భారత్ నుంచి వారంరోజుల్లో 30 దేశాలకు కరోనా టీకాలు.. డబ్ల్యుహెచ్ఓ

23-02-202123-02-2021 09:57:37 IST
2021-02-23T04:27:37.056Z23-02-2021 2021-02-23T04:27:34.793Z - - 04-03-2021

ప్రపంచానికి అవసరమైన రకరకాల టీకాల తయారీ, నిల్వ, నిర్వహణ అంశాల్లో భారతీయ కంపెనీలు ఎంతో కృషి చేశాయని ప్రపంచ ఆరోగ్య సంస్థ ప్రధాన శాస్త్రవేత్త డాక్టర్‌ సౌమ్యా స్వామినాథన్‌ కొనియాడారు.  ప్రపంచంలో ప్రతి ఒక్కరికీ కోవిడ్-19 నిరోధక టీకాలను అందజేయడానికి ప్రపంచ ఆరోగ్య సంస్థ ఆధ్వర్యంలో ఏర్పాటు చేసిన కోవాక్స్ వ్యవస్థ ద్వారా అన్ని దేశాలకు కరోనా టీకా సరఫరా చేబడుతున్నట్లు పేర్కొన్నారు.

కోవాక్స్‌తో సమన్వయ కృషి ఫలించిన కారణంగానే వారం రోజుల్లో 25 నుంచి 30 దేశాలకు కోవిడ్-19 వ్యాక్సిన్లు ఎగుమతి అవుతాయని డాక్టర్ సౌమ్యా విశ్వనాధన్ పేర్కొన్నారు. బయో ఆసియా–2021 సదస్సులో భాగంగా సోమవారం ‘ప్రపంచానికి టీకా వేయించడం.. భారత్‌ ప్రస్తుత స్థితి, భవిష్యత్‌ సమర్థత’ అంశంపై చర్చా కార్యక్రమంలో సౌమ్య పాల్గొన్నారు.

కోవాక్స్‌ కార్యక్రమం ప్రపంచ వ్యాప్తంగా విజయవంతం అయ్యేందుకు పెద్ద ఎత్తున ఆర్థిక వనరుల అవసరం ఉందని, 2021లోనే సుమారు 300 కోట్ల డాలర్ల నిధులు అవసరమని సౌమ్యా స్వామినాథన్‌ తెలిపారు. రానున్న కాలంలో పెద్ద ఎత్తున టీకా తయారీకి ప్రత్యేక కేంద్రాలు అవసరమవుతాయని, కోవాక్స్‌లో భాగమైన 199 దేశాలు కూడా తమవంతు పాత్ర పోషిస్తేనే తారతమ్యాలు, వివక్ష వంటివి లేకుండా అందరినీ టీకా ద్వారా కోవిడ్‌ నుంచి రక్షణ కల్పించొచ్చని డాక్టర్ సౌమ్యా విశ్వనాథన్ పేర్కొన్నారు. 

కోవాక్స్‌ ప్రయత్నాల ఫలితంగా ఇంకో వారంలోనే భారత్‌లోని సీరమ్‌ ఇన్‌స్టిట్యూట్‌ ఆఫ్‌ ఇండియా నుంచి పెద్ద ఎత్తున టీకాలు 25–30 దేశాలకు ఎగుమతి అవుతాయని తెలిపారు. రకరకాల టీకాల తయారీ, నిల్వ, నిర్వహణ అంశాల్లో భారతీయ కంపెనీలు ఎంతో కృషి చేశాయని చెప్పారు. రూపాంతరిత వైరస్‌లపై ఆందోళన చెందాల్సిన అవసరం లేదని, వాటిని సకాలంలో గుర్తించి జన్యుక్రమాలను నమోదు చేయడం ద్వారా నియంత్రించొచ్చని వివరించారు.

చిట్టచివరి వ్యక్తి కూడా టీకా వేయించుకోవాలసిందే.. యూనిసెఫ్

కోవిడ్-19 నిరోధక టీకా వేయించుకోనంతవరకు  ఈ ప్రపంచంలో ఎవరూ తాము సురక్షితంగా ఉన్నామని భావించడానికి వీల్లేదని యూనిసెప్ ప్రదాన సలహాదారు రాబిన్ నంది పేర్కొన్నారు. 2021 నాటికి కనీసం 200 కోట్ల కోవిడ్‌–19 వ్యాక్సిన్లను పంపిణీ చేయాలన్నది యునిసెఫ్‌ లక్ష్యమని వివరించారు. గతంలో కొత్త టీకాలు పేద దేశాలకు చేరేందుకు చాలా ఏళ్లు పట్టేదని, అలాంటి పరిస్థితి పునరావృతం కాకుండా చూసేందుకు కోవాక్స్‌ వ్యవస్థ ఎంతగానో ఉపయోపడుతుందని చెప్పారు. 

కోవాగ్జిన్‌ సామర్థ్యానికి సంబంధించిన వివరాలను సకాలంలో అందివ్వలేకపోయామని భారత్‌ బయోటెక్‌ చైర్మన్‌ అండ్‌ ఎండీ కృష్ణ ఎల్లా పేర్కొన్నారు. ముక్కు ద్వారా పిచికారీ చేసే టీకా తొలి దశ ప్రయోగాలు ఈ వారం మొదలు అవుతాయని చెప్పారు. కోవాక్స్‌లో భాగస్వాములయ్యేందుకు తాము సిద్ధంగా ఉన్నామని తెలిపారు. ఏటా 4 కోట్ల టీకాలు తయారు చేసే సామర్థ్యం తమ వద్ద ఉందన్నారు.

కరోనా కేసుల అప్డేట్.. గత 24 గంటల్లో 14,199 మందికి కరోనా