నా ప్రవర్తనను నిజంగానే సమర్థించుకోలేనని పైన్ చెప్పాడు.

నా నాయకత్వ పటిమ సరిపోలేదు. మూడో టెస్టులో ఆట కలిగించిన ఒత్తిడి నాపై ప్రభావం చూపింది. నా మూడ్‌నే అది ప్రభావం కలిగించింది. అది నా ఆటతీరును దెబ్బతీసింది. నాయకుడిగా పేలవమైన ఆట ప్రదర్సించానని టీమ్ ప్లెయర్లతో కూడా చెప్పాను. నా టీమ్‌ను నేను సిగ్గుపడేలా చేశాను అని పైన్ చెప్పాడు.

సిడ్నీ వేదికగా జరిగిన ఈ మ్యాచ్‌లో భారత్ ఓటమి నుంచి గట్టెక్కిన విషయం తెలిసిందే. హనుమ విహారి, రవిచంద్రన్ అశ్విన్ నిలకడైన బ్యాటింగ్‌తో మ్యాచ్ ఫలితం తేలకుండా ముగిసింది. అయితే ఈ ఇద్దరి బ్యాటింగ్‌కు విసిగిపోయిన పైన్.. స్లెడ్జింగ్‌కు పాల్పడ్డాడు. 

కాగా ఆటలో భాగంగా మూడోరోజు కూడా పైన్‌ పుజారా ఔట్‌ విషయంలోనూ ఫీల్డ్‌ అంపైర్‌ విల్సన్‌పై మండిపడిన విషయం తెలిసిందే. అంపైర్‌పై ఆగ్రహం వ్యక్తం చేసినందుకు పైన్‌పై ఐసీసీ నిబంధన 2.8 ప్రకారం మ్యాచ్ ఫీజులో 15 శాతం జరిమానా విధించడంతో పాటు ఒక డీ మెరిట్ పాయింట్ కేటాయించారు.