వరవరరావుకు ఎట్టకేలకు బెయిల్

22-02-202122-02-2021 12:13:53 IST
Updated On 22-02-2021 12:37:42 ISTUpdated On 22-02-20212021-02-22T06:43:53.480Z22-02-2021 2021-02-22T06:43:48.674Z - 2021-02-22T07:07:42.950Z - 22-02-2021

గోరేగావ్ కుట్ర కేసులో అరెస్ట్ అయి, దాదాపు ఏడాది పాటు జైలు జీవితాన్ని గడిపిన విప్లవ నేత వరవరరావుకు బాంబే హైకోర్టు బెయిల్ ను మంజూరు చేసింది. ఆయన అనారోగ్యాన్ని దృష్టిలో ఉంచుకుని షరతులతో కూడిన బెయిల్ ను మంజూరు చేస్తున్నట్టు ఈ సందర్భంగా న్యాయమూర్తి వ్యాఖ్యానించారు. తనపై ఆరోపణలు ఉన్న కేసు విచారణకు సంబంధించి, పోలీసులకు సహకరించాలని, సాక్ష్యాల తారుమారుకు ప్రయత్నిస్తే, బెయిల్ ను రద్దు చేస్తామని ఈ సందర్భంగా న్యాయమూర్తి వరవరరావును హెచ్చరించారు. నేటి సాయంత్రం లోగా బెయిల్ పేపర్లను జైలు అధికారులకు అందించి, విడుదలయ్యేలా చూస్తామని ఆయన తరఫు న్యాయవాదులు వెల్లడించారు.

బాంబే హైకోర్టు ప్రత్యేక షరతులతో ఆరునెలల మెడికల్ బెయిల్ మంజూరు చేసింది. స్పెషల్ ఎన్ఐఎ కోర్టు పరిధిలోనే (ముంబైలోనే) ఉండాలని, అలాగే గత ఎఫ్ఐఆర్ కు దారి తీసిన కార్యకలాపాలు చేయగూడదంటూ షరతులు విధించింది. దీంతో వరవరరావు ఆరోగ్యంపై ఇప్పటికే తీవ్ర ఆందోళనలో ఉన్న కుటుంబ సభ్యులు, పౌర హక్కు సంఘాల ప్రతినిధులు ఆనందాన్ని వ్యక్తం చేస్తున్నారు. కొద్దిరోజుల కిందట వరవరరావుకు కరోనా సోకడంతోపాటు, తీవ్ర అనారోగ్యానికి గురయ్యారు. తన భర్త వరవరావును బెయిల్‌పై విడుదల చేయాలని కోరుతూ భార్య హేమలత బొంబే హైకోర్టును ఆశ్రయించారు.  

రాజ్యాంగంలోని ఆర్టికల్ 21 ప్రకారం తన భర్తకు బెయిల్‌ ఇవ్వాలన్న వరవరావు భార్య పిటీషన్‌పై బాంబే కోర్టు సానుకూలంగా స్పందించింది. ఈ పరిస్థితుల్లో ఆయనను జైలుకు పంపడం సరికాదని భావించిన కోర్టు షరతులతో కూడిన బెయిల్‌ మంజూరు చేసింది. అవసరమైనప్పుడు రావు విచారణకు హాజరుకావాలని, అయితే  భౌతిక హాజరునుంచి  మినహాయింపు కోసం దరఖాస్తు చేసుకోవచ్చని కోర్టు పేర్కొంది. మరోవైపు ఈ ఉత్తర్వుపై మూడు వారాల పాటు స్టే  విధించాలని కోరిన అదనపు సొలిసిటర్ జనరల్ అనిల్ సింగ్  అభ్యర్ధనను కోర్టు తిరస్కరించింది. వరవర రావుకు బెయిల్ ఇవ్వాలని పలువురు డిమాండ్ చేసిన సంగతి తెలిసిందే.. వరవరరావు వయసు, ఆరోగ్యాన్ని దృష్టిలో పెట్టుకుని బెయిల్ ఇవ్వాలని చాలా మంది కోరారు. ఎట్టకేలకు వరవరరావుకు బెయిల్ మంజూరు చేశారు.