మన రూపాయి మరింత చిక్కిపోతోంది. అమెరికా-ఇరాన్‌ టెన్షన్స్‌ నేపథ్యంలో చమురు ధరలు భగ్గుమన్నాయి.  ఇరాక్‌లోని అమెరికి సైనిక స్థావరాలపై ఇరాన్‌ క్షిపణి దాడి అనంతరం  అంతర్జాతీయ బెంచ్‌మార్క్‌ క్రూడ్‌ ఆయిల్‌ ధర ఒకదశలో 70డాలర్లకు చేరింది. దీంతో పెట్రోల్, డీజిల్ ధరలకు త్వరలో రెక్కలు రానున్నాయి. ఇప్పటికే పెట్రోల్ రేటు లీటరుకి 80 రూపాయలు దాటింది. డీజిల్ దరిదాపుల్లో వుంది. సాధారణంగా చమురు ధరల ఎఫెక్ట్ మన దేశ ఆర్థికరంగంపై తీవ్రంగా ఉంటుంది. 

రూపాయి పతనంతో దేశీయ మార్కెట్లో మొబైల్స్‌తో సహా అనేక దిగుమతి వస్తువుల ధరలు మరింత పెరుగుతాయి. రూపాయి సెగతో గృహోపకరణాలు, కొన్ని ఎలక్ట్రానిక్‌ వస్తువుల ధరలు పెరుగుతాయి. 

దిగుమతి వస్తువులు ఎక్కువగా ఉండే మిగతా రంగాల కంపెనీలూ ఇదే బాట పట్టే అవకాశం ఉంది.ఇలా రూపాయి మారకం విలువ 7 రూపాయలకు చేరడం కొత్తేం కాదు. 2018 సెప్టెంబరులో రూపాయి మారకం విలువ 72.50ని తాకింది. 2019 నవంబరులోనూ  72.09 వద్దకు చేరుకుంది. మరోవైపు రూపాయి ట్రేడింగ్‌ సేవలు ఇకపై 24 గంటలూ అందుబాటులో ఉండేలా రిజర్వ్‌ బ్యాంక్‌ ఆదేశాలు జారీచేసింది.

ఇందులో భాగంగా రోజంతా దేశీ కరెన్సీ ట్రేడింగ్‌ సేవలు అందించడానికి దేశీ బ్యాంకులకు గ్రీన్‌ సిగ్నల్‌ ఇచ్చింది. రూపాయి ట్రేడింగ్‌ పరిమాణం భారత్‌లో కన్నా విదేశాల్లో గణనీయంగా జరుగుతుండడంతో రిజర్వుబ్యాంకు ఈ చర్యలు తీసుకుంది. దేశీయంగా రూపాయి బలహీనపడడంతో ఐటీ షేర్లు లాభపడుతున్నాయి.

విదేశాలనుంచి మనదేశానికి డాలర్ల వరద కొనసాగే అవకాశాలున్నాయి. అమెరికా-ఇరాన్ మధ్య యుద్ధ వాతావరణం నేపథ్యంలో విదేశీ మారకద్రవ్య నిల్వలు పెంచుకునేందుకు ఆర్ బీఐ చర్యలు చేపట్టింది. దీంతో చమురు ధరల పెరిగినా దాని ప్రభావం ఆర్థిక వ్యవస్థ మీద పడకుండా జాగ్రత్తలు తీసుకుంటోంది. 

ఆర్‌బీఐ వద్ద వున్న విదేశీ మారకద్రవ్య నిల్వలు పది నెలల దిగుమతుల అవసరాలను తీర్చగలవు. తాజా అంతర్జాతీయ అనిశ్చితిలో రూపాయి విలువను కాపాడేందుకు ఈ నిల్వలు ఆర్‌బీఐకి ఆయుధంగా పనిచేస్తాయనేది నిపుణులంటున్నారు. 

ఒకవైపు పశ్చిమాసియాలో యుద్ధ వాతావరణం నెలకొంది. ఎప్పుడేం జరుగుతుందో తెలీని అయోమయ, ఆందోళనకర పరిస్థితి. మిలిటరీ కమాండర్‌ ఖాసిం సులేమాని హత్యకు ప్రతీకారంగా ఇరాక్‌లోని అమెరికా సైనిక స్థావరాలపై ఇరాన్‌ క్షిపణి దాడికి పాల్పడింది.  ఈ నేపథ్యంలో ఇరాన్ లో ఓ విమాన ప్రమాదం తీవ్ర విషాదం నింపింది.

ఉక్రెయిన్‌కు చెందిన బోయింగ్‌ 737 విమానం టేకాఫ్‌ తీసుకున్నకొద్ది సేపటికే కుప్పకూలిపోయింది. ఈ ఘటనలో  సిబ్బంది  సహా,  మొత్తం ప్రయాణీకులు 180 మంది సజీవ దహనమై పోయారు. దీనికి సంబంధించిన భయంకరమైన వీడియో అందరినీ కలచివేస్తోంది. 

ప్రాథమిక సమాచారం ప్రకారం సాంకేతిక కారణాలతోనే ఈ విమానం కూలినట్టు అధికారులు చెబుతున్నారు. 170 మంది ప్రయాణికులు, సిబ్బందితో బయలుదేరిన ఉక్రేయిన్ విమానం బుధవారం టెహ్రాన్‌లోని ఇమామ్ ఖొమేని విమానాశ్రయం సమీపంలో కుప్పకూలింది. టేకాఫ్ అయిన కొద్దిసేపటికే రాజధాని టెహ్రాన్ శివారు పరాంద్ సమీపంలో బోయింగ్ 737 జెట్ కూలిపోయిందని ఇరాన్ మీడియా తెలిపింది. ఈ ప్రమాదంలో సిబ్బంది సహా మొత్తం 180 ప్రాణాలు కోల్పోయారు. మృతుల వివరాలు సేకరించే పనిలో పడ్డారు అధికారులు. 

భారత ప్రభుత్వ ఆర్థిక విధానాలు, మండిపోతున్న నిత్యావసరాల ధరలు, పడిపోయిన వేతనాలు, ప్రైవేటీకరణ వ్యతిరేకిస్తూ...  నేడు జాతీయ ట్రేడ్‌ యూనియన్ల ఆధ్వర్యంలో కార్మిక సంఘాలు దేశవ్యాప్తంగా  సమ్మెకు దిగాయి. సమ్మెలో బ్యాంక్‌ యూనియన్లు కూడా ఉండటంతో .. ప్రభుత్వ రంగ బ్యాంక్‌ సేవలు నిలిచిపోతున్నాయి. కార్మిక, ప్రజా వ్యతిరేక విధానాలను వ్యతిరేకిస్తూ.. ఈనెల 3నుంచే నిరసన కార్యక్రమాలు చేపట్టాయి కార్మిక సంఘాలు. 

జాతీయట్రేడ్ యూనియన్ పిలుపుతో దేశవ్యాప్తంగా ఈ సమ్మె జరుగుతోంది. అంగన్‌వాడీలు, బీఎస్‌ఎన్‌ఎల్‌లు ఉద్యోగులు, ప్రభుత్వ రంగ బ్యాంకులు, హెచ్‌పీసీఎల్‌, సీఐటీయూ, ఏఐటీయూసీ, ఐఎన్‌టీయూసీ సంఘాలకు చెందిన కార్మికులు విధులను బహిష్కరించి సమ్మెలో పాల్గొంటున్నారు.

కేంద్రం 44 కార్మిక చట్టాలను నాలుగు లేబర్‌ కోడ్స్‌గా మారుస్తుండటంతో  సుమారు 6 లక్షల మంది ఉద్యోగులు, కార్మికులు హక్కులు కోల్పోయే ప్రమాదం ఉందని కార్మిక సంఘాలు ఆందోళన చెందుతున్నాయి. కేంద్రం కార్మిక వ్యతిరేక విధానాలను అవలంభిస్తోందంటూ... కార్మిక సంఘాలు సమ్మె నోటీసు అందించాయి. బ్యాంకు ఉద్యోగులు తమ వేతనాల సవరణ, డిపాజిట్లపై వడ్డీరేట్లు పెంచాలని, ఎన్‌పీఏల రికవరీ, కఠిన చట్టాలు తేవాలని పలు డిమాండ్లు తెరమీదకు తెచ్చాయి. 

బ్యాంకింగ్‌ రంగంలో.. 5 బ్యాంకింగ్‌ యూనియన్లు, కోఆపరేటివ్‌, గ్రామీణ బ్యాంకులతోపాటు.. జనరల్‌ ఇన్సూరెన్స్‌ ఉద్యోగులు సైతం సమ్మెలో పాల్గొంటున్నారు. సమ్మె ప్రభావం ఖాతాదారులమీద పడకుండా జాగ్రత్తలు తీసుకున్నాయి వివిధ బ్యాంకులు డిజిటల్‌ ట్రాన్సాక్షన్స్‌ యథావిధిగా నడుస్తాయని... ఏటీఎంల్లో సరిపడా క్యాష్‌ ఉంచామంటున్నారు బ్యాంక్‌ అధికారులు.

సమ్మె సందర్భంగా విజయవాడ పండిట్ నెహ్రు బస్ స్టేషన్ వద్ద ఉద్రిక్తత చోటుచేసుకుంది. జాతీయ రహదారిపై ఆందోళనకి దిగిన వామపక్ష పార్టీలు నేతలను పోలీసులు అడ్డుకుంటున్నారు. వామపక్ష, మైనారిటీ సంఘాల నేతలను పోలీసులు అదుపులోకి తీసుకున్నారు. దీంతో ట్రాఫిక్ భారీగా నిలిచిపోయింది. 

పోలీసుల అక్రమ అరెస్టులను సిపిఐ రాష్ట్ర కార్యదర్శి రామకృష్ణ ఖండించారు. శాంతియుతంగా నిరసన వ్యక్తం చేస్తుంటే పోలీసులు అత్యుత్సాహం ప్రదర్శిస్తున్నారని ఆయన మండిపడ్డారు. ఎన్ఆర్సీ, సీఏఏ బిల్లులను రద్దు చేయాలని, కేంద్ర ప్రభుత్వం అవలంబిస్తున్న ప్రజా వ్యతిరేక విధాన వల్లే ఈరోజు భారత్ బంద్ చేపట్టామన్నారు రామకృష్ఱ. ఈ బంద్ కు బెజవాడలోని వర్తక, వాణిజ్య, విద్యా సంస్థలు స్వచ్ఛందంగా  మద్దతు పలుకుతున్నాయి. 

ఇరాక్ రాజధాని బాగ్దాద్ లో డ్రోన్ దాడిలో మరణించిన ఇరాన్‌ జనరల్‌ ఖాసీం సులేమానీ అంత్యక్రియలు ఆయన స్వస్థలం కెర్మన్ అశ్రునయనాల మధ్య జరిగాయి. ఈ అయితే ఈ అంత్యక్రియల సందర్భంగా తొక్కిసలాట జరిగినట్టు ఇరాన్ ఛానెళ్లు తెలిపాయి. ఈ తొక్కిసలాట కారణంగా 35 మందికి మరణించారు. 50 మంది వరకూ గాయపడినట్టు ఇరాన్‌ ప్రభుత్వ చానల్‌ తెలిపింది. 

సులేమానీ స్వస్థలం కెర్మన్‌లో అంత్యక్రియలకు లక్షలాదిమంది తరలి వచ్చారు. దీంతో అక్కడ శాంతిభద్రతల సమస్య ఏర్పడింది. దీంతో తొక్కిసలాట చోటుచేసుకున్నట్టుగా తెలుస్తోంది. ఇందుకు సంబంధించిన వీడియోలను కొందరు ఆన్‌లైన్‌లో పోస్ట్‌ చేశారు. అంతిమయాత్రలో పాల్గొన్నవారు రోడ్లపై ఇరుక్కుపోయారు. వీరిలో కొందరు తమను కాపాడాలని కోరారు.

కొందరు ఊపిరాడక ప్రాణాలు వదిలారు. సులేమానీ అంతిమయాత్రలో ఇరాన్‌ అధ్యక్షుడు హసన్‌ రౌహానీ సహా సుప్రీం లీడర్‌ అయాతుల్లా అలీ ఖమేనీ పాల్గొన్న అమెరికాపై ప్రతీకారం తప్సదన్నారు.  లక్షలాదిగా తరలివచ్చిన ప్రజలు అమెరికాకు వ్యతిరేకంగా నినాదాలు చేశారు. అమెరికా తగిన మూల్యం చెల్లించుకోక తప్పదన్నారు. ఇరానీయులు ట్రంప్ తలకు వెల కట్టింది.

అమెరికా అధ్యక్షుడు డోనాల్డ్ ట్రంప్‌ను చంపినవారికి రూ. 575 కోట్లు ఇస్తామని ప్రకటించింది. ఇరాన్ జనాభా 8 కోట్లని… ట్రంప్ ను హతమార్చిన వారికి ప్రతి ఇరాన్ పౌరుడు తన వాటాగా ఒక డాలరును ఇస్తాడని ఇరాన్ తెలిపింది. సులేమానీ అంతిమయాత్ర జరుగుతున్న సమయంలో ఆ దేశ అధికార వార్తా సంస్థ ఈ ప్రకటనను ప్రసారం చేసింది. మరోవైపు తమ దేశం నుంచి అమెరికా బలగాలు వెంటనే వెళ్లిపోవాలని ఇరక్ పార్లమెంటు తీర్మానం చేసింది. ఈ తీర్మానాన్ని ట్రంప్ కొట్టిపారేశారు. ఇరాక్ లో సైనిక స్థావరాల కోసం ఎంతో ఖర్చు చేశామన్నారు. అదంతా చెల్లిస్తే బలగాలు ఉపసంహరిస్తామన్నారు.

ఢిల్లీలోని పాటియాలా కోర్టు సంచలన నిర్ణయం ప్రకటించింది. నిర్భయ కేసులో నలుగురు నిందితులను ఈనెల 22వ తేదీన ఉదయం 7 గంటలకు ఉరితీయడానికి డెత్ వారెంట్ జారీచేసింది. నలుగురు నిందితులను ఉరి తీసేందుకు కోర్టు అంగీకారం తెలిపింది. ఏడేళ్ళ తర్వాత నిర్భయకు న్యాయం జరగనుంది. దేశవ్యాప్తంగా సంచలనం కలిగించిన నిర్భయ కేసులో నలుగురు నిందితులకు త్వరలో ఉరి అని వార్తలు నిజం అవుతున్నాయి. 

నిర్భయ కేసులో నలుగురు నిందితులను వెంటనే ఉరితీయాలని పాటియాలా హౌస్ కోర్టులో పిటిషన్ వేశారు నిర్భయ తల్లి. నిర్భయ కేసులో దోషులు పవన్ గుప్తా, ముఖేశ్ సింగ్, అక్షయ్ ఠాకూర్, వినయ్‌‌లు నలుగురికీ వెంటనే ఉరిశిక్ష అమలు చేయాలంటూ నిర్భయ తల్లి కోర్టుని కోరారు. నిర్భయ తల్లి పిటిషన్ పై విచారణ జరిపిన కోర్టు ఈ మేరకు డెత్ వారెంట్ జారీచేసింది. వీరి మరణశిక్షకు వ్యతిరేకంగా దాఖలైన పిటిషన్‌ను సుప్రీంకోర్టు కొట్టివేయడంతో పాటియాలా కోర్టు దోషులకు వ్యతిరేకంగా డెత్ వారెంట్లు జారీ చేసింది.

దేశవ్యాప్తంగా సంచలనం కలిగించిన నిర్భయ కేసులో నలుగురు నిందితులకు త్వరలో ఉరి అని వార్తలు వస్తున్నా.. ఇంకా జాప్యం జరుగుతూనే వుంది. నలుగురు నిందితులను వెంటనే ఉరితీయాలని పాటియాలా హౌస్ కోర్టులో పిటిషన్ వేయనున్నారు నిర్భయ తల్లి. నిర్భయ కేసులో దోషులు పవన్ గుప్తా, ముఖేశ్ సింగ్, అక్షయ్ ఠాకూర్, వినయ్‌‌లు నలుగురికీ వెంటనే ఉరిశిక్ష అమలు చేయాలంటూ నిర్భయ తల్లి డిమాండ్ చేస్తున్న సంగతి తెలిసిందే.

మరణశిక్షకు వ్యతిరేకంగా దాఖలైన పిటిషన్‌ను సుప్రీంకోర్టు కొట్టివేసింది. ఈ నేపథ్యంలో దోషులకు వ్యతిరేకంగా డెత్ వారెంట్లు జారీ చేయడంపై పాటియాలా హౌస్ కోర్టు విచారణ జరపనుంది. దీంతో కోర్టును ఆశ్రయించిన నిర్భయ తల్లి దోషులకు త్వరగా ఉరిశిక్ష అమలు చేయాలని కోర్టును అభ్యర్థించారు. నిర్భయ కేసులో ఒక్కరే ప్రత్యక్ష సాక్షి ఉన్నారంటూ దోషి పవన్ గుప్తా తండ్రి దాఖలు చేసిన పిటిషన్‌ను కోర్టు నిన్న కొట్టివేసింది. దీంతో త్వరలో నిర్భయ దోషులకు ఉరి శిక్ష అమలుచేసే అవకాశాలు కన్పిస్తున్నాయి. 

దేశరాజధాని ఒకవైపు చలితో వణికిపోతోంది. సీఏఏ నిరసనలు, జేఎన్ యూ ఘటనలతో అట్టుడికిపోతోంది. ఈ నేపథ్యంలో ఎన్నికల సంఘం మరింత వేడిని రాజేసింది. దేశ రాజధాని ఢిల్లీ అసెంబ్లీ ఎన్నికలకు సిద్ధం అయింది. ఎన్నికల సంఘం నగారా మోగించడంతో పార్టీలు తమ అస్త్రశస్త్రాలకు పదును పెడుతున్నాయి. ఎన్నికల షెడ్యూల్‌ ప్రకారం 70 అసెంబ్లీ స్థానాలకు జనవరి 14న నోటిఫికేషన్‌ విడుదల కానుంది.

ఫిబ్రవరి 8న పోలింగ్‌, ఫిబ్రవరి 11న ఎన్నికల ఫలితాలను వెల్లడిస్తారు. సమయం తక్కువగా ఉండడంతో ఎన్నికలు అన్నీ ఒకే విడతలో నిర్వహిస్తామని ఈసీ ప్రకటించింది. సోమవారం నుంచే ఎన్నికల కోడ్‌ అమల్లోకి వచ్చింది. ఫిబ్రవరి 22తో ఢిల్లీ అసెంబ్లీ గడువు ముగియనుంది. ఈ గడువుకు ముందే ఎన్నికల తంతు ముగియనుంది. అధికార ఆమ్‌ ఆద్మీ పార్టీతో పాటు బీజేపీ, కాంగ్రెస్‌ ఈ ఎన్నికలను ఎంతో ప్రతిష్టాత్మకంగా భావిస్తున్నాయి. 

మరిన్ని సంక్షేమ పథకాలు, ఉచిత తాయిలాలపై నమ్మకంతో మరోసారి అధికారంలోకి రావాలని ఆప్‌ ప్రయత్నిస్తోంది. అయితే గత అనుభవాల దృష్ట్యా బీజేపీ, కాంగ్రెస్‌ పరువు నిలుపుకునేందుకు  తీవ్రంగా ప్రయత్నిస్తున్నాయి.

గత ఎ‍న్నికల్లో రికార్డు స్థాయిలో 67 స్థానాలను దక్కించుకుని అరవింద్‌  కేజ్రీవాల్‌ తన సత్తా చాటారు. దేశ రాజధాని కావడంతో ఈ ఎన్నికల కోసం దేశ ప్రజలంతా ఎంతో ఆసక్తిగా, ఉత్కంఠగా ఎదురుచూస్తున్నారు. బీజేపీ మాత్రం ఎలాగైనా విజయం సాధించాలని శతవిధాలా ప్రయత్నాలు చేస్తోంది. ఇప్పటికే మహారాష్ట్ర, జార్ఖండ్ చేజారిపోయాయి. దీంతో ఢిల్లీ పీఠంపై కమలనాథులు కన్నేశారు.

మరోవైపు ఎన్నికలకు ప్రముఖ ఎన్నికల వ్యూహకర్త ప్రశాంత్ కిషోర్‌ వ్యూహాత్మకంగా ముందుకెళుతున్నారు. ఎన్నికలకు సిద్ధంగా ఉండండి అంటూ పీకె తన క్యాడర్ కు  పిలుపునిచ్చారు. ‘ప్రజల బలం చూసేందుకు ఫిబ్రవరి 11న సిద్ధంగా ఉండండి’ అంటూ ట్వీట్‌ చేశారు. ఢిల్లీ సీఎం, ఆప్‌ కన్వీనర్‌ అరవింద్‌ కేజ్రీవాల్‌కు ఆయన ఎన్నికల సలహాదారుడిగా వ్యవహరిస్తున్న విషయం తెలిసిందే.

ఆప్‌ విజయానికి దోహదపడేందుకు ఇప్పటికే ప్రశాంత్‌ కిషోర్‌ బృందం గ్రౌండ్‌ వర్క్‌ను ప్రారంభించింది. ప్రచారం, పథకాలు, అభ్యర్థుల ఎంపిక వంటి కీలక అంశాల్లో కేజ్రీవాల్‌కు సలహాలిస్తున్న సంగతి తెలిసిందే. ఇటు కేజ్రీవాల్ కూడా విజయంపై ధీమాగా వున్నారు.

గడిచిన ఐదేళ్ల కాలంలో తమ ప్రభుత్వం చేసిన అభివృద్ధి, సంక్షేమ పథకాలను ప్రజలకు వివరించి ఓట్లు అడుగుతామన్నారు. ఢిల్లీలోని ప్రతి గడపగడపకు తమ ప్రచారాన్ని చేరవేస్తామని అన్నారు. 

ప్రశాంత్ కిషోర్ వ్యూహంతో ఏపీలో జగన్ సీఎం అయ్యారు. అదే విధానంతో కేజ్రీవాల్ కూడా విజయం సాధిస్తారని పీకే ధీమాతో వున్నారు. ఈ ఎన్నికలు ప్రశాంత్ కిషోర్ కి ఇజ్జత్ కా సవాల్ కానున్నాయి. 

ఢిల్లీ జెఎన్‌యూలో అర్థరాత్రి అలజడి రేగింది. ఢిల్లీ జేఎన్‌యూలో.ముసుగులు ధరించి క్యాంపస్ లోకి వచ్చిన 50 మంది అగంతుకులు విచక్షణా రహితంగా విద్యార్ధులు, ప్రొఫెసర్లపై రాళ్ళు, కర్రలతో దాడి చేశారు. దీంతో వారు తీవ్రంగా గాయాల పాలయ్యారు. వర్సిటీ ఆస్తులను ధ్వంసం చేశారు.

అర్థరాత్రి సమయంలో ప్రశాంతంగా ఉండే జెఎన్ యూలోకి ముసుగులు ధరించి కర్రలు, రాడ్‌లతో విద్యార్థులు, టీచర్లపై దాడి చేయడంతో జేఎన్‌యూఎస్‌యూ ప్రెసిడెంట్‌ ఆయిషీ ఘోష్‌ సహా 18 మందికి తీవ్ర గాయాలయ్యాయి. గాయపడ్డవారిని ఎయిమ్స్‌లో చేర్పించి చికిత్స అందిస్తున్నారు.

ఈ దాడి ఘటనపై ఏబీవీపీ, జేఎన్‌యూఎస్‌యూల పరస్పర ఆరోపణలు చేసుకుంటున్నాయి. దాదాపు రెండు గంటల పాటు కర్రలు, ఇనుప రాడ్లతో దుండగులు వర్సిటీలో భయోత్పాతం సృష్టించారు.

వర్శిటీలో తాజా పరిస్థితిని సమీక్షించిన హోంమంత్రి అమిత్‌ షా పోలీసులను అప్రమత్తం చేశారు. బాధ్యులపై కఠినచర్యలు తీసుకోవాలని ఆదేశించారు. మరోవైపు ఎయిమ్స్‌లో విద్యార్థులను పరామర్శించారు కాంగ్రెస్ ప్రధాన కార్యదర్శి ప్రియాంక గాంధీ. కేంద్రప్రభుత్వానికి వ్యతిరేకంగా ఉద్యమాలు చేస్తున్నందువల్లే విద్యార్ధులపై బీజేపీ అనుబంధ సంఘాలు దాడులకు తెగబడుతున్నాయని కాంగ్రెస్ మండిపడింది. 

ఇదిలా ఉంటే.. జేఎన్‌యూఎస్‌యూనే ఈ దాడికి పాల్పడిందని, ఈ దాడిలో తమ సభ్యులు పాతిక మందికి గాయాలయ్యాయని, మరో 11 మంది జాడ తెలియడం లేదని ఏబీవీపీ ఆరోపించింది. వామపక్ష విద్యార్థి సంస్థలు ఎస్‌ఎఫ్‌ఐ, ఏఐఎస్‌ఏ, డీఎస్‌ఎఫ్‌ విద్యార్థులు ఈ దాడుల వెనుక ఉన్నారని ఆరోపించింది.

మరోవైపు.. ఇది ఏబీవీపీ గూండాల పనేనని, ముసుగులు వేసుకుని లాఠీలు, ఇనుప రాడ్‌లతో వారే ఈ దాడికి తెగబడ్డారని జేఎన్‌యూఎస్‌యూ పేర్కొంది. ఏబీవీపీ వారు చేసిన రాళ్లదాడిలోనే తమ విద్యార్థి సంఘం ప్రెసిడెంట్‌ ఘోష్‌ తీవ్రంగా గాయపడ్డారని ఆరోపించింది. 

దాడికి భయపడి హాస్టళ్లలోని తమ రూముల్లో దాక్కున్నామని పలువురు విద్యార్థులు తెలిపారు. ముఖం కనిపించకుండా కప్పుకుని, హాకీ స్టిక్స్‌తో ఒక భవనంలోపల తిరుగుతున్న కొందరు దుండగుల వీడియోను పలు వార్తాచానెళ్లు ప్రసారం చేశాయి.  ఈదాడికి పాల్పడిన దుండగులను అదుపులోకి తీసుకునే ప్రయత్నాలు జరుగుతున్నాయని వర్సిటీ రిజిస్ట్రార్‌ ప్రమోద్‌ కుమార్‌ ఒక ప్రకటన విడుదల చేశారు. 

ఈఘటనను పలువురు కేంద్రమంత్రులు, మాజీ విద్యార్ధులు తీవ్రంగా ఖండించారు. జేఎన్‌యూ మాజీ విద్యార్థులు, కేంద్రమంత్రులు నిర్మలా సీతారామన్, ఎస్‌ జైశంకర్‌ జేఎన్‌యూలో జరిగిన హింసాత్మక ఘటనలను ఖండించారు. ఢిల్లీ పోలీసులు, జేఎన్‌యూ అధికారుల నుంచి మానవ వనరుల మంత్రిత్వ శాఖ వివరణ కోరింది.

జేఎన్‌యూలో చోటుచేసుకున్న హింసాత్మక ఘటనలు దారుణమని, పరిస్థితిని నిశితంగా పరిశీలిస్తున్నామని ఢిల్లీ లెఫ్ట్‌నెంట్‌ గవర్నర్‌ అనిల్‌ బైజాల్‌ అన్నారు. జేఎన్‌యూ ఘటనపై ఢిల్లీ సీఎం, ఆప్‌ నేత అర్వింద్‌ కేజ్రీవాల్‌ ఆందోళన వ్యక్తం చేశారు. తక్షణమే తగిన చర్యలు తీసుకోవాలని లెఫ్ట్‌నెంట్‌ గవర్నర్‌ను కోరానన్నారు. ఇటు జేఎన్ యూ ఘటనకు నిరసనగా హైదరాబాద్ లోని సెంట్రల్ వర్శిటీలో విద్యార్దులు ఆందోళనకు దిగారు. అర్ధరాత్రి రోడ్డుపైకి వచ్చి నిరసన తెలిపారు విద్యార్థులు. 

కేంద్ర ప్రభుత్వం అనుసరిస్తున్న కార్మిక చట్టాలను, బ్యాంకింగ్ సంస్కరణలను బ్యాంకు యూనియన్లు వ్యతిరేకిస్తున్నాయి. ఈ మేరకు కీలక నిర్ణయం తీసుకున్నాయి. నరేంద్ర మోడీ ప్రభుత్వం నిర్వహిస్తున్న విధి విధానాలకు వ్యతిరేకంగా బ్యాంక్‌‌లు ఈనెల8న బంద్ నిర్వహిస్తున్నాయి. ఈ సమ్మె ప్రభావం దేశవ్యాప్తంగా బ్యాంకులపై పడనున్నాయి. ఏటీఎంలు కూడా బంద్ చేయనున్నారు. 

కేంద్ర ట్రేడ్ యూనియన్లు చేపడుతోన్న ఆల్‌‌ ఇండియా సమ్మెలో పాల్గొనాలని బ్యాంక్ యూనియన్లు కూడా నిర్ణయించాయి. ఈ నెల 8న  విధులకు రావొద్దని బ్యాంక్‌‌ యూనియన్లు ఉద్యోగులకు సూచించాయి. 

ఎవరైనా బ్యాంకుల్లో డిపాజిట్లు చేసుకోవాలన్నా, డబ్బు డ్రా చేసుకోవాలన్నా ఎవరైనా మంగళవారం రోజువరకే వారి పనులను పూర్తి చేసుకోవాలని బ్యాంకింగ్ వర్గాలు తెలుపుతున్నాయి. 8వ తేదీన న బ్యాంకుల్లోని అన్ని బ్రాంచ్‌‌ల్లో జరిగే సాధారణ బ్యాంకింగ్ సేవలన్నీ నిలిచిపోనున్నాయి.

ఆన్‌లైన్‌ ‌బ్యాంకింగ్ సేవలు మాత్రం ఈ సమ్మెకు ప్రభావితం కావు. ఈ సమ్మె ప్రభావం ఏటీఎం సేవలపై కూడా చూపనున్నట్టు బ్యాంకింగ్ వర్గాలు తెలిపాయి. బంద్ రోజు ఎలాంటి క్లరికల్ వర్క్‌‌ను చేపట్టవద్దని తమ సభ్యులను ఆదేశించినట్టు ఆల్‌‌ ఇండియా బ్యాంక్ ఆఫీసర్స్ కాన్ఫిడరేషన్ జనరల్ సెక్రటరీ సౌమ్య దత్తా వెల్లడించారు.

ఈ సమ్మెకు అఖిల భారత బ్యాంక్‌ ఉద్యోగుల సంఘం (ఏఐబీఈఏ), బ్యాంక్‌ ఎంప్లాయిస్‌ ఫెడరేషన్‌ ఆఫ్‌ ఇండియా (బీఈఎఫ్‌ఐ) వంటి ఉద్యోగ సంఘాలు మద్దతు పలికాయి. ఈ సమ్మెకు 10 సెంట్రల్‌ ట్రేడ్‌ యూనియన్లు మద్దతునిస్తున్నట్లు ఏఐబీఈఏ ప్రధాన కార్యదర్శి సీహెచ్‌ వెంకటాచలం తెలిపారు.

ఉద్యోగ భద్రత, ఉపాధి కల్పనలకు పెద్దపీట వేయాలని, కార్మిక చట్టాల్లో సవరణలు, బ్యాంకుల విలీనాలను ఆపాలని కోరుతున్నారు. ప్రభుత్వ రంగ బ్యాంకు యాజమాన్యాలు మాత్రం వినియోగదారులకు ఎలాంటి ఇబ్బందులు లేకుండా చర్యలు చేపట్టాయి. 

పశ్చిమబెంగాల్లో ఓ రైల్వే స్టేషన్లో ప్రమాదం జరిగింది. హౌరా-ఢిల్లీ మార్గంలో ఉన్న బర్ధమాన్‌ రైల్వే స్టేషన్‌ భవనంలోని కొంత భాగం శనివారం రాత్రి అకస్మాత్తుగా కుప్పకూలింది. ఈ ఘటనలో ఐదుగురు గాయపడగా, వారిలో ఒకరి పరిస్థితి విషమంగా ఉంది. రంగంలోకి దిగిన రెస్క్యూ టీం.. వెంటనే క్షతగాత్రులను స్ధానిక ఆస్పత్రికి తరలించి చికిత్స అందిస్తున్నారు. అయితే మరికొందరు కూడా భవనం శిథిలాల కింద చిక్కుకుపోయినట్లు భావిస్తున్నారు.

ఈ ఘటన జరిగిన టెన్షన్లో వుండగానే మరికాసేపటికే ఆ భవనంలోని మరో భాగం కూడా కూలింది. అయితే అప్పటికే రంగంలోకి దిగిన రైల్వే పోలీసులు.. ప్రయాణికులను ఘటనా స్థలి నుంచి దూరంగా పంపించారు.

దీంతో ఎవరికీ ఎలాంటి గాయాలు కాలేదు. స్టేషన్‌ భవనంలోని రెండు అంతస్తుల్లో రిపేరింగ్‌ జరుగుతుండగా ఈ ఘటన చోటుచేసుకుంది. దీనిపై రైల్వే పోలీసులు విచారణ జరుపుతున్నారు. రైల్వే అధికారుల తీరుపై ప్రయాణికులు మండిపడుతున్నారు. 

పర్యాటకులకు మలేషియా ప్రభుత్వం గుడ్ న్యూస్ చెప్పింది. తమ దేశానికి వచ్చే భారతీయులకు బంపర్ ఆఫర్ ఇచ్చింది. సాధారణంగా మనం విదేశాలకు వెళ్లాలంటే పాస్‌పోర్టుతో పాటు వీసా తీసుకోవాలి. పాస్ పోర్టు వెంటనే వస్తుంది కానీ వీసా కోసం నానా అగచాట్లు పడాలి. కొన్నిసార్లు వీసా ఆలస్యం కావడం వల్ల ప్రయాణాలు కూడా రద్దవుతాయి. ఇలాంటి ఇబ్బంది లేకుండా మలేషియా ప్రభుత్వం భారతీయులకు అద్భుతమయిన అవకాశం ఇచ్చింది.

భారతీయులకు కొత్త సంవత్సరం కానుకగా మలేషియా వీసాలేకుండానే తమదేశంలో విహరించే అవకాశం కల్పించింది. తమ దేశానికి వచ్చే టూరిస్టు భారతీయులు ఇకపై ఎటువంటి వీసా తీసుకోవాల్సిన అవసరం లేదని స్పష్టం చేసింది. ఇదివరకు ఉన్న వీసా నిబంధనను రద్దు చేస్తూ అక్కడి ప్రభుత్వం తాజాగా ఉత్తర్వులు జారీ చేయడంతో పర్యాటకులు పండుగ చేసుకుంటున్నారు. 

వీసా లేకుండా 2020 చివరి వరకు తమ దేశంలో ఉన్న పర్యాటక ప్రాంతాల్ని చూడవచ్చు. దీంతో మలేషియాకు సులభంగా వెళ్లే అవకాశం భారతీయులకు కలుగుతుంది. అయితే అందుకోసం కొన్ని పద్దతులు పాటించాల్సి వుంటుందని మలేషియా ప్రభుత్వం తెలిపింది.

ముందుగా ఆన్‌లైన్ ద్వారా మొదట పేరును నమోదు చేసుకోవాల్సి వుంటుంది. ఈ పేరు నమోదు ప్రక్రియ పూర్తయ్యాక మూడు నెలలోపు అక్కడికి వెళ్ళాలి. వెళ్లిన రోజు నుంచి 15 రోజులు మాత్రమే అక్కడ పర్యటించే అవకాశం ఉంటుంది. ఇంకోసారి మలేషియా చుట్టిరావాలంటే మాత్రం 45 రోజుల తర్వాతే అవకాశం ఉంటుంది. 

మలేషియా తీసుకువచ్చిన ఈ తాజా నిబంధనను పర్యాటకులు స్వాగతిస్తున్నారు. పర్యాటక రంగాన్ని అభివృద్ధి చేయడానికి ఈ విధానం అమలు చేసినట్లు అధికారులు వెల్లడిస్తున్నారు. వీసా నిబంధనల ఎత్తివేయడంతో మలేషియాకు తరచూ వెళ్లేవారికి సౌలభ్యంగా వుంటుంది. ఈ ఏడాది సమ్మర్ లో మీరు మలేషియా వెళ్లాలనుకుంటే మాత్రం ఇది మంచి అవకాశం. ఒకసారి పేరు నమోదుచేసుకుని మలేషియాలో తిరిగేసి రండి.  

కేంద్రప్రభుత్వం అమలు చేస్తున్న వివిధ పథకాలలో రేషన్ షాపులు ఒకటి. జాతీయ పౌరపంపిణీ విధానం ద్వారా రాష్ట్రాలతో కలిసి కేంద్రం బియ్యం, గోధుమలు, పామాయిల్ పేదలకు అందిస్తూ వుంటుంది. గతంలో రాష్ట్రాల్లో జిల్లాల వారీగా రేషన్ షాపుల్లో సరకులు అందించేవారు. కూలీలు, ఇతర ఉద్యోగులు ఇతర ప్రాంతాలకు వెళితే రేషన్ సరుకులు తీసుకోవడం ఇబ్బందిగా వుండేది.

ఈ నేపథ్యంలో రేషన్ కార్డుల పోర్టబిలిటీ ప్రవేశపెట్టారు. దీని ద్వారా జిల్లాల పరిధిలో ఏ రేషన్ షాపులోనైనా రేషన్ పొందే సౌలభ్యం లభించింది. ఇప్పుడు ఈ పథకంలో మరిన్ని మార్పులు చోటుచేసుకున్నాయి. 

న్యూ ఇయర్ సందర్భంగా కేంద్రం ప్రభుత్వం ప్రతిష్టాత్మకంగా చేపట్టిన వన్ నేషన్ వన్ రేషన్ ప్రారంభించింది. ఈ ఏడాది జనవరి 1 నుంచి ఒకదేశం- ఒకే రేషన్ కార్డు అమలులోకి వచ్చింది. 

ఇది ఇప్పుడు దేశమంతా ప్రారంభమయింది. ఇంతకుముందే ఆంధ్రప్రదేశ్, తెలంగాణ రాష్ట్రాలతో సహా దేశంలోని 12 రాష్ట్రాల్లో ప్రారంభించింది. అయితే గత సంవత్సరం నవంబర్‌లోనే ఈ విధానాన్ని తెలుగు రాష్ట్రాలు ప్రారంభించాయి. ఆంధ్రప్రదేశ్, తెలంగాణ రాష్ట్రాల్లో ప్రజలు రేషన్ ఎక్కడైనా తీసుకునే అవకాశం కలిగింది. 

ఈ సదుపాయం ఇప్పుడు కేంద్రం అన్ని రాష్ట్రాలకు వర్తింప చేసింది. ప్రస్తుతం ఆంధ్రప్రదేశ్ తెలంగాణతో సహా హరియాణ, రాజస్ధాన్‌, కర్ణాటక,మధ్యప్రదేశ్‌, గోవా, జార్ఖండ్‌, త్రిపుర, గుజరాత్‌, మహారాష్ట్రల్లో ఈ సదుపాయం అమల్లోకి వచ్చింది.

రేషన్ లబ్ధిదారులు ఏరాష్ట్రంలో ఉన్న తమ రేషన్‌ వాటాను తీసుకోవచ్చు. రేషన్ కార్డులను ఆధార్ కార్డుతో అనుసంధానం చేయడంతో  ఈ సౌలభ్యం లభించింది. ఒన్‌ నేషన్‌..ఒన్‌ రేషన్‌ 2020 జూన్‌ నాటికి దేశంలోని అన్ని రాష్ట్రాలకు అనుసంధానిస్తామని కేంద్రం ప్రకటించింది. ఈ సదుపాయం కింద కొత్త రేషన్ కార్డులు రూపొందించనున్నాయి రాష్ట్ర ప్రభుత్వాలు. జూన్‌ 2020 నుంచి కొత్త రేషన్‌ కార్డులు అందుబాటులోకి రానున్నాయి.