పుల్వామాలో ఆత్మాహుతి దాడి చేసి సిఆర్‌పిఎఫ్ జవాన్లను బలితీసుకున్న అదిల్ అహ్మద్‌ గురించి కొన్ని ఆసక్తికరమైన విషయాలు వెలుగులోకి వచ్చాయి. తన కొడుకు ఉగ్రవాదిగా మారడానికి పోలీసులే కారణమని అతడి తండ్రి గులామ్ హసన్‌దర్ తెలిపారు. గతంలో వాళ్ళు చేసిన అవమానం తట్టుకోలేకే కక్ష పెంచుకుని ఉగ్రవాదిలా మారాడని ఆయన పేర్కొన్నారు.

‘‘స్కూల్‌లో చదువుతున్నప్పుడు అదిల్‌ని పోలీసులు అడ్డుకుని తీవ్రంగా కొట్టారు. ముక్కు నేల‌కు రాయించడమే కాకుండా జీపు చుట్టూ చక్కర్లు కొట్టించారు. ఆ వ్యవహారాన్ని అదిల్ తీవ్ర అవమానంగా భావించాడు. కారణం లేకుండా తనను ఎందుకు కొట్టారని మమ్మల్ని అడిగేవాడు. ఎప్పుడూ దీని గురించి ఆలోచిస్తూ... తీవ్ర మనోవేదనకు గురయ్యేవాడు. తనకు జరిగిన అవమానంపై కక్ష పెంచుకుని... ఉగ్రవాద సంస్థలో చేరాడు’’ అని అదిల్ తండ్రి వెల్లడించారు.

ఉగ్రవాద కార్యకలాపాలకు దూరంగా ఉండాలని తాము ఎన్నిసార్లు వారించినా అదిల్ తమ మాట వినలేదని, గతేడాదే అతడు తమకు దూరమయ్యాడని గులామ్ పేర్కొన్నారు. తమ కొడుకు ఇంత దారుణానికి ఒడిగడతాడని తాము అనుకోలేదని, ఈ దాడిలో ప్రాణాలు కోల్పోయిన జవాన్ల కుటుంబాలు అనుభవిస్తున్న బాధే తమకూ ఉందని ఆయన ఆవేదన వ్యక్తం చేశాడు.

పుల్వామా ఘటన దేశవ్యాప్తంగా ఆగ్రహాన్ని తెప్పించింది. అమరజవాన్లకు దేశం నివాళులర్పించింది. పుల్వామా దాడి ఘటన అనంతరం కేంద్ర హోంశాఖ ఆధ్వర్యంలో ఢిల్లీలో అఖిల‌ప‌క్ష స‌మావేశం జరిగింది. హోంమంత్రి రాజ్ నాథ్ సింగ్ అధ్యక్షతన జరిగిన భేటీలో ఒక తీర్మానం ఆమోదించారు. ముక్తకంఠంతో పుల్వామా ఉగ్రదాడిని అన్ని పార్టీలు తీవ్రంగా ఖండించాయి. పార్లమెంటరీ వ్యవహారాల శాఖ మంత్రి నరేంద్రసింగ్‌ తోమర్‌, హోంశాఖ కార్యదర్శి రాజీవ్‌ గౌబ, కాంగ్రెస్‌ నేత వేణుగోపాల్‌, నేషనల్‌ కాన్ఫరెన్స్‌ నేత ఫరూఖ్‌ అబ్దుల్లా, బీఎస్పీ నేత సతీశ్‌ చంద్ర మిశ్రా, ఎల్‌జేపీ నేత రాంవిలాస్‌ పాశ్వాన్‌, సీపీఎం, సీపీఐ నేతలు హాజరయ్యారు. టీడీపీ తరఫున ఎంపీ రామ్మోహన్‌నాయుడు, టీఆర్ఎస్ నుంచి ఎంపీ జితేందర్‌రెడ్డి, పార్టీల ముఖ్యనేతలు పాల్గొన్నారు.

ఉగ్రదాడికి సంబంధించిన సమాచారాన్ని, ప్రభుత్వం ఇప్పటిదాకా తీసుకున్న చర్యల్ని ఈ భేటీలో ప్రభుత్వం వివరించింది. యాక్షన్ ప్లాన్‌ను స‌మావేశంలో విప‌క్షాలకు కేంద్రహోంమంత్రి రాజ్ నాథ్ వివ‌రించారు. ఉగ్రవాదాన్ని అంత‌మొందించేందుకు ప్రభుత్వం ఏ చర్యలు తీసుకున్నా తమ మద్ధతు ఉంటుంది విపక్షాలు తెలిపాయి. అమరులైన 40 మంది సీఆర్పీఎఫ్ జవాన్ల ఆత్మకు శాంతి చేకూరాలని నివాళులర్పించారు. అమర జవాన్ల కుటుంబాలకు ప్రగాఢ సానుభూతి తెలిపారు. దేశసమగ్రత, దేశ సార్వభౌమత్వం, భద్రత విషయంలో రాజీ పడవద్దని పార్టీలు కేంద్రాన్ని కోరాయి. 

అఖిల‌ప‌క్ష భేటీ అనంత‌రం కాంగ్రెస్ నేత గులాంన‌బీ ఆజాద్ మాట్లాడారు. దేశం మొత్తం ఇవాళ ఉగ్రదాడిపై ప్రతీకారం తీర్చుకోవాల‌న్న కోపంతో ఉంద‌ని ఆజాద్ అన్నారు. ఇలాంటి విపత్కర పరిస్థితుల్లో భద్రతా దళాలకు మేం అండగా ఉంటాం. యావత్ దేశం మీకు అండగా ఉంటుంది. ప్రభుత్వంతో మాకు ఎన్నో భేదాభిప్రాయాలు ఉండొచ్చు. కానీ దేశ రక్షణ, భద్రత కోసం మేం ప్రభుత్వంతో కలిసి పనిచేస్తాం. ఉగ్రవాదాన్ని నిర్మూలించేందుకు ప్రభుత్వం తీసుకునే చర్యలకు పూర్తి మద్దతిస్తాం’ తామంతా జవాన్లకు అండగా నిలబడ్డామన్నారు. 1947నుంచి మొట్టమొద‌టిసారి ఇంత‌పెద్ద సంఖ్యలో ఓ దాడిలో భ‌ద్రతాబ‌ల‌గాలు ప్రాణాలు కోల్పోయారు’’ అని ఆజాద్ అన్నారు. 

ఈ సమావేశంలో సీమాంతర ఉగ్రవాదం దేశానికి ప్రమాదకరం అనే భావన వ్యక్తమయింది. అయితే ఈ విషయంపై చర్చించేందుకు ప్రధాని మోదీ అన్ని రాజకీయ పార్టీల అధ్యక్షులతో సమావేశమైతే బాగుంటుందని ఆజాద్‌ అన్నారు. ఆజాద్ అభిప్రాయంతో అన్నిపార్టీలు ఏకీభవించాయి. ప్రతీకార దాడులు చేసేందుకు ఏకాభిప్రాయం సాధించేందుకు ప్రభుత్వం ముందుగానే ఇలాంటి అఖిలపక్ష సమావేశాన్ని నిర్వహించడం ఇదే మొదటిసారి. 

పాక్ ముష్కర మూకలు గోతికాడ నక్కలాగా కాచుకుని కూర్చుంటారు. వారికి చిన్న అవకాశం దక్కినా వదులుకోరు. జమ్ముకాశ్మీర్‌లోని పుల్వామాలో జరిగిన ఉగ్రదాడి ఇలాంటిదే. ఎక్కువమంది సైనికులు ఈ దారి వెంట వెళతారని సమాచారం జైషే మహ్మద్ ఉగ్రవాదులకు తెలిసింది. దీంతో ఒక పథకం రచించారు. మానవబాంబు రూపంలో 40 మంది సైనికులను పొట్టనబెట్టుకున్నారు. ఈ సంఘటన ప్రపంచవ్యాప్తంగా కలకలం రేపింది. ఈ ఘటనతో జమ్ముకశ్మీర్ జాతీయ రహదారి జవాన్లకు అంత సేఫ్ కాదని తేలిపోయింది. 2013 నుంచి ఈ ప్రాంతంలోనే భారీగా దాడులు జరిగాయి. ఇప్పటివరకూ పుల్వామా సమీపంలోనే 11 అతిపెద్ద ఉగ్రదాడులు జరిగాయి. 58 మంది సైనికులు కన్నుమూశారు.

వాటిలో చాలా ఘటనలు శ్రీనగర్-దక్షిణ కశ్మీర్ రహదారి వెంటే జరిగాయని ఆర్మీ అధికారులు తెలిపారు. 2013లో రోడ్ ఓపెనింగ్ పార్టీ వద్ద జరిగిన దాడిలో ఒక జవాను మరణించగా, ఆ వెంటనే చోటుచేసుకున్న మరో దాడిలో ఇంకో జవాను చనిపోయారు. 2014లో ఆ రహదారి వెంట పెద్ద దాడులు ఏమీ చోటుచేసుకోలేదు. 2015లో జరిగిన ఘటనలో మాత్రం ఇద్దరు బీఎస్‌ఎఫ్ జవాన్లు, ఇద్దరు సీఆర్‌పీఎఫ్ జవాన్లు మరణించారు.

2016లో ముష్కరులు ఎంతోమంది సైనికులను చంపేశారు. ఒక ఘటనలో 13 మంది సైనికులు చనిపోగా, 2016 జూన్‌లో పాంపురలో సీఆర్‌పీఎఫ్‌ కాన్వాయ్ మీద మిలిటెంట్లు దాడి చేయడంతో 8 మంది జవాన్లు మరణించారు. 2017లో ఆ రహదారిపై జరిగిన దాడిలో సైనికులు మరణించనప్పటికీ, అమర్‌నాథ్ యాత్రికులు ఏడుగురు బలయ్యారు. 2018, జులై 14న ఉదంపూర్‌లో బీఎస్‌ఎఫ్ కాన్వాయ్ మీద మిలిటెంట్లు దాడి చేయడంతో ఇద్దరు సైనికులు అమరులయ్యారు. మరో 11 మంది తీవ్రంగా గాయపడ్డారు.

ఇదిలా ఉంటే సీఆర్‌పీఎఫ్ సైనికులకు ప్రమాదం పొంచి ఉందని తెలిసినప్పుడు విమానంలో తరలించవచ్చు. కానీ అధికారులు విమానాలను వినియోగించకపోవడం విమర్శలకు తావిస్తోంది. అంతమంది జవాన్లను ఒకేసారి ఎందుకు తరలిస్తున్నారని జమ్ముకశ్మీర్ మాజీ ముఖ్యమంత్రి మెహబూబా ముఫ్తీ ప్రశ్నించారు.

గురువారం సుమారు 2500 మంది సైనికులు ఒకేసారి 78 వాహనాల్లో జమ్మూ నుంచి బయలు దేరారు. వీరిని తరలించే ముందు ఆర్మీలో ఒక ఉన్నతాధికారి సైనికులను రహదారి మార్గంలో తరలించడం శ్రేయస్కరం కాదని సూచించారు. వారిని ఆకాశమార్గాన తరలించాలని కోరారు. కానీ అలా జరగలేదు. అధికారుల చిన్నపాటి నిర్లక్ష్యం, నిర్లిప్తత జవాన్ల పాలిట శాపమైంది. మున్ముందు ఇలాంటి సంఘటనలు జరగకుండా అధికారులు ఎక్కువ మంది జవాన్ల తరలింపులో విమానాల వినియోగం తప్పనిసరి చేయాలని ప్రజలు కోరుతున్నారు. 

తీవ్రవాదుల దుశ్చర్యపై దేశం యావత్తూ ఆగ్రహావేశాలతో అట్టుడికిపోతోంది. పుల్వామా దాడికి నిఘా వైఫల్యమే కారణమా అన్న ప్రశ్నలు ఉత్పన్నమవుతున్నాయి. ఈ ఘటనపై దర్యాప్తు కోసం జాతీయ భద్రతా దళం, జాతీయ దర్యాప్తు సంస్థలు రంగంలోకి దిగాయి. సీఆర్పీఎఫ్‌ కూడా విచారణకు ఆదేశించింది. ఉగ్రవాదుల దుశ్చర్యను ఖండిస్తూ దేశవ్యాప్తంగా పలు ప్రాంతాల్లో నిరసన ప్రదర్శనలు జరిగాయి. జమ్మూ నగరంలో నిరసనలు ఉద్రిక్తంగా మారాయి. మరోవైపు ఛాన్సిస్తే తుపాకీ పట్టి యుద్ధ రంగంలోకి దూకుతామని రిటైర్డు సైనికులు, వృద్ధులు సైతం కసిగా ఉన్నారు. 

ఇదే ఆవేశం సామాజికవేత్త అన్నా హజారేలోనూ కనిపించింది. 81ఏళ్ల వయసులోనూ ఆయన మళ్లీ ఆర్మీలోకి వచ్చేందుకు రెడీ అంటున్నారు. లోక్ పాల్ కోసం ఆరు రోజుల దీక్ష చేసి అనారోగ్యంతో మహారాష్ట్రలోని అహ్మద్‌‌నగర్ ఆసుపత్రిలో చికిత్స పొందుతున్న ఆయన పుల్వామా దాడిపై తీవ్రంగా స్పందించారు. అమరులైన జవాన్లకు సంతాపం తెలిపారు. శత్రువుపై పోరాడేందుకు వీర సైనికులకు సాయం చేసేందుకు తనకు కావాల్సినంత శక్తి ఉందని ఎప్పుడు రమ్మంటే అప్పుడు రావడానికి రెడీ అంటున్నారు. 

‘‘ఈ వయసులో నేను గన్ పట్టుకోలేను కానీ, స్టీరింగ్ పట్టే సత్తా ఉంది. దేశం కోసం పోరాడుతున్న జవాన్లకు అవసరమైన ఆయుధ సామగ్రి సరఫరా చేసేందుకు మిలటరీ ట్రక్కు నడుపుతాను’’ అంటూ ఆస్పత్రి బెడ్డుపైనుంచే  సందేశం ఇచ్చారు. ప్రస్తుతం సామాజికవేత్తగా ఎన్నో ఉద్యమాలు చేశారు అన్నా హజారే. గతంలో ఆయన ఆర్మీలో పనిచేశారు. 1960లో మిలటరీలో చేరారు. 1965లో పాక్‌పై జరిగిన యుద్ధంలో ఖేమ్ కరణ్ సెక్టార్‌లో ఆర్మీ డ్రైవర్‌గా సేవలందించారు. అన్నా హజారే సందేశానికి విశేష స్పందన లభిస్తోంది. అన్నాలాంటి స్ఫూర్తి అందరిలోనూ ఉండాలని, ముఖ్యంగా యువత దేశం కోసం త్యాగాలకు సిద్ధపడాలంటున్నారు. 

‘వందే భారత్’ ఎక్స్ ప్రెస్ పేరుతో ఎంతో బావుంది కదా. ఈ రైలు ఎక్కితే స్పీడ్ కూడా బాగుంటుంది. దేశంలో తొలి సెమీ హైస్పీడ్‌ రైలు ‘వందే భారత్‌’ ఎక్స్‌ప్రెస్‌ను ప్రధాని నరేంద్ర మోదీ పచ్చజెండా ఊపి ప్రారంభించారు. పుల్వామా ఉగ్రదాడి నేపథ్యంలో న్యూఢిల్లీ రైల్వేస్టేషన్‌లో ఈ కార్యక్రమాన్ని నిరాడంబరంగా నిర్వహించారు. ఢిల్లీ నుంచి వారణాసి వరకూ నడిచే ‘వందే భారత్‌’ ఎక్స్‌ప్రెస్‌ రైలు రూపొందించడం వెనుక డిజైనర్లు, ఇంజనీర్ల కృషిని అభినందించారు ప్రధాని.

నాలుగున్నరేళ్ల తమ పాలనలో రైల్వేలను మెరుగుపరిచేందుకు శక్తివంచన లేకుండా కృషి చేశామని మోదీ చెప్పారు. ఈ అత్యాదునిక రైలును చెన్నైలోని ఇంటిగ్రల్‌ కోచ్‌ ఫ్యాక్టరీలో పూర్తిగా దేశీయ పరిజ్ఞానంతో కేవలం 18 నెలల్లో తయారు చేశారు. ట్రైన్‌ను ప్రారంభించిన అనంతరం రైల్వే మంత్రి పీయూష్‌ గోయల్‌ రైలును నిశితంగా పరిశీలించారు. పుల్వామా ఘటన నేపథ్యంలో హడావిడి చేయలేదు. 

‘వందే భారత్’ స్పీడెంత? 

గంటకు 160 కిలోమీటర్ల వేగంతో ప్రయాణించే ట్రైన్‌ 18కు ఇటీవల ‘వందే భారత్‌’ ఎక్స్‌ప్రెస్‌గా పేరు మార్చారు. ఈనెల 17 నుంచి ఢిల్లీ-వారణాసి మధ్య వారానికి ఐదు రోజులు ఈ రైలు సేవలు అందుబాటులోకి వస్తున్నాయి. ఈ రైలులో రెండు ఎగ్జిక్యూటివ్‌ క్లాస్‌లతో పాటు 16 ఏసీ కోచ్‌లుంటాయి. ఈ రైలులో ఒకేసారి 1128 మంది ప్రయాణికులు ప్రయాణించవచ్చు. అన్ని కోచ్‌ల్లో ఆటోమేటిక్‌ డోర్‌లు, జీపీఎస్‌ ఆధారిత ప్రయాణీకుల సమాచార వ్యవస్థ వంటి అత్యాధునిక సదుపాయాలు ఉన్నాయి. అంతేకాదు ప్రయాణికులు కోరుకునే తాజా వంటకాలు అందించేందుకు పాంట్రీ అందుబాటులో ఉంది. ఈ రైలు టికెట్లు క్షణాల్లో అమ్ముడయ్యాయి. 

సోమ, గురు వారాల్లో మినహా మిగిలిన అన్ని రోజుల్లోనూ ఈ రైలు ప్రయాణికులకు అందుబాటులో ఉంటుంది.ఈ రైలు ప్రయాణికులకు ఉదయం టీ, అల్పాహారం, మధ్యాహ్నం భోజనం, సాయంత్రం పూట మరోసారి అల్పాహారాన్ని అందిస్తారు. దీనికి సంబంధించిన ఛార్జీలను రైలు టికెట్ నుంచే వసూలు చేస్తారు. న్యూఢిల్లీ నుంచి బయలుదేరే ఈ రైలు ఎనిమిది గంటల వ్యవధిలో ఉత్తర్ ప్రదేశ్ లోని వారణాశికి చేరుకుంటుంది. ఈరైలుకి రెండు చోట్ల మాత్రమే హాల్ట్ సదుపాయం ఉంది. 

పుల్వామా దాడి వెనుక ఉగ్రవాద సంస్థ జైష్-ఏ-మహమ్మద్ (జేఈఎం) హస్తముందని తేలింది. 350 కేజీల పేలుడు పదార్థాలతో అదిల్ అహ్మద్ అనే టెర్రరిస్ట్ ఆత్మాహుతి దాడికి పాల్పడడంతో ఈ భారీ విస్ఫోటనం సంభవించింది. ఈ ప్రమాదం జరిగిన అనంతరం ఆ ఉగ్రవాదికి సంబంధించిన వీడియోను జైష్ సంస్థ విడుదల చేసింది. అందులో అత్యాధునిక తుపాకులు, జేఈఎం జెండా, బ్యానర్లతో ప్రత్యక్షమైన అదిల్... ఇదే తన చివరి సందేశమని పేర్కొన్నాడు.

‘‘సంవత్సరం క్రితమే జేఈఎంలో చేరాను. ఇన్నాళ్ళకు నాకీ అవకాశం వచ్చింది. ఈ వీడియో మీకు చేరేటప్పటికి నేను స్వర్గంలో ఉంటా... కశ్మీర్ ప్రజలకు ఇదే నా చివరి సందేశం’’ అని తెలిపాడు. భారత్‌కు వ్యతిరేకంగా దక్షిణ కశ్మీర్ ప్రజలు ఎప్పట్నుంచో పోరాడుతున్నారని... ఇప్పుడు వారితో జతకట్టేందుకు ఉత్తర-మధ్య కశ్మీర్, జమ్ము ప్రజల సమయం వచ్చిందని చెప్పాడు. కొంతమంది ఉగ్రవాదుల్ని చంపినంత మాత్రాన తమను బలహీనపరచలేరని అన్నాడు. అలాగే... గతంలో జేఈఎం చేపట్టిన ఐసీఏ18 విమానం హైజాకింగ్‌, 2001 పార్లమెంట్‌పై దాడి, నగ్రొటా దాడి, ఉరి దాడి, పఠాన్‌కోట్‌ ఐఏఎఫ్‌ స్థావరంపై దాడి గురించి అతడు గొప్పగా చెప్పుకొచ్చాడు.

ఇంతకీ ఈ అదిల్ ఎవరు?
ఇతను జమ్మూకశ్మీర్‌ పుల్వామా జిల్లా గుండిబాగ్‌‌కు చెందినవాడు. మధ్యలోనే చదువు మానేసి, భవన నిర్మాణ పనులు చేసుకునేవాడు. ఇతనికి ‘అదిల్‌ అహ్మద్‌ గాడి టక్రానేవాలా’, ‘వకాస్‌ కమాండో ఆఫ్‌ గుండిబాగ్‌’ అని వ్యవహరిస్తారు కూడా! 2016 మార్చి 9వ తేదీన తన స్నేహితులు తౌసీఫ్, వసీంలతో కలిసి అదిల్ కనిపించకుండా పోయాడు. గతేడాదే జైష్-ఏ-మహమ్మద్ సంస్థలో చేరిన ఈ ఉగ్రవాది... తాజా ప్రమాదంతో 40 మంది భారత్ జవాన్‌లను పొట్టన పెట్టుకున్నాడు.

జైష్-ఏ-మహమ్మద్ చరిత్ర ఏంటి?
ఈ సంస్థను మౌలానా మసూద్ అజర్ 2000, జనవరి 31న కరాచీలో ఏర్పాటు చేశాడు. భారత్ విమానాన్ని ఉగ్రవాదులు హైజాక్ చేసి... బందీల మార్పిడి కింద 1999 డిసెంబర్ 31న అతడ్ని భారత్ జైలు నుంచి విడిపించుకున్నారు. ఆ వెంటనే ఈ సంస్థను స్థాపించిన అజర్... 2001 డిసెంబర్‌ 13న పార్లమెంట్‌పై దాడి చేయించాడు. ఉగ్రవాద నిరోధక చట్టం కింద 2001 అక్టోబర్‌ 25న భారత ప్రభుత్వం జేఈఎంను నిషేధించగా... అదే సంవత్సరం డిసెంబర్ 26న అమెరికా దీన్ని విదేశీ ఉగ్రవాద సంస్థగా ప్రకటించింది. లష్కర్‌-ఎ-తోయిబా(ఎల్‌ఈటీ) లాగే ఈ సంస్థ వ్యవహారాలన్నీ పాకిస్తాన్ అన్నీ తానై చూసుకుంటోంది.

• గురువారం మధ్యాహ్నం స్యూసైడ్ బాంబర్‌తో జరిగిన ఈ దాడిలో నలభైమంది సిఆర్‌పిఎఫ్ జవాన్‌లు ప్రాణాలు కోల్పోయారు. 78 సిఆర్‌పిఎఫ్ వాహనాల భారీ కాన్వాయ్‌లో 2500 మంది జమ్ము నుంచి శ్రీనగర్ ప్రయాణిస్తున్నారు. మార్గమధ్యంలో ఉన్న పుల్వామాలో 350 కేజీల భారీ పేలుడు పదార్థాలతో ఉన్న స్కార్పియో వాహనం రెండు బస్సులపై దూసుకొచ్చి ఢీకొనడంతో ఈ పేలుడు సంభవించింది.
• ఈ భారీ విస్ఫోటనం శబ్దాలు కొన్ని కిలోమీటర్ల దూరం వరకు వినిపించింది. కాన్వాయ్‌లో వున్న వాహనాలు తునాతునకలయ్యాయి. శరీరాలు ముక్కలుముక్కలైపోయాయి. హైవే మీద వంద మీటర్ల దూరం వరకు చెల్లాచెదురుగా పడ్డాయి.
• 22 సంవత్సరాల ఆదిల్ అహ్మద్ అనే టెర్రరిస్టు ఈ ఘాతుకానికి పాల్పడ్డాడు. ప్రమాదస్థలానికి కేవలం పది కిలోమీటర్ల దూరంలో నివసించే అతను... గతేడాదే జైష్-ఏ-మహమ్మద్‌లో చేరాడు.
• దీన్ని ఇంటెలిజెన్స్ వైఫల్యంగా భావిస్తున్నారు. ఒకేసారి ఇంతమంది సైనికుల్ని ఎందుకు తీసుకెళ్ళారన్న ప్రశ్నలు ఉత్పన్నమవుతున్నాయి. దానికితోడు గత రెండు రోజులుగా శ్రీనగర్-జమ్ము హైవే వాతావరణ కారణాల రీత్యా మూతపడింది. దాంతో గురువారం ఉదయమే ఇంత పెద్ద వాహనాల కాన్వాయ్ బయలుదేరాల్సి వచ్చింది.
• ఈ సంఘటన జరగడానికి కేవలం రెండు రోజుల ముందే జైష్ సంస్థ కారు బాంబ్‌ల మీద ఒక వీడియోను ఆఫ్ఘనిస్తాన్ నుంచి అప్‌లోడ్ చేసింది. దాంతోపాటు కశ్మీర్‌లో సరిగ్గా ఇటువంటి ఎటాక్ జరుగుతుందని చెప్పింది. ఈ వీడియో ఫుటేజ్‌ని జమ్ము-కాశ్మీర్ క్రిమినల్ ఇన్వెస్టిగేటివ్ విభాగం షేర్ కూడా చేసి... ఎటాక్ జరగవచ్చని హెచ్చరించింది కూడా!
• భారత్ ఈ వ్యవహారాన్ని ఖండిస్తూ... పాకిస్తాన్ టెర్రరిస్ట్ గ్రూపులకు తమ దేశం మద్దతివ్వడం మానుకోవాలని తీవ్ర పదజాలంతో కూడిన ఒక స్టేట్‌మెంట్ జారీ చేసింది. 
• వైట్ హౌస్ కూడా ఈ దుశ్చర్యన్ని ఖండించింది. ఉగ్రవాదులకు పాకిస్తాన్ ఆశ్రయం కల్పించడాన్ని పూర్తిగా ఆపేయాలని, వారికి ఎటువంటి సహాయసహకారాలు అందించకూడదని ప్రకటించింది.
• నరేంద్రమోదీ ఈ ఘటనపై వెంటనే స్పందించి... ఇది హేయమైన, ఘోరమైన చర్యంటూ పేర్కొన్నారు. రక్షణదళాల త్యాగాలు ఊరికే పోవని వ్యాఖ్యానించారు. కేంద్ర హోంమంత్రి రాజ్‌నాథ్ సింగ్ మాట్లాడుతూ... ఉగ్రవాదుల దాడికి సమాధానం తీవ్రంగా ఉంటుందంటూ హెచ్చరించారు.
• పాకిస్తాన్ విదేశీ వ్యవహారాల శాఖ మంత్రి ఈ వ్యవహారంపై ఆందోళన వ్యక్తం చేశారు. ‘‘భారత ప్రభుత్వంలోని వ్యక్తులు గానీ, మీడియా వర్గాలు గానీ ఈ దాడితో పాకిస్తాన్‌కు సంబంధం ఉందన్న విషయాన్ని, జరుగుతున్న ప్రచారాన్ని ఖండించారు.
• ఈమధ్యకాలంలో కాశ్మీర్ లోయలో జరిగిన ఉగ్రవాద దాడుల్లో ఇది అతి పెద్దది. అక్టోబర్ 1, 2001లో ముగ్గురు టెర్రరిస్టులు భారీ పేలుడు పదార్థంతో ఉన్న ఒక టాటా సుమోని అక్కడి అసెంబ్లీ భవనంలోకి చొచ్చుకొచ్చి, 38 మంది మరణానికి కారణమయ్యారు. ఆ తర్వాత 2016లో భారత్ ఆర్మీ నిర్వహించిన సర్జికల్ ఎటాక్‌లో ఉగ్రవాదులకు సంబంధించిన స్థావరాలపై దాడులు చేసింది. ఈ దాడుల్లో 19 మంది సైనికులు మరణించారు. దీన్నే ‘యూరి సర్జికల్ స్ట్రైక్‌’గా వ్యవహరిస్తున్నారు.

ప్రధాని నరేంద్రమోదీపై ఒక్క విపక్షాలు తప్పితే మరెవ్వరూ విమర్శలు చేసిన దాఖలాలు లేవు. ప్రతిఒక్కరూ నెత్తిన పెట్టుకుని ఊరేగించడమే! ముఖ్యంగా... ప్రముఖ వ్యాపారవేత్తలు నిత్యం మోదీ జపం చేస్తుంటారు. ఎంతైనా ప్రధాని కదా... తమ లావాదేవీలు, ఇతర వ్యవహారాలు సక్రమంగా జరగాలంటే ఆమాత్రం సాన్నిహిత్యం ఉండాలి మరి! కానీ... ఫస్ట్ టైమ్ ఒక పారిశ్రామికవేత్త మోదీకే దిమ్మతిరిగే కౌంటర్ వేసి చమత్కరించాడు. అతనెవరో కాదు... ఆర్థిక నేరగాడు, లిక్కర్ కింగ్ విజయ్ మాల్యా!

లోక్‌సభలో మాల్యా పేరెత్తకుండా అతనిని ప్రస్తావిస్తూ ప్రధాని మోదీ ‘రూ.9 వేల కోట్లతో ఓ వ్యక్తి పరారయ్యాడు’ అని పేర్కొన్నారు. దానికి మాల్యా ట్విట్టర్ మాధ్యమంగా ఊహించని సమాధానం ఇచ్చాడు. ప్రజానిధుల్ని వసూలు చేయాలన్న చిత్తశుద్ధి ప్రధాని మోదీకి నిజంగానే ఉంటే... తాను చెల్లిస్తానని చెప్పిన డబ్బుని తీసుకోవాల్సిందిగా ఆయన బ్యాంకుల్ని ఎందుకు ఆదేశించడం లేదంటూ ప్రశ్నించాడు. కింగ్‌ఫిషర్‌కి అప్పుగా ఇచ్చిన ప్రభుత్వ నిధుల్ని వసూలు చేసిన ఘనతను పొందేందుకైనా మోదీ ఎందుకు ముందుకు రావడం లేదో, బ్యాంకుల్ని ఆ సొమ్ము తీసుకోమని ఎందుకు చెప్పడం లేదో తనకర్థం కావడం లేదని చురకలంటించాడు.

తాను అప్పులు కట్టేస్తానని కర్నాటక హైకోర్టు ముందు ఆఫర్ చేశానని గుర్తుచేసిన మాల్యా... తాను స్పష్టంగా, నిజాయితీగా చెప్తున్న మాట ఇది అని చెప్పుకొచ్చాడు. దీన్నో చిన్న విషయంలా తీసిపారెయ్యొద్దని, తాను అప్పులు చెల్లించేందుకు సిద్ధంగా ఉన్నానన్నాడు. అయినా తాను అప్పు తీరుస్తానని చెప్పినా ఎందుకు బ్యాంకులు స్వీకరించడం లేదని మళ్ళీ ప్రశ్నించాడు మాల్యా. తాను అక్రమంగా ఆస్తులు దాచుకున్నట్టు ఈడీ చెప్తున్న విషయం తనను తీవ్ర ఆందోళనకు గురిచేసిందని ఆవేదన వ్యక్తం చేశాడు. ఒకవేళ తాను నిజంగానే సొమ్ము దాచి ఉంటే... రూ.14 వేల కోట్ల ఆస్టుల్ని ఎందుకు కోర్టు ముందు పెడతానంటూ మండిపడ్డాడు.

తాను చేయని నేరాన్ని పదేపదే చేశానని చెప్తూ ప్రజల్ని తప్పుదోవ పట్టిస్తున్నారని, ఇలా చేసినందుకు సిగ్గుండాలని మాల్యా నిలదీశాడు. అయినా తనకిది పెద్ద ఆశ్యర్యం కలిగించలేదని చివర్లో దీమా వ్యక్తం చేశాడు. కాగా... కేంద్ర ప్రభుత్వం గతేడాది ఆగస్టులో అమల్లోకి తెచ్చిన పరారీ ఆర్థిక నేరగాళ్ల చట్టం కింద ‘పరారీ ఆర్థిక నేరగాడి’గా మాల్యాకి ముద్ర పడింది. రూ.9 వేల కోట్ల రుణాల ఎగవేతపై విచారణను తప్పించుకునేందుకు ఆయన 2016 మార్చి 2న దేశం విడిచి లండన్ పారిపోయిన విషయం తెలిసిందే!

పార్లమెంటు చివరి సమావేశాల్లో ట్విస్ట్‌లే ట్విస్ట్‌లు. ఒకవైపు దేశవ్యాప్తంగా విపక్షాలు మోదీని గద్దె నుంచి దించేందుకు నానా ప్రయత్నాలు చేస్తున్నాయి. ఈ నేపథ్యంలో సమాజ్‌వాదీ పార్టీ వ్యవస్థాపకుడు ములాయం సింగ్‌ యాదవ్‌ గట్టి షాక్‌ ఇచ్చారు. పార్లమెంటులో ప్రధాని నరేంద్ర మోదీపై ప్రశంసల జల్లు కురిపించడం చర్చకు దారితీసింది. మోదీ మరోసారి ప్రధాని కావాలని దేశ ప్రజలు కోరుకుంటున్నారని ములాయం అనేశారు. మోదీ అందరినీ కలుపుకుని ముందుకు సాగుతున్నారని అభినందించారు. ఆయన పాలన బాగుందని.. ఆయనను ఎవరు వెలేత్తి చూపలేరని వ్యాఖ్యానించారు. 

ములాయం ఈ ప్రసంగం చేస్తున్న సమయంలో సభలోనే ఉన్న మోదీ చిన్నగా చిరునవ్వులు చిందించారు. ములాయం వ్యాఖ్యలతో ఎస్పీ సభ్యులు ఒక్కసారిగా షాక్‌కు గురయ్యారు. ఏంజరుగుతోందో అర్థంకాక కాసేపు బుర్రలు గోక్కున్నారు. ములాయం సింగ్ వ్యాఖ్యలతో ఇతర విపక్ష సభ్యులు ఆశ్చర్యానికి లోనయ్యారు. అధికార పార్టీ ఎంపీలు మాత్రం సంతోషంలో మునిగిపోయి, బల్లలు చరిచారు. ములాయం పక్కనే కూర్చున్న సోనియా గాంధీ మాత్రం షాక్ అయ్యారు. 

ప్రధాని నరేంద్ర మోదీని పొగిడిన ములాయం సింగ్ యాదవ్ వ్యవహారంపై బీజేపీ శ్రేణులు తెగ సంబర పడుతున్నాయి. సరిగ్గా పార్లమెంటు ఎన్నికలకు ముందు చోటు చేసుకున్న ఈ పరిణామాన్ని సద్వినియోగం చేసుకునేందుకు ఆ పార్టీ నేతలు వడివడిగా స్పందిస్తున్నారు. యూపీ సీఎం యోగి ఆదిత్యనాథ్ మరో అడుగు ముందుకేసి ములాయం కుమారుడిని సైతం ఈ వ్యవహారంలోకి లాక్కొచ్చేశారు. పార్లమెంటు వేదికగా తండ్రి ములాయం చెప్పిన వాస్తవాన్ని అఖిలేశ్ అంగీకరించాలన్నారు. ‘‘నిజమే ఎప్పుడూ గెలుస్తుంది. పార్లమెంటులో ములాయం చెప్పిందంతా నిజం. ములాయం మాదిరిగానే ఆయన కుమారుడు కూడా ఈ వాస్తవాన్ని అంగీకరించాలి...’’ అని యోగి ఆదిత్యనాథ్  అన్నారు. 

ఉత్తరప్రదేశ్‌లో ములాయం కుమారుడు, ఎస్పీ అధ్యక్షుడు అఖిలేశ్‌ యాదవ్‌ బీజేపీ ప్రభుత్వ విధానాలపై తీవ్రంపోరాటం చేస్తున్నారు. ‘మహాఘట్బంధన్’ పేరుతో బీజేపీయేతర పక్షాలతో సమావేశాలు నిర్వహిస్తున్నారు. లోక్‌సభ ఎన్నికల్లో బీజేపీని ఓడించడానికి చిరకాల ప్రత్యర్థి బీఎస్పీతో సైతం అఖిలేశ్‌ జత కట్టారు. మోదీకి వ్యతిరేకంగా కోల్‌కతాలో పశ్చిమ బెంగాల్‌ ముఖ్యమంత్రి మమతా బెనర్జీ నిర్వహించిన భారీ ర్యాలీలో పాల్గొన్నారు అఖిలేశ్‌. 

అయితే ములాయం ఈ విధమైన వ్యాఖ్యలు చేయడం రాజకీయ వర్గాలను కుదుపుకుదిపేసింది. ములాయం సింగ్ యాదవ్ లోక్‌సభలో మోదీని ప్రశంసించడంపై కాంగ్రెస్ అధ్యక్షుడు రాహుల్ గాంధీ ఆచితూచి స్పందించారు. ములాయం వాదనతో తాను ఏకీభవించనని, అయితే రాజకీయాల్లో ములాయం పోషించిన పాత్రను గౌరవిస్తానని చెప్పారు. మొత్తం మీద ములాయం సింగ్ వ్యాఖ్యలు మహాకూటమిలో కలకలం రేపుతున్నాయి. యూపీలో అయితే ఏకంగా బీజేపీ నేతలు ములాయంకి ధన్యవాదాలు తెలుపుతూ ఫ్లెక్సీలు తయారుచేశారు. 

రఫెల్ వివాదం అగ్గిరాజేస్తున్న వేళ కేంద్రప్రభుత్వం పార్లమెంటు ముందు కాగ్ రిపోర్ట్ ప్రవేశపెట్టింది. 141 పేజీల కాగ్ రిపోర్టులో 32 పేజీల్లో రాఫెల్ డీల్ వివరాలు పొందుపరిచింది. 2012 నుంచీ 2017 వరకూ రాఫెల్ ఒప్పందానికి సంబంధించిన వివరాలు కాగ్ రిపోర్టులో ఉంచారు. ఈ నివేదికలో 126 విమానాల కొనుగోలు డీల్‌తో పోల్చుకుంటే కొత్త డీల్‌లో భారత్‌ అవసరాలకు తగినట్లు మార్పులు చేసినట్టు ఉంది. 

36 యుద్ధ విమానాల కొనుగోలులో 17.08 శాతం సొమ్ము ఆదా అయ్యిందని కాగ్ పేర్కొంది. పాత డీల్‌తో పోలిస్తే కొత్త డీల్‌లో తొలి 18 యుద్ధ విమానాలు 5 నెలల ముందే భారత్‌కు రానున్నాయి. వైమానిక దళం చేస్తున్న 11 కొనుగోళ్ల ఒప్పందాల వివరాలు ఈ రిపోర్టులో ఉన్నాయి. వీటిలో ఐదు యూపీఏ ప్రభుత్వంలో తీసుకున్న నిర్ణయాలు కాగా... ప్రస్తుత ఎన్డీయే ప్రభుత్వంలో తీసుకున్నవి ఆరు వున్నాయి. రఫెల్ యుద్ధవిమానం ధర పై మాత్రం వివరాలు కాగ్ రిపోర్టులో లేకపోవడం గమనించాల్సిన అంశం. 

మన్మోహన్ సింగ్ హయాంలోని యూపీయే ప్రభుత్వం ఏ ధర నిర్ణయించిందో, మోదీ హయాంలోని ఎన్డీయే ప్రభుత్వం కూడా అంతే ధర నిర్ణయించింది. 2007లో యుద్ధ విమానానికి ఏ ధర ఉందో... 2016లోనూ అదే ధర ఉంది. యూపీఏ ప్రభుత్వంతో పోల్చితే తాము కుదిర్చిన రాఫెల్ డీల్‌లో యుద్ధ విమానాల ధర 9 శాతం తక్కువ అని బీజేపీ ప్రభుత్వం వాదించినా..వాస్తవానికి వాటి ధర కేవలం 2.86 శాతం మాత్రమే తక్కువ అని కాగ్ పేర్కొంది.

రాఫెల్ డీల్‌లో 36 రాఫెల్ జెట్లను కొనడం ద్వారా ఇండియాకి మరింత మేలు జరుగుతుందని మాత్రం కేంద్ర ప్రభుత్వం చెబుతోంది.  కాంగ్రెస్ మాత్రం మంగళవారమే కాగ్ రిపోర్టుకి కొత్త అర్థం ఆపాదించింది. కాగ్ అంటే కంప్ట్రోలర్ అండ్ ఆడిటర్ జనరల్ కాదు.. చౌకీదార్ ఆడిటర్ జనరల్ అని విమర్శించింది. భారత న్యాయమంత్రిత్వశాఖ అడిగినట్టు ఫ్రెంచి ప్రభుత్వం సార్వభౌమత్వ హామీ ఇవ్వలేదు, కానీ న్యాయపరమయిన గ్యారంటీ  మాత్రమే ఇచ్చింది. 

రఫెల్ ఒప్పందంపై తప్పుడు ఆరోపణలు చేయడం తగదని బీజేపీ పేర్కొంది. స్వతంత్ర సంస్థ అయిన కాగ్‌ నిబద్ధతను సవాల్ చేయడం సరికాదని కాంగ్రెస్‌కు హితవు పలికింది కేంద్రం. రాజ్యసభ ప్రారంభానికి ముందు పార్లమెంట్‌ ఆవరణలో కాంగ్రెస్‌ ఆధ్వర్యంలో సోనియా, రాహుల్‌ ఆందోళనకు దిగారు. 

కపిల్ సిబల్ కాంగ్రెసు పెద్దమనిషన్న విషయం అందరికీ తెలిసిందే ! అంతేకాదు దేశంలోనే పేరు మోసిన పెద్ద లాయరు అనేది జగమెరిగిన సత్యం. ఈ పెద్ద మనిషి నిన్న రెండు నాలుకలేసుకుని కోర్టులో చేసిన పని ఇప్పుడు పెద్ద వార్తయిపోయింది. ఇంతకీ విషయం ఏమిటంటే...రిలయన్స్ కామ్ అధినేత అనిల్ అంబానీపై ఎరిక్సన్ కంపెనీ సుప్రీమ్ కోర్టులో రూ. 550 కోట్ల రూపాయలు చెల్లించని వైనంపై కోర్టు ధిక్కారం కింద కేసు నమోదైంది.

ఈ  కేసులో అనిల్ తరఫున వకాల్తా పుచ్చుకుని వాదించింది కపిల్ సిబల్. ఇక ఇదే కపిల్ సిబల్ కోర్టుకు వచ్చే ముందు రఫెల్ ఒప్పందంపైన ప్రభుత్వం మీద అనిల్ అంబానీ మీద నిప్పులు చెరుగుతూ ట్వీట్ చేశారు. 

ఇదేంటి పొద్దునేగా మీరు అతన్ని  విమర్శించి...  ఇప్పుడు కోర్టు కొచ్చి అతనికి మద్దతుగా కేసు వాదిస్తున్నారంటూ అడిగితే దేనిదారి దానిదే అంటూ సమాధానమిచ్చారు కపిల్. "నేను రిలయన్స్ కామ్ సంస్థకు 20 ఏళ్లుగా నా వృత్తిపరమైన సేవలు అందిస్తున్నాను. ఇదొక కార్పొరేట్ వ్యవహారం. పార్టీ వేరు..వృత్తి వేరు"అంటూ తడుముకోకుండా జవాబిచ్చారు కపిల్. ఎంతయినా నల్లకోటు నాలికలే వేరంటూ మనం సరిపుచ్చుకోవాలి. 

ఒకవైపు లోక్‌సభ ఎన్నికలు ముంచుకొస్తున్నాయి. విపక్షాలు మహాకూటమి పేరుతో తాళ్ళు పేనుతున్నాయ్.. ఎన్డీయే ఏనుగుని కట్టిపడేయడానికి ప్రయత్నాలు చేస్తున్నాయ్. ఇదంతా ఒక ఎత్తయితే మోడీకి ఎదురుదెబ్బలు తప్పవని జాతీయ స్థాయిలో వివిధ మీడియా సంస్థలు సర్వేలు సైతం ఘోషిస్తున్నాయి. అయితే రాజకీయ విశ్లేషణలో ఆరితేరిన ప్రశాంత్ కిషోర్ మాత్రం మోడీ విజయంపై ధీమా వ్యక్తంచేయడం దేశవ్యాప్తంగా చర్చనీయాంశంగా మారింది. 

లోక్‌సభ ఎన్నికల తర్వాత నరేంద్ర మోదీయే మళ్లీ ప్రధానమంత్రి అంటూ జేడీయూ ఉపాధ్యక్షుడు ప్రశాంత్ కిశోర్ జోస్యం చెబుతున్నారు. ఎన్డీయేకి మెజారిటీ రాదనే వార్తల్ని ఆయన కొట్టిపారేయడం విశేషం. బీహార్ సీఎం నితీశ్ కుమార్ ఎన్డీయేలో కీలక నేత. కానీ ప్రధాని రేసులో లేరన్నారు. 

గతేడాది సెప్టెంబర్‌లో జేడీయూలో చేరిన ప్రశాంత్ కిషోర్ ఏపీలో వైసీపీకి కన్సల్టెంట్‌గా కూడా వ్యవహరిస్తున్నారు. బీజేపీతో అంటీ ముట్టనట్టుగా ఉంటున్న శివసేన చీఫ్ ఉద్థవ్ థాకరేతో ఇటీవల ఆయన సమావేశం కావడంతో... శివసేన, జేడీయూల మధ్య వ్యూహాత్మక పొత్తు కుదరబోతోందంటూ ప్రచారం ఊపందుకుంది. అయితే, బీహార్ వాసులకు వ్యతిరేకంగా శివసేన తరచూ రెచ్చగొట్టే వ్యాఖ్యలు చేస్తూనే ఉంది. ఈ వాతావరణాన్ని చల్లబరిచేందుకే తాను ఉద్దవ్ థాకరేతో సమావేశమైనట్టు ప్రశాంత్ కిశోర్ అన్నారు. 

బీహార్‌లోని బక్సర్ జిల్లాకి చెందిన ప్రశాంత్ కిశోర్... 2014లో బీజేపీ ప్రధానమంత్రి అభ్యర్థి నరేంద్రమోదీ తరపున ప్రచారం చేశారు. తన వ్యూహాలతో అప్పటి ఎన్నికల్లో బీజేపీకి ఎన్నడూ రానంత భారీ మెజారిటీ సాధించడం వెనుక ఆయనదే కీలక పాత్ర అంటారు. ఆ మరుసటి ఏడాదే నితీశ్ కుమార్ కోసం పనిచేసి అసెంబ్లీ ఎన్నికల్లో మంచి విజయం కట్టబెట్టడంతో ప్రశాంత్ కిషోర్ టాక్ ఆఫ్ ది పాలిటిక్స్‌గా మారారు. అన్నట్టు పీకే మోదీ తరఫున 2019 ఎన్నికల ప్రచారం చేయబోతున్నారనే వార్తలు వస్తున్నాయి. పీకే జోస్యం ఫలిస్తుందా? మళ్ళీ మోదీ ప్రధాని పీఠంపై దర్జాగా కూర్చోగలుగుతారా? వేచి చూడాల్సిందే.