లాక్ డౌన్ టైంలో అనేక పనులతో బిజీగా వున్నారు మెగాస్టార్ చిరంజీవి. ఇంటిపనుల్లోనే కాదు సినీ కార్మికులకు నిత్యావసరాలు అందించేందుకు, సీసీసీ కార్యకలాపాలు, రక్తదానంపై అవగాహన కల్గించారు. అంతకు ముందు ఇంటిని శుభ్రం చేసి తన తల్లి కోసం దోసె కూడా వేశారు. ఆ వీడియో వైరల్ అయిన సంగతి తెలిసిందే. తాజాగా ఆయన తన తల్లికోసం రుచికరయిన చేపల కూర వండారు.

మంచి చేపలకు తోడు చింత తొక్కుతో చిన్న చేపల గుజ్జు వేపుడు చేసి వాహ్ వా అనిపించారు. ఈ కర్రీ అంటే తన తల్లి అంజనాదేవికి చాలా ఇష్టం అన్నారు. చిరంజీవి కోసం ఎప్పటికప్పుడు ఈ కర్రీని ఆమె చేసి పెట్టేదంట. అందుకే ఈసారి తల్లి కోసం చిరంజీవి ఆ కూర చేశారు. పేరు పొడుగ్గా ఉన్నా వంట సింపుల్ అంటున్నారు. ఈ మేరకు చింత తొక్కుతో చిన్న చేపల గుజ్జు వేపుడు ఎలా చేయాలో.. దానికి కావల్సిన పదార్థాలేంటో అన్నీ వివరంగా చెబుతూ ఓ వీడియో చేశారు. నిజానికి ఈ వీడియో ఆదివారం పూర్తయింది. 

విజయవాడ కోవిడ్ సెంటర్లో అగ్నిప్రమాదంతో ఏర్పడిన విషాదాన్ని దృష్టిలో పెట్టుకొని వాయిదా వేశారు. ఆ వీడియోను సోమవారం విడుదలచేశారు. ఈ వీడియోతో పూర్తిస్థాయిలో చెఫ్ గా మారిపోయారు మెగాస్టార్ చిరంజీవి. ఆయన వంటపై అభిమానులు కామెంట్లు చేశారు. ఈ చేపల కూర వండడం పూర్తయ్యాక అది ఎలా ఉందో చెప్పమంటూ తల్లిని కోరారు. తల్లి ఆ కూరను అన్నంతో  కలుపుకొని తిన్నచాలా బాగుందని చెప్పడమే కాదు కొడుకుని అభినందించింది. అంతే అప్పటివరకూ టెన్షన్ పడ్డ ఈ ఆచార్య ఆనందంతో ఉబ్బితబ్బిబయ్యారు. 

తెలుగు టెలివిజన్ ఎంటర్ టైన్మెంట్ రంగంలో రియాలిటీ షోలకు గడచిన మూడేళ్ళుగా మంచి ఆదరణ లభిస్తోంది. బిగ్ బాస్ షోను విజయవంతంగా నిర్వహిస్తోంది స్టార్ మా. ఈసారి ఈ గేమ్ షో ఎప్పుడో ప్రారంభం కావాల్సి వున్నా కరోనా వైరస్ బ్రేకేసింది. ఇపుడు కాకపోతే మరెప్పుడు అన్నట్లుగా సీజన్ 4 ని డిజైన్ చేస్తున్నారు. ఎందుకంటే ఓ వైపు కరోనా వల్ల సీరియల్స్ లేవు, పెద్దగా వినోదంలేదు. ఈ టైంలో రిస్క్ చేసి కనుక బిగ్ బాస్ ని టీవీల్లోకి తెస్తే ఆ రెస్పాన్స్ బాగుంటుందంటున్నారు. 

టీయార్పీ రేటింగ్ కూడా కుమ్మేస్తుందని భారీ ఆంచనాలు వేసుకుంటూ భారీగా ఏర్పాట్లు చేస్తున్నారు. అందులో భాగంగా నాగార్జున బిగ్ బాస్ షూటింగుల్లో పాల్గొంటున్నారు. అందుకే ఈసారి మామూలు సీజన్ల కంటే ఖర్చు ఎక్కువ. కంటెస్టెంట్స్ కి రెమ్యునరేషన్ కూడా రెట్టింపు ఇస్తున్నారు. అదే విధంగా హోస్ట్ చేసే నాగార్జునకు కి బంపర్ రెమ్యునరేషన్ అంటున్నారు. ఇక 100 రోజుల పాటు బిగ్ బాస్ కాకుండా 50 రోజులకు ఈ షో పరిమితం కానుంది.  ఈ షో ప్రారంభం అయ్యేందుకు మరో 20 రోజుల సమయం పట్టనుందని ఫిలింనగర్‌లో వార్తలు వినిపిస్తున్నాయి. ఆగష్టు 30 నుంచి ఈ షోను ప్రారంభించబోతున్నట్లు సమాచారం.

పీపీఈ కిట్లు ధరించిన ఇద్దరు మేకప్ మెన్ల సాయంతో నాగార్జున ఈ షోకి సిద్ధం అవుతున్న ఫోటో ఒకటి హల్ చల్ చేస్తోంది. ఎలాంటి ఇబ్బందులు కలగకుండా కంటెస్టెంట్స్ అందరూ 14 రోజుల పాటు కచ్చితంగా హోం క్వారంటైన్ లో ఉండాలిట. ఆ తరువాతే వారిని బిగ్ బాస్ ఇంట్లోకి పంపుతారు. ఇలా కరోనా లేదని డిసైడ్ చేసుకున్న తరువాతనే అన్నీ ప్రారంభం అవుతాయి.

ఏర్పాట్లన్నీ వ‌డివ‌డిగా జ‌రుగుతుండ‌టంతో బిగ్ బాస్ షోలో ఎవ‌రెవ‌రు పాల్గొనబోతున్నార‌న్న అంశంపై ఆస‌క్తి నెల‌కుంది. కాగా విశ్వ‌స‌నీయ వ‌ర్గాల స‌మాచారం ప్రకారం యాంక‌ర్ లాస్య, క్యారెక్ట‌ర్ ఆర్టిస్ట్ క‌మ్ మోడ‌ల్ దివ్య పేర్లు ఫైన‌ల్ అయిన‌ట్లు తెలుస్తోంది. మ‌రికొంద‌రి పేర్లు ప్ర‌చారం జ‌రుగుతున్న‌ాఇంకా స్ప‌ష్ట‌త రాలేదు. ఈ షో ఆరంభం గురించిన ప్రోమో ఇప్ప‌టికే హెస్ట్ నాగార్జున‌తో కంప్లీట్ చేశారు. సోగ్గాడే చిన్నినాయన ఫేం దర్శకుడు కళ్యాణ్ కృష్ణ ప్రొమోకి దర్శకత్వం వహించారు.

తెలుగు సినిమా రంగంలో మహేష్ బాబు తీరే వేరుగా వుంటుంది. అందరు హీరోలు, హీరోయిన్లతో ఫ్రెండ్లీగా వుంటారు. రాజకీయనేతలతోనూ ఆయన అనుబంధం విడదీయలేనిది. టీఆర్ఎస్ వర్కింగ్ ప్రెసిడెంట్, మంత్రి కేటీయార్ కి అత్యంత సన్నిహితుడుగా వుంటారు. సినిమా ఫంక్షన్లకు ఎప్పుడు పిలిచినా కేటీయార్ హాజరై ఆ ఫంక్షన్ సక్సెస్ అయ్యేలా చూస్తారు. ప్రభుత్వ కార్యక్రమాల్లోనూ మహేష్ పాల్గొంటారు. తాజాగా మహేశ్‌బాబు తన పుట్టినరోజు సందర్భంగా ఇంట్లో మొక్క నాటారు. 

ఎంపీ సంతోష్ కుమార్‌ ప్రవేశపెట్టిన గ్రీన్‌ ఛాలెంజ్‌లో భాగంగా ఆయన మొక్క నాటుతూ పుట్టినరోజును జరుపుకోవడానికి ఇంత కంటే మంచి మార్గం లేదన్నారు. మహేశ్‌ మొక్క నాటుతున్న వీడియోను ట్విట్టర్‌ ఖాతాలో షేర్‌ చేస్తూ ఈ ఛాలెంజ్‌ను సరిహద్దులు దాటనివ్వాలని కోరారు.

ఈ గ్రీన్‌ ఛాలెంజ్‌కు ప్రతి ఒక్కరూ మద్దతు తెలపాల్సిందిగా కోరారు. పచ్చని ప్రపంచం వైపునకు అడుగులు వేయాలంటే ప్రతి ఒక్కరూ మొక్కలు నాటారు. అంతేకాదు తన మిత్రులు ఎన్టీఆర్‌, తమిళ హీరో థళపతి విజయ్‌, శృతి హాసన్‌కు ఆయన ఛాలెంజ్‌ విసిరారు. ఇప్పటికే సినిమా తారలంతా గ్రీన్ ఛాలెంజ్ లో మొక్కలు నాటిన సంగతి తెలిసిందే. తన పుట్టినరోజు సందర్భంగా శుభాకాంక్షలు తెలిపిన వారికి మహేష్ ధన్యవాదాలు తెలిపారు. 

గతంలో ఎప్పుడూ లేని విధంగా ప్రిన్స్ మహేష్ బాబు 45వ పుట్టిన రోజు ఘనంగా నిర్వహించారు.#HBDMAHESHBABU హ్యాప్ ట్యాగ్ తో సోషల్ మీడియా మార్మోగిపోయింది. 6.7 కోట్ల ట్వీట్లతో సూపర్‌స్టార్ మహేష్ అభిమానులు ప్రపంచ రికార్డు సృష్టించిన సంగతి తెలిసిందే. ట్విట్టర్‌లో ఉన్న దాదాపు సినీ, రాజకీయ సెలబ్రిటీలందరూ మహేష్ బాబుకు పుట్టిన రోజు శుభాకాంక్షలు అందచేశారు. అందులో భాగంగానే తెలుగు దేశం పార్టీ అధినేత, ఏపీ ప్రతిపక్ష నాయకుడు చంద్రబాబునాయుడు సైతం మహేష్‌కు బర్త్ డే విషెస్ తెలిపారు.

చంద్రబాబు ట్వీటే తారక్ అభిమానులకు కోపం తెప్పించిందంటున్నారు.‘‘తెలుగు చలనచిత్ర ప్రఖ్యాత నటుడు మహేష్ బాబు గారికి జన్మదిన శుభాకాంక్షలు. మీరు చలనచిత్ర రంగంలో ధృవతారగా వెలగాలని కోరుకుంటూ, మరెన్నో ఆనందకరమైన పుట్టినరోజు వేడుకలు జరుపుకోవాలని మనస్ఫూర్తిగా కోరుకుంటున్నాను.’’ అంటూ చంద్రబాబు ట్వీట్ చేశారు.

అయితే మహేష్‌కు చంద్రబాబు ట్వీట్ చేయడం ఏంటని తారక్ అభిమనులు, ముఖ్యంగా జూనియర్ ఎన్టీఆర్ ఫ్యాన్స్ తీవ్రంగా విమర్శలు చేస్తున్నారు. ఇటీవలే పుట్టిన రోజు జరుపుకున్న ఎన్టీఆర్‌కు విషెస్ చెప్పకుండా మహేష్ చెప్పడంలో ఆంతర్యం ఏంటని చంద్రబాబుని నిలదీయడంతో సోషల్ మీడియా హోరెత్తుతోంది. మీరిలాగే ఉంటే ఏకంగా తెలుగు దేశం పార్టీకి రాం రాం చెబుతామంటున్నారు. 

ఎన్టీఆర్‌ను తెలుగుదేశం పార్టీలోకి రానివ్వక పోయిన పర్వాలేదు. కానీ, ఒక మావయ్యగా ఆశీర్వదిస్తే ఏమయ్యేది, అసలు తారక్ ని మీరు నందమూరి వారసుడిగా గుర్తించడం లేదా? ఎన్టీయార్ ఫ్యామిలీని నిర్లక్ష్యం చేయడం ఏంటి? అంటూ రెచ్చిపోతున్నారు. టీడీపీకి ఈ దుస్థితి రావడానికి మీ నిర్లక్ష్యమే కారణం అంటున్నారు. మహేష్ బాబు పుట్టిన రోజు టీడీపీలో చిచ్చురేపిందంటున్నారు. గుంటూరు టీడీపీ ఎంపీ గల్లా జయదేవ్ మహేష్ బాబుకి బావ కావడం, మహేష్ బాబు తరచూ బావతో కలిసి తిరగడంతో చంద్రబాబు ఈ విధంగా ట్వీట్ చేశారు. 

అసలే మూవీ మొఘల్ మనవడు.. దగ్గుబాటి వారి ఘనమయిన వారసుడు.. స్క్రీన్ మెచ్చిన ధీరుడు.. భళ్లాలదేవుడు రానా పెళ్లి వైభవంగా జరిగింది. ఎట్టకేలకు టాలీవుడ్ మోస్ట్ ఎలిజిబుల్ బ్యాచిలర్ రానా ఓ ఇంటివాడయ్యాడు. రానా వివాహం తన ప్రేయసి మిహీకా బజాజ్ తో హైదరాబాదులోని రామానాయుడు స్టూడియోస్ లో ఘనంగా జరిగింది.  కరోనా ప్రభావం అధికంగా ఉండడంతో ఈ సెలబ్రిటీల మ్యారేజికి చాలా కొద్దిమంది అతిథులనే పిలిచారు. కేవలం 30 మందిలోపే గెస్టులు ఉండేలా నిర్మాత సురేష్ బాబు చర్యలు తీసుకొన్నారు.

అల్లు అర్జున్, సమంత అక్కినేని, రామ్ చరణ్ దంపతులు పెళ్లికి వచ్చినట్టు తెలిసింది! దగ్గుబాటి ఫ్యామిలీ పక్కాగా కొవిడ్ ప్రోటోకాల్ పాటిస్తూ ఈ పెళ్లి నిర్వహించింది. పెళ్లికి రాని వారి కోసం వీఆర్ టెక్నాలజీ ద్వారా పెళ్లిని లైవ్ లో చూసిన అనుభూతి కల్పించడం విశేషం. పెళ్ళికి వారం ముందునుంచే దగ్గుబాటి సురేష్ ఇంట సందడి ఏర్పడింది. రానా పెళ్లి వేడుకలో వెంకటేష్ బ్లాక్ సూట్‌లో స్పెషల్ ఎట్రాక్షన్‌గా నిలిచారు. 

రానా దంపతులు హడావిడిగా అతిథులతో కనిపించారు.రానా, మిహిక బజాజ్‌కు అత్యంత సన్నిహితులుగా రాంచరణ్, ఉపాసన దంపతులకు పేరుంది. దగ్గుబాటి, కొణిదెల కుటుంబాలకు మంచి సంబంధాలు ఉన్న సంగతి తెలిసిందే. ప్రధానంగా రానా, రాంచరణ్ మధ్య స్కూల్ నుంచి స్నేహం ఉంది. ముఖ్యంగా రాంచరణ్, ఉపాసనతోపాటు మెగా కుటుంబ సభ్యులు కూడా హాజరయ్యారు. ముఖ్యంగా పెళ్లికొడుకు, పెళ్లికూతురు వెనుక ఉపాసన, రాంచరణ్ కనిపించి చిరునవ్వులతో అందరిలో ఉత్సాహం నింపారు. అయితే బాహుబలి మూవీతో  రానాకు పాన్ ఇండియా స్టార్ ఇమేజ్ తెచ్చిన దర్శకుడు రాజమౌళి కరోనా కారణంగా దూరంగా వున్నారు. 

నటుడు నవదీప్ ఫన్నీ కామెంట్స్ చేశాడు. రానా- మిహికాలకి స్నేహితులు, సన్నిహితులు సోషల్ మీడియా ద్వారా శుభాకాంక్షలు తెలియజేశారు. బాలీవుడ్ ప్రముఖ హీరో అక్షయ్ కుమార్ ట్విటర్ ద్వారా రానాకు విషెస్ తెలియజేశాడు. `శాశ్వతంగా లాక్డ్-డౌన్ కావడానికి ఇదే సరైన మార్గం. కంగ్రాట్స్ రానా.. మీరిద్దరూ జీవితాంతం సంతోషంగా ఉండాలని కోరుకుంటున్నానని అక్షయ్ ట్వీట్ చేశారు.

ప్రిన్స్ మహేష్ బాబు బర్త్ డే సందర్భంగా ఏం బహుమతి రాబోతోందోనని ఫ్యాన్స్  అంతా ఎదురుచూశారు. అయితే మహేష్ బాబు 27వ సినిమా ‘సర్కారు వారి పాట’ మోష‌న్ పోస్ట‌ర్‌ను విడుద‌ల చేశారు. మోషన్ పోస్టర్‌లో ఒక రూపాయి కాయిన్ చూపిస్తూ.. దాన్ని ఓ చేయి పైకి ఎగ‌ర‌వేస్తూ కనపడుతుంది. ఆ చేయి మ‌హేశ్‌ది కావ‌చ్చు అని అభిమానులు భావిస్తున్నారు. ‘స‌ర్కారు వారి పాట...’ హుక్ లైన్‌ బ్యాగ్రౌండ్‌లో చిన్న బీట్‌గా వ‌స్తుంది. 

ఈ మోష‌న్ పోస్ట‌ర్‌తో  నిర్మాణ సంస్థలు మ‌హేశ్‌కు పుట్టిన‌రోజు శుభాకాంక్ష‌లు అందిస్తూ అభిమానుల‌కు ట్రీట్ ఇచ్చాయి. ఈ చిత్రాన్ని మైత్రీ మూవీ మేకర్స్, జీఎమ్‌బి ఎంటర్‌టైన్‌మెంట్, 14 రీల్స్ ప్లస్ సంస్థలు పరశురామ్ దర్శకత్వంలో నిర్మిస్తున్నాయి. కీర్తి సురేశ్ హీరోయిన్‌గా న‌టిస్తున్న సంగతి తెలిసిందే. సంక్రాంతికి విడుదలై బ్లాక్ బస్టర్ గా నిలిచిన సరిలేరు నీకెవ్వరు మూవీ తర్వాత నటిస్తున్న చిత్రం ఇది. ఈ సినిమాపై అభిమానులు భారీగా అంచనాలు పెట్టుకున్నారు. మహానటి ఫేం కీర్తి సురేష్ హీరోయిన్ కావడంతో ఆమె అభిమానులు కూడా ఈ సినిమా ఎలా వుంటుందోనని ఉత్తంఠగా ఎదురుచూస్తున్నారు. 

బాలీవుడ్ విలక్షణ నటుడు సంజయ్ దత్ స్వల్ప అనారోగ్యం బారిన పడ్డారు. శ్వాస సమస్యతో బాధపడుతున్న సంజయ్ దత్ ముంబైలోని లీలావతి హాస్పటల్‌లో జాయిన్ అయ్యారు. ముంబయి అంతటా కరోనా మహమ్మారి వీరవిహారం చేస్తున్న వేళ ఆయనకు కరోనా పరీక్షలు నిర్వహించగా నెగిటివ్ వచ్చినట్లుగా తెలుస్తోంది. అయినా సరే కొన్ని రోజుల పాటు వైద్యుల పరిశీలనలో ఉండాలని ఆయన నిర్ణయం తీసుకున్నట్లుగా తెలుస్తుంది. 

ప్రస్తుతం ఆయన ఆరోగ్యం నిలకడగానే ఉందని బాలీవుడ్ వర్గాలు చెబుతున్నాయి. సంజయ్ దత్ ఆరోగ్య విషయమై లీలావతి హాస్పటల్ వైద్యులు స్పందించారు. భయపడాల్సింది ఏమీ లేదని తెలిపినట్లుగా సమాచారం. ప్రస్తుతం శ్వాసతీసుకోవడంలో కాసిన్ని ఇబ్బందులు పడుతున్నారని, ఆయనకి కోవిడ్ లక్షణాలు అయితే లేవని తెలపడంతో పాటు, నాన్ కోవిడ్ వార్డ్‌లో ఆయనకు ట్రీట్‌మెంట్ చేస్తున్నట్లుగా లీలావతి హాస్పటల్ వైద్య సిబ్బంది ప్రకటించారు. 

ఈరోజు ప్రిన్స్ మహేష్ బాబు బర్త్ డే. ఈ సందర్భంగా శనివారం నుంచి మహేష్ బాబు బర్త్ డే గ్రీటింగ్స్ వెల్లువెత్తుతున్నాయి. మహేష్ బాబు పుట్టినరోజును పురస్కరించుకుని ఆయన అభిమానులు బర్త్‌డే ట్యాగ్‌ వాడారు. ఇప్పుడది వరల్డ్ రికార్డ్‌ను క్రియేట్ చేసింది.  ఇలాంటి రికార్డ్స్ ఇండియా వైడ్‌గా నమోదు అవుతుండటం ఇప్పటి వరకు జరిగింది. కానీ మహేష్ బాబు అభిమానుల తమ సత్తా ఏమిటో చూపించాలని బాగా ప్రయత్నం చేశారు. 

వారి దెబ్బకు బాక్సాఫీస్ బద్ధలయినట్టుగా వరల్డ్ ట్రెండ్స్‌లో మహేష్ బాబు బర్త్‌డే హ్యాష్ ట్యాగ్ నెంబర్ వన్ ప్లేస్‌లో నిలవడమే కాకుండా.. వరల్డ్ ఫాస్టెస్ట్ 10 మిలియన్ ట్వీట్స్ రికార్డ్ మహేష్ పేరిట నమోదైంది. మరి ఈ బర్త్‌డే ట్యాగ్ 24 గంటల్లో ఇంకెన్ని రికార్డులు వస్తాయో చూడాలి. మహేష్ అభిమానులు సరిలేరు మీకెవ్వరు అంటూ అభినందనలు వెల్లువెత్తుతున్నాయి. 

మరోవైపు చిరంజీవి బాటలో మహేష్ బాబు ముందుకెళుతున్నారు. ప్లాస్మా దానంపై అవగాహన పెంచుతున్నారు.  45వ వసంతంలోకి అడుగు పెట్టారు. తన పుట్టినరోజు సందర్భంగా అభిమానులంతా ప్లాస్మా దానం చేయాలని కోరారు. అంతేగాక సైబరాబాద్ పోలీస్ కమిషనర్ వీసీ సజ్జనార్ ప్లాస్మా దానంపై చేపడుతున్న అవగాహన కార్యక్రమంపై ఆయాన ప్రశంసలు కురిపించారు. ప్లాస్మా దానంతో ప్రజల్లో చైతన్యం తీసుకువచ్చేందుకు కృషి చేస్తూ పోలీస్ శాఖ సమర్థంగా పనిచేస్తోందన్నారు. 

కరోనా కాలంలో అనుక్షణం ప్రజల భద్రత చూసుకుంటూనే, మరోవైపు ప్లాస్మా దానం గురించి వివరిస్తూ ప్రజల్లో చైతన్యం తెస్తున్న సీపీ సజ్జనార్‌ను కృషిని ఆయన కొనియాడారు.ప్లాస్మా దానంతో ఎంతోమంది ప్రాణాలు కాపాడేందుకు ఆయన ప్రయత్నిస్తున్న తీరు అభినందనీయన్నాడు. తన పుట్టినరోజున అభిమానులంతా కూడా ప్లాస్మా దానంపై అవగాహన కార్యక్రమం చేపట్టాలని పిలుపునిచ్చారు.

అలాగే అవకాశం ఉన్నవాళ్లు ప్లాస్మా దానం చేయాలని విజ్ఞప్తి చేశాడు. మహమ్మారి వంటి విపత్కర పరిస్థితుల్లో ఒకరికొకరు తోడుగా ఉండాల్సిన అవసరం చాలా ఉందని ట్వీట్ చేశారు. ఇప్పటికే మెగాస్టార్ చిరంజీవి రక్తదానంతో పాటు ప్లాస్మా దానం గురించి అవగాహన పెంచుతున్న సంగతి తెలిసిందే. 

తెలుగు బుల్లితెరపై క్రేజీ జంట ఎవరని అడిగితే వెంటనే వినిపించే పేరు రష్మి-సుధీర్. ఈ జంట కెమిస్ట్రీ బాగా వర్కవుట్ అయింది. ఏ షో చేసినా వీరిద్దరి గురించిన కామెంట్లే ఎక్కువగా వినిపిస్తాయి. అప్పుడెప్పుడో వీరిద్దరు పెళ్లి చేసుకుంటున్నట్టుగా వార్తలు వచ్చాయి. భారీ స్థాయిలో ప్రేక్షకాదరణను సొంతం చేసుకున్న షో జబర్ధస్త్. దీని ద్వారా రష్మి మంచి పాపులారిటీ తెచ్చుకుంది.

ఎంతో మంది ఆర్టిస్టులు, టెక్నీషియన్లు ఇండస్ట్రీకి ఈ కామెడీ షో ద్వారా పరిచయం అయ్యారు. వీళ్లంతా తక్కువ సమయంలోనే పాపులారిటీని దక్కించుకున్నారు. ఇలా ఈ షో ద్వారా వెలుగులోకి వచ్చి ఊహించని రీతిలో క్రేజ్ సంపాదించుకున్న వారిలో సుడిగాలి సుధీర్... యాంకర్ రష్మీ గౌతమ్ పేర్లను ప్రత్యేకంగా చెప్పుకోవచ్చు. దీనికి కారణం వీళ్లిద్దరి మధ్య లవ్ ట్రాక్ నడుస్తున్నట్లు వార్తలు వస్తున్న సంగతి తెలిసిందే. 

తాజాగా బయటకు వచ్చిన ఓ వీడియోతో వీళ్ల ప్రేమ వ్యవహారం లీకైంది. వీరిద్దరూ త్వరలో ఒక్కటి కాబోతున్నారని అంటున్నారు.సినిమాల్లో కూడా వీరిద్దరూ వేరువేరుగా నటించారు. కెరీర్ పరంగా ఫుల్ బిజీగా ఉన్న వీరిద్దరూ సొంత పేర్లతో కంటే యూట్యూబ్ జోడీ అనే బిరుదుతో బాగా పాపులర్ అయ్యారు.రష్మీ.. సుధీర్ మధ్య లవ్ ట్రాక్ నడుస్తున్నట్లు, వీళ్లిద్దరూ త్వరలోనే పెళ్లి పీటలు ఎక్కబోతున్నట్లు ఎన్నో వీడియోలు హల్ చల్ చేశాయి. అయితే వీటిని ఖండించారు వీళ్ళిద్దరూ. కానీ ఆ గాసిప్స్ కి అంతం లేకుండా పోతోంది.

చాలా మంది ఫిల్మ్ మేకర్లు కూడా వీళ్లతో సినిమాలు చేయాలని చూశారు. కానీ, ఇప్పటి వరకు సెట్ కాలేదు. ఏ షో చేసినా సుధీర్.. రష్మి కి కన్నుగీటడం.. రష్మి కూడా ప్రతిస్పందించడంతో వీరిద్దరి మధ్య ఏదో జరుగుతోందని అంటున్నారు. ఈ మధ్య ఓ స్కిట్లో వీరిద్దరూ నిజంగా ప్రేమించుకుంటూ కనిపించారు. దీంతో వీరిద్దరి మధ్య ప్రేమాయణం క్లైమాక్స్ కి వచ్చిందని త్వరలో వీరిద్దరూ పెళ్లిపీటలు ఎక్కడం ఖాయమనే అభిప్రాయానికి వచ్చారు జనం. 

మహానటి మూవీ తర్వాత కీర్తి సురేష్ క్రేజ్ మారిపోయింది. అయితే సెలక్టివ్ చిత్రాల్లోనే కీర్తి నటిస్తోంది. తెలుగులో సర్కార్ వారి పాటలో నటిస్తోన్న ఈసుందరాంగి మరోక్రేజీ ప్రాజెక్టుకి ఓకె చెప్పింది. తాజాగా కమల్‌హాసన్, శ్రీదేవి జంటగా భారతీరాజా దర్శకత్వంలో దాదాపు 40 ఏళ్లక్రితం వచ్చి సంచలన విజయం సాధించిన చిత్రం ‘శిగప్పు రోజాక్కళ్‌’. ఈ చిత్రం తెలుగులో ‘ఎర్ర గులాబీలు’ పేరుతో అనువాదమయింది. ఈ చిత్రానికి మంచి పేరొచ్చింది. 

రెండు భాషల్లోనూ మంచి విజయాన్ని సొంతం చేసుకుంది. హిందీలోనూ ఈ మూవీ రీమేక్‌ అయింది. నలభైఏళ్ల తర్వాత ఇప్పుడు ‘శిగప్పు రోజాక్కళ్‌’కి సీక్వెల్‌ తీయటానికి సన్నాహాలు జరుగుతున్నాయని వార్తలు వస్తున్నాయి. భారతీరాజా ఈ చిత్రానికి కథ అందించటంతో పాటు నిర్మాతగా వ్యవహరిస్తున్నారు. భారతీరాజా కుమారుడు మనోజ్‌ ఈ చిత్రానికి దర్శకత్వం వహించం మరో విశేషం.

శ్రీదేవి పాత్రలో ఎవరిని తీసుకోవాలనే సందిగ్దత ఏర్పడింది. ‘మహానటి’ చిత్రంలో అద్భుతమయిన పేరు తెచ్చుకున్న కీర్తి సురేష్ అయితే బావుంటుందని భావిస్తుండగా.. కథ విన్న కీర్తి కూడా గ్రీన్‌ సిగ్నల్‌ ఇచ్చిందట. కీలకమయిన కమల్ హాసన్ పాత్రకోసం నటుడి అన్వేషణ సాగుతోంది. ‘ఎర్రగులాబీలు’ చిత్రానికి సంగీతం అందించిన ఇళయరాజానే ఈ సీక్వెల్‌కు సంగీతాన్ని సమకూర్చనుండడం విశేషం ఈ చిత్రం రివెంజ్‌ థ్రిల్లర్‌గా తెరకెక్కనుంది. తెలుగు, తమిళ భాషల్లో ఈ చిత్రం రానుంది. 

కోజికోడ్ లో జరిగిన విమాన ప్రమాదం యావత్ దేశాన్ని విషాదంలో నింపింది. ఈ విమాన ప్రమాదంలో మరణించిన వారి సంఖ్య 19కి చేరింది. గాయపడిన 171 మంది వేర్వేరు ఆస్పత్రులలో చికిత్స పొందుతున్నారు. ఈ విమాన ప్రమాదంపై సినీ ప్రముఖులు సోషల్ మీడియా ద్వారా స్పందించారు. మరణించిన వారికి నివాళులర్పించారు. 

ఈ ప్రమాదం తీవ్ర దిగ్భ్రాంతిని కలిగించింది. ఈ ప్రమాదంలో మరణించిన వారి కుటుంబాలకు, సన్నిహితులకు నా ప్రగాఢ సానుభూతి. గాయపడి చికిత్స పొందుతున్న వారు త్వరగా కోలుకోవాలని ప్రార్థిస్తున్నా  -మహేష్ బాబు

ఈ విమాన ప్రమాదంలో మరణించిన వారి కుటుంబాలకు, సన్నిహితులకు నా ప్రగాఢ సానుభూతి. గాయపడి చికిత్స పొందుతున్న వారు త్వరగా కోలుకోవాలి. ప్రమాదం జరిగిన వెంటనే స్పందించిన విమానాశ్రయ సిబ్బందికి, స్థానిక ప్రజలకు సలాం. ఇప్పటికే ఎంతో శ్రమిస్తున్న కేరళ వైద్యులకు మరింత బలం చేకూరాలి -కమల్ హాసన్

కేరళలో జరిగిన విమాన ప్రమాదం అత్యంత బాధాకరం. ఈ వార్త విని షాక్‌కు గురయ్యా. ఈ ప్రమాదంలో మరణించిన వారి ఆత్మలకు శాంతి చేకూరాలని కోరుకుంటున్నా. మృతుల కుటుంబాలకు, సన్నిహితులకు నా ప్రగాఢ సానుభూతి. గాయపడి చికిత్స పొందుతున్న వారు త్వరగా కోలుకోవాలని ప్రార్థిస్తున్నా -అల్లు అర్జున్

నిద్ర లేచిన వెంటనే కేరళలో జరిగిన విమాన ప్రమాదం గురించి తెలుసుకుని షాకయ్యా. మృతుల కుటుంబాలకు, సన్నిహితులకు నా ప్రగాఢ సానుభూతి. గాయపడి చికిత్స పొందుతున్న వారు త్వరగా కోలుకోవాలని ప్రార్థిస్తున్నా -మంచు విష్ణు

కోజికోడ్ ప్రమాద వార్త నన్నెంతో విచారానికి గురిచేసింది. ఈ ప్రమాదంలో మరణించిన వారి కుటుంబాలకు నా ప్రగాఢ సానుభూతి. మృతులకు శ్రద్ధాంజలి. గాయపడ్డవారు త్వరగా కోలుకోవాలని ప్రార్ధిస్తున్నా- తమన్నా భాటియా 

తాను ప్రేమించిన మిహికను పెళ్లిచేసుకోవడానికి సిద్ధపడుతున్నాడు భళ్ళాలదేవుడు రానా. వీరిద్దరి పెళ్లి ఆగస్టు 8వ తేదీన హైదరాబాద్‌లో జరగనుంది. వీరి పెళ్లి వేదిక తాజ్ ఫలక్‌నుమా ప్యాలెస్‌లో జరిపించాలని కుటుంబ సభ్యులు నిర్ణయించారు. శనివారం రాత్రి 8.30 గంటలకు హిందూ సంప్రదాయ పద్దతిలో పెళ్లికి ముహుర్తంగా నిర్ణయించారు. ఈ పెళ్లి కోసం ఫలక్‌నుమా ప్యాలెస్‌ను అందంగా ముస్తాబు చేశారు.

పెళ్లి కొడుకును చేసే కార్యక్రమంతో పెళ్లి పనుల హడావిడి మొదలైంది. రానా పెళ్లి వేడుకలకు సంబంధించిన ఫొటోలను తన ఇన్స్‌టాగ్రామ్‌లో పోస్టు చేయగా వైరల్‌గా మారాయి. పెళ్లి దుస్తుల్లో రానా, మిహికా మెరిసిపోతున్నారు. ఇవాళ ఫలక్ నుమా ప్యాలెస్ కు రానా, మిహిక కుటుంబసభ్యులు చేరుకుంటున్నారు. ఆరవతేదీన రానాను పెళ్లికొడుకును చేశారు. మాతా కీ చౌకీ, హల్దీ వేడుకలు మిహికా నివాసంలో జరిగాయి.

ఈ కార్యక్రమం కోసం సమంత, ఇతర స్నేహితులు, సన్నిహితులు రానా, మిహిక ఇంటికి వెళ్లారు. అనేక ఫోటోలు ఇన్ స్టా గ్రాంలో పోస్ట్ చేశారు. తన కాబోయే శ్రీమతి మిహికా బజాజ్ కళ్లలోకి తన్మయత్నంగా రానా చూస్తూ.. పెళ్లి కళ వచ్చేసిందా బాలా అనే విధంగా షేర్ చేసిన ఫోటో నెటిజన్లను విశేషంగా ఆకట్టుకుంది. ఈ ఫోటోలు వైరల్ అవుతున్నాయి. 

పెళ్లికి సంబంధించి సంప్రదాయ దుస్తుల్లో పెళ్లి కూతురు, పెళ్లి కొడుకు కనువిందుచేస్తున్నారు. మిహిక పసుపు, బంగారు వర్ణంలో ఉన్న లహెంగా, చోలీలో, రానా శ్వేత వర్ణం పట్టు వస్త్రాల్లో కనిపించారు. వీరిద్దరిని చూడడానికి రెండు కళ్ళుచాలడం లేదని నెటిజన్లు కామెంట్లు చేయడంతో రానా వారికి ధన్యవాదాలు తెలిపారు.