రెండు మూడ్రోజుల క్రితం హైదరాబాద్ లో కురిసిన భారీ వర్షానికి రోడ్లన్నీ చెరువులను తలపించాయి. ఎక్కడికక్కడ వర్షపు నీరు డ్రైనేజీ ద్వారా వెళ్లేందుకు వీల్లేక.. నాలాలు పొంగిపొర్లాయి. ఎప్పుడు భారీ వర్షం వచ్చినా భాగ్యనగరంలో ఇదే పరిస్థితి తలెత్తుతోందని, జీహెచ్ఎంసీ ఏం పట్టించుకోవడం లేదంటూ ఫిర్యాదులు వెల్లువెత్తాయి. 

అదే రోజు నేరేడ్ మెట్ ప్రాంతంలో 12 ఏళ్ల చిన్నారి సుమేధ నాలాలో పడి చనిపోయిందన్న వార్త సంచలనం సృష్టించిన సంగతి తెలిసిందే. తాజాాగా సుమేధ మృతిపై మేయర్ బొంతు రామ్మోహన్ స్పందించారు. ఆ చిన్నారి నాలా పడి చనిపోలేదని, అసలు ఆరోజు ఆ ప్రాంతంలో వర్షమే కురవలేదని మేయర్ సంచలన ఆరోపణలు చేశారు. 

వర్షమే లేనప్పుడు సుమేధ కాలువపడి చనిపోయి.. రెండు కిలోమీటర్ల దూరంలో ఉన్న బండకాలువలోకి కొట్టుకొచ్చే అవకాశమే లేదన్నారు మేయర్ బొంతు రామ్మోహన్. సుమేధ మృతి అనంతరం జీహెచ్ఎంసీ ఆ ప్రాంతాన్ని పరిశీలించగా ఈ విషయాలు వెల్లడయ్యాయని చెప్పుకొచ్చారు.

కాలువలో పడి సుమేధ చనిపోయి ఉంటే.. ఆ కాలువలో ఉన్న ఏ ఒక్కరాయి వల్ల ఆమెకు గాయం కాకపోవడం పలు అనుమానాలు రేకెత్తిస్తోందన్నారు. ఇన్ని అనుమానాలున్నాయి కాబట్టి సుమేధ కుటుంబానికి ఇప్పుడప్పుడే ఎక్స్ గ్రేషియా ఇవ్వడం లేదని, ఈ విషయంపై ఆలోచించాల్సిన అవసరం ఉందన్నారు. ఆ పాప కాలువలో పడి చనిపోయిందా ? లేక ఎవరైనా కావాలని చంపేసి కాలువలో పడేశారా ? అన్న విషయాలు తేలాల్సి ఉందన్నారు. 

కాగా.. చిన్నారి సుమేధ శుక్రవారం సాయంత్రం 6 గంటల సమయంలో సైకిల్ పై వెళ్లి.. శనివారం సాయంత్రానికి బండకాలువలో శవమై కనిపించిన సంగతి తెలిసిందే. 

కరోనా వైరస్ వచ్చాక ప్రజలంతా రోగనిరోధక శక్తి కోసం నిత్యం పౌష్టికాహారం తీసుకుంటున్నారు. డ్రై ఫ్రూట్స్, పాలతో పాటు కోడిగుడ్డు తినడం వల్ల రోగనిరోధక శక్తి పెరుగుతుందని, ప్రతి ఒక్కరూ కనీసం రోజుకొక గుడ్డైనా తినాలని డబ్ల్యూహెచ్ఓ చెప్పినప్పటి నుంచి దేశ వ్యాప్తంగా కోడిగుడ్ల వినియోగం పెరిగింది. ముఖ్యంగా పల్లె ప్రాంతాల్లో గుడ్ల వాడకం ఎక్కువగా ఉన్నట్లు ఇటీవల నెక్ చేసిన సర్వేలో తేలింది. 

లాక్ డౌన్ ముందు వరకూ ఒక్క తెలంగాణలో రోజుకి 60 నుంచి 70 లక్షల గుడ్ల వాడకం ఉండేదట. ఇప్పుడీ సంఖ్య కోటికి పైగానే ఉన్నట్లు తెలుస్తోంది. కారణం.. పౌష్టికాహారం. ముఖ్యంగా పల్లెల్లోనే కోటికి పైగా గుడ్లు తింటున్నట్లు తేలింది. ఉపాధి, ఉద్యోగావకాశాలు పోవడంతో చాలా మంది భాగ్యనగరంతో పాటు వివిధ పట్టణాల నుంచి సొంతఊళ్లకు వెళ్లిపోయారు. పట్టణాల నుంచి పల్లెలకు వెళ్లిన వారే ఎక్కువగా కోడిగుడ్లను తింటున్నారట. అందుకే ఒకప్పుడు కోడిగుడ్లను పొరుగు రాష్ట్రాలకు ఎగుమతి చేసిన నల్గొండ, ఖమ్మం జిల్లాల్లో కూడా ఇప్పుడు ఉత్పత్తి తగ్గిపోయిందని సమాచారం. ఒకవేళ ఉత్పత్తి బాగానే ఉన్నా అవి రాష్ట్ర ప్రజల వినియోగానికే సరిపోతున్నాయని తెలిసింది. 

అధికారికంగా రోజుకి కోటి పైగా గుడ్ల వాడకం ఉన్నా.. అనధికారికంగా ఈ సంఖ్య రెట్టింపుగా ఉండే అవకాశమూ ఉంది. చికెన్ కొనుగోళ్లు కూడా పెరగడంతో గుడ్లు పెట్టే కోళ్లను కూడా అమ్మేస్తున్నారు. అందుకే గుడ్ల ఉత్పత్తి తగ్గుతుందన్న ప్రచారం జరుగుతోంది. రాష్ట్రంలో కోడిగుడ్ల ఉత్పత్తి తగ్గితో రానున్న వారంరోజుల్లో గుడ్ల రేట్లు పెరిగే అవకాశాలున్నట్లు నిపుణుల అంచనా. ఒక్కో గుడ్డు ధర రూ.6 పలికినా ఆశ్చర్యపోనక్కర్లేదు. 2017 సంవత్సరాంతంలో కోడిగుడ్డు ధర రూ.6 పలికి ఆల్ టైం రికార్డు సృష్టించింది. 

ఇక చికెన్ రేట్లు కూడా పెరుగుతూనే ఉన్నాయి. లాక్ డౌన్ కాలంలో కిలో చికెన్ ధర కనీసం 50 రూపాయలైనా లేకపోవడంతో అమ్మకందారులు కోళ్లను చంపి డంప్ యార్డుల్లో పడేసిన ఘటనలున్నాయి. ఇప్పుడే అదే చికెన్ కరోనాకు ప్రత్యామ్నాయ మందుగా పనిచేస్తుండటంతో చాలా మంది ప్రతిరోజూ చికెన్ తింటున్నారు. రెండు మూడు నెలల్లోనే చికెన్ ధర 50 రూపాయల నుంచి 250 రూపాయలకు పెరిగిపోయింది. పట్టణాల శివార్లు, పల్లె ప్రాంతాల్లో కిలో చికెన్ 200 నుంచి 230 రూపాయలుండగా.. హైదరాబాద్ వంటి నగరాల్లో కిలో చికెన్ రూ.250 ఉంది. మున్ముందు చికెన్ ధరలు మరింత పెరగవచ్చన్న సంకేతాలొస్తున్నాయి.  

కొన్ని రోజులుగా తెలుగు రాష్ట్రాల్లో ఆన్ లైన్ క్లాసులు షురూ అయ్యాయి. కానీ చాలా మంది విద్యార్థులు ఆన్ లైన్ పాఠాలు వినేందుకు స్మార్ట్ ఫోన్లు లేక ఇబ్బంది పడుతున్నారు. కొందరికీ స్మార్ట్ ఫోన్లున్నా సరైన నెట్ వర్క్ లేక ఇబ్బందులు పడుతున్నారు. ఇలాంటి తరుణంలో నెట్ వర్క్ కోసం ఊరి చివరనున్న పొలంకు వచ్చి మంచెపై కూర్చుని పాఠాలు వింటున్న విద్యార్థులూ ఉన్నారు. 

కొందరు చదువుకునేందుకు అన్ని సౌకర్యాలున్నా.. చదువును నిర్లక్ష్యం చేస్తుంటే.. మరికొందరు మాత్రం చదువు కోసం ఎంతటి కష్టాన్నైనా ఎదుర్కొనేందుకు సిద్ధమవుతున్నారు. తమ వద్ద స్మార్ట్ లేదన్న చింతను వీడి కష్టపడి పనిచేసి తెచ్చుకున్న డబ్బులతో స్మార్ట్ ఫోన్లను కొనుగోలు చేసి మరీ పాఠాలు నేర్చుకుంటున్నారు ఆ కోవకు చెందిన విద్యార్థే సిర్రం శివరాం. 

కరీంనగర్ జిల్లా గంగాధర మండలం ఒద్యారం గ్రామానికి చెందిన సిర్రం శివరాం పదో తరగతి చదువుతున్నాడు. ఆన్ లైన్ క్లాసులు వినేందుకు ఇంట్లో టీవీ లేదు. స్మార్ట్ ఫోన్ లేదు. శివరాం కుటుంబం ఆర్థికంగా వెనుకబడి ఉంది. తండ్రి మల్లయ్య కూలి పనులకెళ్తే గానీ ఆ రోజు ఐదువేళ్లూ నోట్లోకి వెళ్లని పరిస్థితి. తల్లివెంకవ్వ దివ్యాంగురాలు. పేదరికం కారణంగా వారింట్లో స్మార్ట్ ఫోన్ లేదు.. టీవీ లేకపోవడంతో ఆన్ లైన్ లో పదోతరగతి పాఠాలు వినాలన్న అతని ఆశ నిరాశయింది. 

మరికొద్ది రోజుల్లో ఆన్ లైన్ క్లాసులు ప్రారంభమవుతాయని తెలుసుకున్న శివరాం ఎలాగైనా ఆన్ లైన్ క్లాసులు వినాలనుకున్నాడు. అంతే.. మూడు నెలలపాటు కూలి పనులు చేసి రూపాయి రూపాయి కూడబెట్టి స్మార్ట్ ఫోన్ కొనుక్కున్నాడు. స్వయంకృషితో రూ.9 వేలతో కొనుక్కున్న స్మార్ట్ ఫోన్ లో ఇప్పుడు శివరాం ఆన్ లైన్ క్లాసులు వింటున్నాడు. అతడిని చూసిన గ్రామస్తులు పట్టుదల ఉంటే సాధించలేనిది ఏదీ ఉండదని అభినందిస్తున్నారు. 

భారీ వర్షాలు తెలుగు రాష్ట్రాలను అతలాకుతలం చేస్తున్నాయి. సుమారు నెలరోజుల క్రితం కురిసిన భారీ వర్షాలకు గోదావరి ఉప్పొంగింది. భద్రాచలం వద్ద గోదావరి 60 అడుగుల నీటిమట్టం క్రాస్ చేసి చరిత్ర సృష్టించింది. ఆగస్టులో వచ్చిన గోదావరి వరదలకు చాలా గ్రామాలు జలదిగ్బంధమయ్యాయి. వాగులు, వంకలు పొంగి రోడ్డుపైకి నీరు చేరడంతో రాకపోకలు స్తంభించాయి. గోదావరి వరదల్లో జరిగిన నష్టం నుంచి పూర్తిగా కోలుకోకముందే మరోసారి భారీ వర్షాలు ప్రజలను భయపెడుతున్నాయి. 

ఆగస్టులో వర్షాలు కురిసినప్పటికీ పంటనష్టం చాలా తక్కువగా ఉండటంతో రైతుల్లో పెద్దగా ఆందోళన కనిపించలేదు. కానీ ఆ తర్వాత పెరిగిన వరదలు, ప్రస్తుతం కురుస్తున్న భారీ వర్షాలకు ఆంధ్రాలో వేల ఎకరాల్లోని పత్తి, వరి పంటలు నీటమునిగాయి. పత్తిపంటంతా తడిచిపోవడంతో ఏం చేయాలో తెలియక రైతులు లబోదిబోమంటున్నారు. ఇటు తెలంగాణలో రైతుల పరిస్థితి కూడా దాదాపు అలాగే ఉంది. భారీ వర్షాల కారణంగా తెలుగు రాష్ట్రాల్లోని వివిధ ప్రాజెక్టులు జలకళ సంతరించుకున్నాయి. 

నాగార్జున సాగర్, ఎస్ ఆర్ ఎస్ పీ, కోయిల్ సాగర్, ప్రకాశం బ్యారేజి, పులిచింతల ప్రాజెక్టులు నిండుకుండల్లా మారాయి. ఎగువ ప్రాంతాల నుంచి వస్తున్న వరదనీటికి స్థానికంగా భారీ వర్షాలు తోడవ్వడంతో ప్రాజెక్టులు జలకళ సంతరించుకున్నాయి. కృష్ణానదికి వరద ప్రవాహం ఎక్కువవ్వడంతో అధికారులు ప్రకాశం బ్యారేజ్ నుంచి 50 గేట్లు పూర్తిగా, మరో 20 గేట్లను పాక్షికంగా ఎత్తి సముద్రంలోకి లక్షల క్యూసెక్కుల నీటిని విడుదల చేశారు. అలాగే నాగార్జున సాగర్ కు భారీ స్థాయిలో వరద తాకిడి ఉండటంతో 12 గేట్లను 10 అడుగుల మేర ఎత్తి 2,10,138 క్యూసెక్కుల నీటిని దిగువకు విడుదల చేశారు. సాగర్ పూర్తి స్థాయి నీటి సామర్థ్యం 590 అడుగులు కాగా.. ప్రస్తుతం 589.40 అడుగుల నీటి నిల్వ ఉంది. 

ఇక మహబూబ్ నగర్ జిల్లా దేవరకద్ర నియోజకవర్గ పరిధిలో ఉన్న కోయిల్ సాగర్ చరిత్రలో ఎప్పుడూ లేని విధంగా నిండుకుండని తలపిస్తోంది. 50 - 60 ఏళ్లలో నిండని కోయిల్ సాగర్ ఈ ఏడాది పూర్తిగా నిండిందని స్థానికులు ఆనందం వ్యక్తం చేస్తున్నారు. కోయిల్ సాగర్ నిండటంతో అధికారులు గేట్లను ఎత్తి నీటిని విడుదల చేశారు. కోయిల్ సాగర్ నుంచి నీరు విడుదలవ్వడంతో భడ్రవెళ్లి వాగు కూడా జలకళ సంతరించుకుంది. 

తెలుగు రాష్ట్రాల్లో శనివారం మధ్యాహ్నం నుంచి భారీ వర్షాలు కురుస్తున్నాయి. ఇప్పటికే రెండ్రోజులుగా కురుస్తున్న వర్షాలకు చాలా ప్రాంతాలు నీట మునగడంతో ప్రజలు నిరాశ్రయులయ్యారు. పునరావాస కేంద్రాలు లేకపోవడంతో ఎటు వెళ్లాలో తెలియక నీటిలోనే కాలం వెళ్లదీస్తున్నారు. వేల హెక్టార్లలో పంటలు నీటమునిగాయి. ఇప్పుడు మళ్లీ వర్షాలు మొదలవ్వడంతో రైతులకు ఏం చేయాలో పాలుపోని పరిస్థితి తలెత్తింది. 

ఆరుగాలం కష్టపడి పడించిన పంటంతా నీళ్లపాలవుతుంటే రైతు గుండె తల్లడిల్లిపోతోంది. అటు నష్టపరిహారం అందక, ఇటు గిట్టుబాటు ధర రాకపోవడంతో చేసిన అప్పులు తీర్చలేక ఇప్పటికే చాలా మంది రైతులు బలన్మరణాలకు పాల్పడ్డారు. ఈ అధిక వర్షాలు ఇంకెన్ని రైతుల ఇంట్లో గుండెకోత మిగులుస్తాయో అర్థంకాని పరిస్థితి. 

ఇటు భాగ్య నగరంలో శనివారం కుండపోత వర్షం కురిసింది. భారీ వర్షానికి యథావిధిగా రహదార్ల వెంట ఉన్న నాలాలు పొంగి రోడ్లపై నీరు చేరింది. దీంతో రహదారులన్నీ చెరువులను తలపిస్తున్నాయి. జూబ్లిహిల్స్, బంజారాహిల్స్, అమీర్ పేట, ఎస్ఆర్ నగర్, కూకట్ పల్లి, బాలనగర్, చింతల్, జీడిమెట్ల, బోయిన్ పల్లి తదితర ప్రాంతాల్లో సుమారు గంటన్నర సేపు భారీ వర్షం కురిసింది. వర్షం కురుస్తుండగానే పలు ప్రాంతాల్లో పిడుగులు పడిన శబ్ధాలు వినిపించాయి. దీంతో పిడుగుల మోతకు భాగ్యనగరం దద్దరిల్లింది. 

రోడ్లన్నీ చెరువులను తలపించడంతో వాహనదారులు, పాదచారులు నానా ఇబ్బందులు ఎదుర్కొన్నారు. ప్రధాన కూడళ్లలో ట్రాఫిక్ జామ్ అవ్వడంతో కిలోమీటర్ల మేర వాహనాలు నిలిచిపోయాయి. భారీ వర్షానికి చాలా ప్రాంతాల్లో విద్యుత్ సరఫరాకు అంతరాయం ఏర్పడింది. గడిచిన మూడ్రోజుల నుంచి జీహెచ్ఎంసీకి భారీ వర్షాల పై ఫిర్యాదులు వెల్లువెత్తడంతో మాన్సూస్, డిజాస్టర్ బృందాలను జీహెచ్ఎంసీ అప్రమత్తం చేసింది. ఒక పక్క కరోనా వ్యాప్తి, మరోపక్క భారీ వర్షాలు ఉండటంతో ఎటునుంచి ఏ సీజనల్ వ్యాధి సోకుతుందోనని ప్రజలు ఆందోళన చెందుతున్నారు. 

ఇటీవల బంగాళాఖాతంలో ఏర్పడిన ఒక అల్పపీడనం బలహీన పడగా.. మరో అల్పపీడనం ఏర్పడినట్లు భారత వాతావరణ శాఖ వెల్లడించింది. దీని ప్రభావంతో తెలుగు రాష్ట్రాలకు మరో రెండ్రోజుల పాటు భారీ వర్షాల కష్టాలు తప్పవని వాతావరణ శాఖ అధికారులు హెచ్చరించారు. లోతట్టు ప్రాంతాల ప్రజలను ఆయా ప్రభుత్వాలు పునరావాస కేంద్రాలకు తరలించాలని సూచించారు. అలాగే సముద్రం అల్లకల్లోలంగా ఉండటంతో మత్స్యకారులు వేటకు వెళ్లరాదని హెచ్చరించింది వాతావరణశాఖ. 

లాక్ డౌన్ సమయంలో దేశంలో క్రైం రేటు కాస్త తగ్గింది. కానీ అన్ లాక్ తర్వాత తరచూ జరుగుతున్న రోడ్డు ప్రమాదాలతో మళ్లీ క్రైం రేటు పెరుగుతోంది. వీటిలో చాలా  ప్రమాదాలకు ప్రధాన కారణం అతివేగం, నిద్రమత్తేనని పోలీసులు చెప్తున్నారు. సుమారు నెలరోజుల వ్యవధిలో తెలుగు రాష్ట్రాల్లో పదుల సంఖ్యలో వాహనదారులు రోడ్డుప్రమాదాల్లో మరణించారు. 

తాజాగా కృష్ణాజిల్లా నందిగామ మండలం మునగచర్ల గ్రామం వద్ద రోడ్డుప్రమాదం జరిగింది. శనివారం తెల్లవారుజామున హైదరాబాద్ నుంచి ఏలూరు వెళ్తున్న ఎస్ వీ కె డి ప్రైవేట్ ట్రావెల్స్ బస్సును వెనుకనుంచి వచ్చిన లారీ మునగచర్ల వద్ద ఢీ కొట్టింది. ఈ ప్రమాదంలో బస్సు, లారీ బోల్తా పడ్డాయి. జాతీయ రహదారి పక్కనే ఉన్న పతిలో బస్సు, లారీ బోల్తా పడి ఉండటం గమనించిన స్థానికులు పోలీసులకు సమాచారమిచ్చారు. 

ప్రమాద స్థలానికి చేరుకున్న పోలీసులు క్షతగాత్రులందరినీ నందిగామ ప్రభుత్వ ఆస్పత్రికి తరలించగా.. వారంతా చికిత్స పొందుతున్నారు. అలాగే లారీ క్యాబిన్ లో ఇరుక్కుపోయిన డ్రైవర్, క్లీనర్లను సురక్షితంగా బయటికి తీశారు. కాగా.. ప్రమాద సమయంలో బస్సులో 29 మంది ప్రయాణికులున్నట్లు తెలుస్తోంది. చికిత్స పొందుతున్న వారిలో పలువురి పరిస్థితి విషమంగా ఉన్నట్లు వైద్యులు పేర్కొన్నారు. నందిగామ పోలీసులు కేసులు నమోదు చేసుకుని దర్యాప్తు చేస్తున్నారు. 

ప్రజా సమస్యల గురించి మాట్లాడుతాడని గెలిపించి పార్లమెంట్ కు పంపితే పోర్న్ చూసుకుంటూ అడ్డంగా బుక్ అయ్యాడు ఓ ఎంపీ..! పోర్నోగ్రఫిక్ ఫోటోలను చూసుకుంటూ థాయ్ ల్యాండ్ కు చెందిన ఎంపీ 'రోనాథెఫ్ అనువాత్' పార్లమెంట్ లో గడిపాడు. పార్లమెంట్ లో బడ్జెట్ చదువుతూ ఉండగా.. ఆయన మాత్రం తన పనిలో తాను మునిగిపోయారు. అక్కడ ఉన్న రిపోర్టర్లు ఈ విషయాన్ని గుర్తించగా ఎంపీ గారు అడ్డంగా దొరికిపోయారు.

దాదాపు 10 నిమిషాల పాటూ ఆయన పోర్నోగ్రఫిక్ కంటెంట్ ను చూడడానికి సమయాన్ని కేటాయించారట. బ్యాంకాక్ లోని పార్లమెంట్ లో గ్యాలరీలో కూర్చున్న విలేకరులు సదరు ఎంపీ గారు ఏమి చేస్తున్నారో మొత్తాన్ని రికార్డు చేశారు. రూలింగ్ పార్టీ అయిన పలాంగ్ ప్రచారత్ పార్టీకి చెందిన ఎంపీ అయిన అనువాత్ 'చోన్ బురి ప్రావిన్స్' కు ప్రాతినిధ్యం వహిస్తూ ఉన్నాడు. సదరు ఎంపీ లోని రొమాంటిక్ యాంగిల్ సామాజిక మాధ్యమాల్లో బాగా వైరల్ అయిపొయింది.

ఫోటోలలో క్లారిటీ మిస్ అయిందేమో కానీ అప్పుడప్పుడు తన ఫేస్ మాస్కును తీసి మరీ ఫోన్ నే చూస్తూ ఉండిపోయారు. విషయం బయటకు తెలిసిపోయిందనుకున్న అనువాత్ తాను అలాంటి ఫోటోలను చూశానని ఒప్పుకున్నాడు. తనకు మొబైల్ యాప్ ద్వారా ఓ లింక్ వచ్చిందని ఆ లింక్ ఓపెన్ చేయగా ఓ మహిళ తనకు సహాయం కావాలి, డబ్బులు కావాలి అంటూ కోరిందని ఏవేవో కథలు చెప్పాడు. అంతేకాదు ఆ ఫోటోలను అంత సేపు తదేకంగా చూడడానికి కారణం సదరు మహిళ ప్రమాదంలో ఉందా లేదా అన్నది తెలుసుకోడానికే అంటూ చెప్పుకొచ్చాడు. ఎవరైనా గ్యాంగ్ స్టర్ సదరు మహిళను బంధించి హింసిస్తున్నాడేమో అని ఆ ఫోటోలను చూసి తెలుసుకోవాలని అనుకున్నాడు. ఆమె డబ్బులు కోసమే ఇలా చేస్తోందని గమనించి ఫోటోలను డిలీట్ చేశాడట.

అనువాత్ చర్యలపై పలువురు నేతలు మండిపడ్డారు. ఈ ఘటనపై వివరణ ఇవ్వాలని అతడిని ప్రభుత్వ అధికారులు కోరారు. అతడిపై ఎలాంటి చర్యలు తీసుకోలేదు. హౌస్ స్పీకర్ అది అతడి పర్సనల్ మ్యాటర్ అంటూ చెప్పేశారు. పార్లమెంట్ లోని ఎవరూ కూడా ఈ విషయంపై ఫిర్యాదు చేయకపోవడంతో ఎటువంటి చర్యలు తీసుకోలేమని స్పీకర్ అన్నారు. 

ఈ భూమి మీద ఎన్నో రకాల పాములు ఉన్నాయి. వాటిలో కొన్ని ఎంతో అందంగా మనకు కనిపిస్తూ ఉంటాయి. అబ్బా.. పాము కూడా ఎంత అందంగా ఉందో కదా అని మనకు అనిపించకమానదు. తాజాగా అలాంటి ఓ పాము గురించి సామాజిక మాధ్యమాల్లో తెగ చర్చించుకుంటూ ఉన్నారు. ఇంతకూ అందులో ఉన్న పాము ఏమిటో తెలుసా..? 'బ్లూ పిట్ వైపర్'

ఈ పాముకు సంబంధించిన వీడియోను చూసి చాలా మంది ఎంత బాగుందో కదూ అంటూ తెగ పొగిడేస్తూ ఉన్నారు. ఆ నీలం రంగు పాము ఓ ఎర్రటి రోజా మీద కూర్చుని ఉంది. చూడడానికి ఎంతో అందంగా అనిపిస్తూ ఉంటుంది.

అందంగా ఉన్నంత మాత్రాన ఆ పాము విషపూరితమైనది కాదు అని అనుకోకండి. ఎందుకంటే ఆ పాము ఒక్క సారి కాటేస్తే శరీరం లోపల, బయట తీవ్రంగా రక్తస్రావం అయ్యే అవకాశం ఉందట..! ఆ పాము విషం చాలా ప్రమాదకరమని చెబుతూ ఉన్నారు.

మాస్కో జూ ప్రకారం ఈ పాములు ఇండోనేషియా, తూర్పు టిమోర్ ప్రాంతాల్లో కనిపిస్తూ ఉంటాయి. వీటిని పిట్ వైపర్ అని అంటూ ఉంటారు. సాధారణంగా ఆకుపచ్చ రంగులో ఉంటాయి. నీలం రంగులో కనిపించడం చాలా అరుదు అని చెబుతున్నారు. నీలం రంగు పాముల జంట కలిస్తే అవి ఆకుపచ్చ రంగు పాములకు జీవం ఇవ్వగలవట..!

'Life on Earth' అనే ట్విట్టర్ ఖాతాలో ఈ పాముకు సంబంధించిన వీడియోను పోస్టు చేసారు.

"The incredibly beautiful Blue Pit Viper," అంటూ ఈ పోస్టు చేసిన ఈ వీడియో పలువురిని ఆకర్షించింది. పాము చాలా అందంగా ఉంది.. కానీ ఆ పాము ఎంత విషపూరితమైనదో తెలుసుకుని నెటిజన్లు షాక్ తింటున్నారు. Reddit లో కూడా ఈ వీడియోకు 2 మిలియన్లకు పైగా వ్యూస్ వచ్చాయి. ఆ పాము ఎంత అందంగా ఉన్నప్పటికీ దానికి దూరంగా ఉండడమే మంచిదని పలువురు హెచ్చరిస్తూ ఉన్నారు.  

ఇంటర్నెట్ లో బ్లూ పిట్ వైపర్లు విషపూరితమైనవని, చాలా కోపంతో ఉంటాయని ఉంది. ఈ పాముల విషం వలన చనిపోవడం చాలా అరుదుగా జరుగుతున్నప్పటికీ.. హ్యామరేజ్ కు కారణం అవ్వొచ్చు.. విపరీతమైన నొప్పి, వాపు, బయట,లోపల రక్త స్రావం జరిగే ప్రమాదం ఉందని రాసి ఉంది.

రైతు పడే కష్టం అంతా  ఇంతా కాదు.. గిట్టు బాటు ధర వస్తుందో లేదో తెలీదు కానీ.. తను పండించిన గింజలు పది మంది తింటే చాలు అని అనుకుంటాడు రైతు..! ప్రభుత్వాలు రైతులను పట్టించుకోక పోయినా.. బ్యాంకులు మీద పడుతున్నా.. వారు మాత్రం పంటలను పండించడం మీదనే దృష్టి పెడుతూ ఉంటారు. ఈ ఏడాది కాకపోతే.. వచ్చే ఏడాది.. ఆ ఏడాది కాకపోతే మరో ఏడాది.. ఎలాగోలా దేవుడు ఆదుకోడా అని భావిస్తూ ఉంటారు. కానీ అతడు పడే కష్టం 99 శాతం అయితే.. అదృష్టం ఆ ఒక్క శాతం కూడా ఉంటుందో లేదో చెప్పలేము..!

ఇప్పుడు ఈ వీడియోను చూస్తే రైతు పడే కష్టాలు ఎలా ఉంటాయో అందరికీ అర్థమవుతుంది. ఆయన ఓ దివ్యాంగుడు.. కానీ తన పొలంలో తానే పని చేయాలని అనుకున్నాడు. ఊత కర్ర సాయంతో పొలం పని చేసుకుంటూ ఉన్నాడు. తల పాగా  చుట్టి చేతిలో పార పట్టుకుని మట్టిని తీసుకుంటూ వెళ్ళిపోయాడు. ఈ వీడియోను ఇండియన్ ఫారెస్ట్ సర్వీస్ ఆఫీసర్ మధుమిత షేర్ చేశారు.  రెండున్నర లక్షలకు పైగా వ్యూస్ వచ్చాయి. 2600కు పైగా రీట్వీట్లు వచ్చాయి. 16వేల మంది వీడియోను లైక్ చేశారు.

ఈ వీడియో తనకు ఫార్వర్డ్ చేశారని.. ఆ రైతుకు సంబంధించిన సమాచారం తన వద్ద లేదని మధుమిత ట్వీట్ చేసింది. పలువురు ఆయన ఎవరు..? ఏ ప్రాంతానికి చెందిన వారు అని అడుగుతూ ఉన్నారు. చాలా మంది కర్షకుడికి సలాం కొడుతూ ఉన్నారు.  

ఏసీలు రిపేర్ చేయించుకోవడానికి ఇళ్లలో మరమ్మతులు చేయించుకోవడానికి బయటనుంచి సంబంధింత సిబ్బందిని పిలిచి సేవలు చేయించుకుంటే వారిద్వారా చాలావరకు కరోనా వైరస్ వ్యాప్తి చెందుతున్నట్లు తెలుస్తోంది. అమితాబ్ బచ్చన్ మొదలుకుని సెలబ్రిటీలలో చాలామంది లాక్ డౌన్ కాలంలో ఇంటిపట్టునే ఉంటున్నప్పటికీ గృహ సంబంధ సేవలు, షూటింగ్ వంటి పనులకోసం ఇంటివద్దకే సిబ్బందిని  పిలిపించుకుంటున్న పరిస్థితుల్లోనే వారిలో ఎక్కువమందికి కరోనా వైరస్ సోకుతోందని సమాచారం.

వివరాల్లోకి వెళితే.. ప్ర‌ముఖ త‌మిళ న‌టుడు, ద‌ర్శ‌కుడు రామ‌రాజ‌న్ శ్వాస సంబంధిత స‌మ‌స్య‌ల‌తో ఆసుప‌త్రి పాల‌య్యారు. చెన్నైలోని ఓ ప్రైవేటు ఆస్ప‌త్రిలో చికిత్స పొందుతున్న ఆయన క‌రోనా బారిన‌ప‌డిన‌ట్లు వార్త‌లు వినిపిస్తున్నాయి. ఈ కార‌ణంగానే రామరాజన్‌ ఆసుప‌త్రిలో చేరిన‌ట్లు ప్ర‌చారంలో ఉంది. ఆయనకు 60 ఏళ్లు. 

గత కొన్ని నెలలుగా ఇంటిపట్టునే ఉంటున్న రామరాజన్ కరోనా బారిన ఎలాపడ్డారు అన్నది ఆసక్తికరంగానే ఉంది కానీ బయటి నుంచి ఇంట్లోకి వచ్చిన సర్వీస్ మ్యాన్ వల్లే ఆయనకు కరోనా సోకిందని తెలుస్తోంది. కొన్నిరోజుల క్రితం ఆయన నివాసానికి ఏసీ మెకానిక్ వ‌చ్చాడ‌ని, ఆ తర్వాత రామరాజన్‌ అనారోగ్యానికి గురైన‌ట్లు తెలుస్తోంది. 

శ్వాస తీసుకోవ‌డంలో ఇబ్బంది ప‌డుతుండ‌టంతో  వెంట‌నే  ఆయ‌న్ను కుటుంబ‌సభ్యులు ఆసుప‌త్రికి త‌ర‌లించారు. అయితే క‌రోనా ప‌రీక్ష‌ల ఫ‌లితాలు ఇంకా రావాల్సి ఉంది.  ఒక‌వేళ క‌రోనా నెగిటివ్ అని తేలితే కొద్దిరోజుల్లోనే రామ‌రాజ‌న్‌ను డిశ్చార్జ్ చేసే అవ‌కాశం ఉంది. 

మక్కల్ నాయగన్ సినిమాతో న‌టుడిగా త‌మిళ చిత్ర‌రంగంలో ప్ర‌స్తానాన్ని ప్రారంభించిన రామరాజన్ ఎంగా ఓరు పాతుకుకరన్, కరాగట్టకరన్, ఎంగా ఓరు కావల్కరన్ మరియు పాతుకు నాన్ ఆదిమై వంటి సినిమాల్లో న‌ట‌న‌కు గాను మంచి గుర్తింపు ల‌భించింది.  అటు ద‌ర్శ‌క‌త్వం, ఇటు న‌ట‌నారంగంతో మ‌మేక‌మైన రామ‌రాజ‌న్ త‌మిళ ప్రేక్ష‌కుల్లో ప్ర‌త్యేక అభిమానాన్ని సంపాదించుకున్నారు.

భారతీయ స్టేట్ బ్యాంక్ ఏటీఎంలో నగదు ఉపసంహరణకు కొత్త నిబంధన రేపటి నుంచి అమల్లోకి రానుంది. దేశవ్యాప్తంగా ఉన్న అన్ని ఎస్‌బీఐ ఏటీఎంలలో శుక్రవారం నుంచి ఓటీపీ ఆధారిత విత్‌డ్రాయల్ సిస్టమ్ అమలులోకి రానుంది. ఎస్‌బీఐ ఏటీఎంల నుంచి న‌గ‌దు తీసుకోవాలంటే తప్పనిసరిగా వన్‌ టైమ్‌ పాస్‌వర్డ్‌(ఓటీపీ) ఎంట‌ర్ చేయాల్సిందే. ఈ నెల 18 నుంచి రోజులో అన్ని వేళల్లోనూ (24గంటల పాటు) 10 వేలు రూపాయలు అంతకుమించి చేసే నగదు ఉపసంహరణలకు పిన్‌ నంబర్‌తోపాటు ఓటీపీ నమోదు చేయాల్సి ఉంటుంది. డెబిట్‌ కార్డుకు లింక్‌ చేసిన ఉన్న రిజిస్టర్ మొబైల్ నెంబర్‌కు వచ్చే ఓటీపీ నమోదు చేస్తేనే ఏటీఎంలో నుంచి నగదు వస్తుంది. ఓటీపీ లేకపోతే 10 వేల రూపాయలకు మించి న‌గ‌దు తీసుకోలేరు. 

ప్రస్తుతానికి రాత్రి 8 గంటల నుంచి మరుసటి రోజు ఉదయం 8 గంటల మధ్య ఎస్‌బీఐ ఏటీఎంల్లో రూ.10వేలకు మించి చేసే ఉపసంహరణలకు వినియోగదారుల మొబైల్‌కు వచ్చే ఓటీపీని ఇవ్వడం తప్పనిసరిగా అమల్లో ఉంది. రాత్రి వేళల్లో మోసాలకు తావు లేకుండా ఉండే ఉద్దేశ్యంతో ఈ ఏడాది జనవరిలో ఈ సదుపాయాన్ని ఎస్‌బీఐ తీసుకొచ్చింది. ఇది మంచి ఫలితాలను ఇవ్వడంతో అన్ని వేళల్లోనూ (24గంటల పాటు) ఈ నిబంధనను అమలు చేయాలని ఎస్‌బీఐ నిర్ణయించింది.

ఓటీపీ ఎలా పనిచేస్తుంది?

ఓటీపీ అనేది సిస్టమ్ ద్వారా రూపొందించబడిన కోడ్. ఇది సాధారణంగా వన్ టైమ్ లావాదేవీలకోసం దీన్ని ఉపయోగిస్తారు. ఎస్బీఐ ప్రకటన మేరకు ఎవరైనా ఎస్బీఐ ఏటీఎమ్ నుంచి పది వేల రూపాయలకు మించి నగదు తీసుకోవాలనుకుంటే ఈ శుక్రవారం నుంచి తన రిజిస్టర్డ్ ఫోన్ నంబర్‌కు వచ్చిన ఓటీపీ సంఖ్యను ప్రవేశపెట్టాల్సి ఉంటుంది. ఇది ఎస్బీఐ ఏటీఎమ్‌లలో మాత్రమే అందుబాటులో ఉంటుంది.

కాగా, ఎస్బీఐ ఎల్లప్పుడూ తన కస్టమర్ల భద్రతకు హామీ ఇస్తూ వారికి మరింత సౌలభ్యాన్ని కల్పించడంలో అందరికంటే ముందు ఉంటుందని ఎస్బీఐ మేనేజింగ్ డైరెక్టర్ సీఎస్ శెట్టి చెప్పారు. 24 గంటలపాటు పనిచేసీ ఈ ఓటీపీ ఆధారిత వ్యవస్థ వల్ల ఎస్బీఐ కస్టమర్లు నగదు తీసుకునే సమయంలో పూర్తి భద్రతను కలిగి ఉంటారని చెప్పారు.

సాధారణంగా మొసలిని చూస్తే చాలు భయపడి వణికిపోతూ ఉంటారు. అలాంటిది నీళ్లలో మన వెనకాలే ఉంది అని అనిపిస్తే.. ఆ ఊహ కూడా మనకు చాలా భయానికి  గురిచేస్తుంది. అతడి వెనకాలే ఓ మొసలి వస్తూ ఉన్నా.. కనీసం భయపడలేదు అతడు.. ఏదో కుక్కనో, పిల్లినో పక్కకు వెళ్ళమన్నట్లు చేతులతో తోసేశాడు. ఈ వీడియో సామాజిక మాధ్యమాల్లో బాగా వైరల్ అవుతోంది.

13 అడుగుల మొసలి అది.. ఎప్పుడు దాడి చేద్దామా అన్నట్లు ఉంది. కానీ ఆస్ట్రేలియాకు చెందిన మ్యాట్ రైట్ మాత్రం దాన్ని చాలా అంటే చాలా సిల్లీగా తీసుకున్నాడు. నీటిలో ఉన్న మొసలిని ఎంతో సాధారణంగా పక్కకు పోమ్మా అన్నట్లు తోసేసాడు.

నదీ ప్రవాహంలో చెట్లు అడ్డు పడ్డాయి. వాటిని తన బృందంతో కలిసి రైట్ తీసివేస్తూ ఉన్నాడు. ఇంతలో అక్కడ ఓ మొసలి కనిపించింది. మ్యాట్ మాత్రం టెన్షన్ పడలేదు. నోరు తెరచిని మొసలిని ఏకంగా సైలెంట్ చేసేశాడు. "Bonecruncher"  "sit", "go away"  "stay." అనే పదాలను మొసలిని కమాండ్ చేయడానికి వాడాడు. ఇంస్టాగ్రామ్ లో ప్రస్తుతం ఈ వీడియో బాగా వైరల్ అవుతోంది. మొసలికి అంత దగ్గరగా ఉన్నా కూడా ఆయన కొంచెం కూడా భయపడకపోవడంతో అందరూ ఆయన్ను ప్రశంసిస్తూ ఉన్నారు. 2 లక్షల వ్యూస్ ను ఇంస్టాగ్రామ్ లో వీడియో సొంతం చేసుకుంది. ఎంతో మంది కామెంట్లు చేస్తూ ఉన్నారు.

మొసలిని కుక్కపిల్లలా ఆయన ట్రీట్ చేస్తున్నారు అని ఒక యూజర్ కామెంట్ చేశాడు. ఇది చాలా ప్రమాదకరమని కొందరు చెబుతూ ఉన్నారు. ఏబీసీ న్యూస్ తో మాట్లాడిన రైట్ తనకు ఆ మొసలి చాలా ఏళ్లుగా తెలుసునని చెప్పుకొచ్చాడు. అయితే ప్రజలందరూ మొసలితో స్నేహం చేయమని చెప్పనని.. ఇది చాలా ప్రత్యేకమైనదని తెలిపాడు. తన దగ్గరకు వచ్చే ఏ జంతువును, పక్షిని కూడా మొసలి అంత సులువుగా విడిచిపెట్టదు. అప్పుడప్పుడు మనుషుల ప్రాణాలను కూడా మొసళ్ళు తీస్తూ ఉంటాయి. అలాంటిది రైట్ మొసలితో స్నేహం చేయడమంటే.. సాహసమనే చెప్పాలి.