బ్రిస్బేన్‌లో టెస్టు ఆడతాం కానీ.. బీసీసీఐ మెలిక

10-01-202110-01-2021 16:55:54 IST
2021-01-10T11:25:54.295Z10-01-2021 2021-01-10T11:25:52.333Z - - 21-01-2021

భారత్, ఆస్ట్రేలియా మధ్య నాలుగో టెస్టు వేదిక విషయంలో గత మూడు రోజులుగా సాగుతూ వచ్చిన సందిగ్ధత వీడింది. బ్రిస్బేన్‌లో ఈ మ్యాచ్‌ ఆడేందుకు తమకు ఎలాంటి అభ్యంతరం లేదని క్రికెట్‌ ఆస్ట్రేలియా (సీఏ)కు బీసీసీఐ సమాచారం అందించింది. అయితే మ్యాచ్‌ ముగిశాక ఒక్క రోజు కూడా తాము అక్కడ ఉండబోమని, వెంటనే భారత్‌కు వెళ్లిపోయే ఏర్పాట్లు చేయాలని కోరింది.

చివరి టెస్టు ముగిసిన వెంటనే భారత్‌కు తిరిగి వెళ్లే ఏర్పాట్లు చేయమని వారిని కోరాం. అందుబాటులో ఉన్న మొదటి ఫ్లయిట్‌లోనే పంపిస్తే మంచిది. వీలుంటే మ్యాచ్‌ ముగిసిన రాత్రి కూడా అక్కడ ఆగకుండా బయల్దేరాలని భావిస్తున్నాం అని బీసీసీఐ అధికారి ఒకరు వెల్లడించారు.

మరోవైపు స్వదేశంలో ఇంగ్లండ్‌తో జరిగే సిరీస్‌లో ప్రేక్షకులను అనుమతించడం లేదని భారతక్రికెట్ బోర్డు స్పష్టం చేసింది. కఠిన బయో బబుల్‌ వాతావరణంలో క్రికెటర్లు ఉండబోతున్నారని, ఇలాంటి స్థితిలో తాము రిస్క్‌ తీసుకోలేం కాబట్టి అభిమానులను ఒక్క మ్యాచ్‌కూ అనుమతించమని వెల్లడించింది.

కరోనా లాక్ డౌన్ నేపధ్యంలో బ్రిస్బేన్‌లో నాలుగో టెస్టు ముగిసిన వెంటనే అఘమేఘాలమీద బారత జట్టును స్వదేశం పంపే ఏర్పాటుకు హామీ ఇవ్వాలని బీసీసీఐ క్రికెట్ ఆస్ట్రేలియాను కోరింది. ఆట ముగిసిన మరుక్షణమే భారత ఆటగాళ్లు స్వదేశానికి బయలు దేరుతారు. వీలయితే రాత్రిపూట కూడా అక్కడ ఉండకుండా మావాళ్లు బయలుదేరతారు అని బీసీసీఐ స్పష్టం చేసింది.

బ్రిస్బేన్‌లో నాలుగో టెస్టు ఆడటానికి కానీ, అక్కడ కరోనా నేపథ్యంలో ఆరోగ్యపరమైన ప్రోటోకాల్ పాటించడాన్ని కానీ మేము ఎన్నడూ అభ్యంతరపెట్టలేదు. నాలుగో టెస్టు కచ్చితంగా జరుగుతుంది క్రికెట్ ఆస్ట్రేలియా స్థానిక ప్రభుత్వంతో విధివిధానాల గురించి చర్చిస్తోంది. క్వీన్స్‌లాండ్‌లో మూడురోజుల పాటు లాక్ డౌన్ విధించిన నేపథ్యంలో ఆట సాధ్యాసాధ్యాల గురించి వారే ఒక నిర్ణయం తీసుకుంటారని బీసీసీఐ అభిప్రాయం వ్యక్తం చేసింది.