భారత్‌తో చైనా వ్యవహరిస్తున్న దుందుడుకు వైఖరితో చైనా అధికార కమ్యూనిస్ట్‌ పార్టీ నిజరూపం స్పష్టంగా తెలుస్తోందని అమెరికా అధ్యక్షుడు డొనాల్డ్‌ ట్రంప్‌ అభిప్రాయపడుతున్నట్లు ఆయన ప్రెస్‌ సెక్రటరీ పేర్కొన్నారు. భారత్, చైనాల మధ్య నెలకొన్న ఉద్రిక్తతలను అమెరికా నిశితంగా గమనిస్తోందని, ఆ వివాదం  శాంతియుతంగా పరిష్కారమవ్వాలనే తాము కోరుకుంటున్నామని వైట్‌హౌజ్‌ ప్రెస్‌ సెక్రటరీ కేలీ మెక్‌ఎనానీ వ్యాఖ్యానించారు. భారత్‌ సహా పలు దేశాలపై చైనా అనుసరిస్తున్న ఆక్రమణపూరిత వైఖరిని ట్రంప్‌ తీవ్రంగా వ్యతిరేకిస్తున్నారని, ఆ వైఖరి చైనాలో  అధికారంలో ఉన్న కమ్యూనిస్ట్‌ పార్టీ ఆఫ్‌ చైనా అసలు స్వరూపాన్ని తేటతెల్లం చేస్తోందని ఆయన భావిస్తున్నారని కేలీ మెక్‌ఎనానీ తెలిపారు. 

అమెరికా కాంగ్రెషనల్‌ సమావేశంలోనూ భారత్, చైనా సరిహద్దుల్లో నెలకొన్న ఉద్రిక్తతలపై ఆందోళన వ్యక్తమైంది. ‘చైనా తీరుతో ఇటీవల వాస్తవాధీన రేఖ వెంట తీవ్ర హింసాత్మక ఘర్షణలు చెలరేగాయి. ఆ ఘర్షణల్లో పెద్ద సంఖ్యలో భారతీయ సైనికులు చనిపోయారు. చైనా వైపు కూడా భారీగా మరణాలు సంభవించాయి’ అని కరోనా వైరస్, అమెరికా చైనా సంబంధాలపై ఏర్పాటు చేసిన కాంగ్రెస్‌ ఇంటెలిజెన్స్‌ కమిటీ చైర్మన్‌ ఆడమ్‌ షిఫ్‌ తెలిపారు.  కరోనా వైరస్, తాజా సరిహద్దు ఉద్రిక్తతల నేపథ్యంలో చైనాతో సంబంధాల విషయంలో భారత్‌ పునరాలోచిస్తోందని ఆకమిటీకి బ్రూకింగ్స్‌ ఇన్‌స్టిట్యూట్‌లో సీనియర్‌ సభ్యుడు తాన్వి మదన్‌ వివరించారు. పరిస్థితులను బట్టి భారత్‌ అమెరికా నుంచి ఏం ఆశించనుందో అంచనా వేస్తుండాలన్నారు.

చైనా యాప్‌ల నిషేధం సరైన చర్య : అమెరికా

టిక్‌టాక్‌, షేర్‌ఇట్‌ సహా 59 చైనా యాప్‌లను భారత ప్రభుత్వం నిషేధించడాన్ని అమెరికా సమర్ధించింది. ఈ నిర్ణయం భారత సమగ్రత, జాతీయ భద్రతకు ఉపకరిస్తుందని, చైనా యాప్‌లను భారత్‌ నిషేధించడాన్ని తాము స్వాగతిస్తామని అమెరికా విదేశాంగ మంత్రి మైక్‌ పాంపియో బుధవారం పేర్కొన్నారు. మరోవైపు చైనా యాప్‌లను భారత్‌ నిషేధించిన క్రమంలో ప్రధాని నరేంద్ర మోదీ చైనా సోషల్‌ మీడియా బ్లాగింగ్‌ సైట్‌ వీబో నుంచి వైదొలిగారు. చైనా యాప్‌లను భారత ప్రభుత్వం నిషేధించడంపై భారత్‌లో చైనా రాయబార కార్యాలయ ప్రతినిధి జి రోంగ్‌ స్పందించారు. ఈ వ్యవహారంపై తమ దేశం తీవ్రంగా కలత చెందుతోందని, ఈ చర్యను తీవ్రంగా వ్యతిరేకిస్తుందని అన్నారు.

చైనాపై కోపం రోజురోజుకూ పెరుగుతోంది: ట్రంప్

ప్రపంచాన్ని కలవర పెడుతోన్న కరోనా వైరస్‌ అమెరికాలో తీవ్ర రూపం దాల్చింది. ప్రస్తుతం కరోనా కేసుల్లో అమెరికా ప్రపంచలోనే ప్రథమ స్థానంలో ఉన్న సంగతి తెలిసిందే. ఈ క్రమంలో కరోనా వైరస్‌ చైనా సృష్టే అన్న డొనాల్డ్‌ ట్రంప్‌ తాజాగా మరోసారి ఆగ్రహాన్ని వ్యక్తం చేశారు. చైనాపై తన కోపం రోజు రోజుకు పెరుగుతుందని ట్రంప్‌ తెలిపారు. మహమ్మారి విషయంలో తాము పూర్తి స్థాయిలో నియంత్రణ సాధించలేదని అమెరికన్‌ వైద్యులు ట్రంప్‌ను హెచ్చరించారు. ఈ క్రమంలో ‘మహమ్మారి వ్యాప్తి ప్రపంచవ్యాప్తంగా విజృంభిస్తోంది. అమెరికాతో సహా అన్ని దేశాలకు ఎంతో నష్టాన్ని చేకూర్చింది. ప్రస్తుతం చైనా మీద నా కోపం అంతకంతకు పెరుగుతోంది’ అని ట్రంప్‌ ట్వీట్‌ చేశారు.

భారత్‌లో కరోనా విజృంభణకు రికార్డులు బద్దలవుతున్నాయి. కేవలం ఒక్క నెల.. 30 రోజులు.. 3,94,958 మంది బాధితులు. దేశంలో జూన్‌ నెలలో కరోనా ఉధృతికి నిదర్శనం ఈ గణాంకాలు. నెల రోజుల్లోనే దాదాపు 4 లక్షల మంది కరోనా మహమ్మారి బారిన పడడం గమనార్హం. రాబోయే రోజుల్లో వైరస్‌ వ్యాప్తి తీవ్రంగా ఉంటుందని వైద్య వర్గాలు హెచ్చరిస్తున్న నేపథ్యంలో ప్రజలు మరింత అప్రమత్తంగా వ్యవహరించాల్సి ఉంది. 

దేశంలో కరోనా విజృంభణ తీవ్రమవుతోంది. గత ఐదు రోజుల్లోనే లక్ష కేసులు నమోదవడం పరిస్థితి తీవ్రతను చాటుతోంది. లక్ష కేసులకు 110 రోజులు పడితే, 44 రోజుల్లోనే మిగతా 5 లక్షల కేసులు నమోదయ్యాయి. మధ్యలో వరుసగా రెండ్రోజుల పాటు తగ్గినట్లే తగ్గిన కేసులు మళ్లీ పెరిగాయి. మంగళ, బుధవారాల్లో 18 వేల పైగా కేసులు నమోదుకాగా.. గురువారం 19,148 మంది వైరస్‌ బారినపడ్డారు. 434 మంది ప్రాణాలు కోల్పోయారు.  

దేశంలో 34 వేల మంది రోగులకు ఐసీయూ చికిత్స, 37 వేల మందికి ఆక్సిజన్‌ అవసరం ఉందని, 9 వేల మంది వెంటిలేటర్లపై ఉన్నారని కేంద్ర మంత్రిత్వ వర్గాలు తెలిపాయి. రికవరీ రేటు 59.52 శాతానికి చేరిందని శాఖ వెల్లడించింది. కరోనా పరీక్షల సంఖ్య 90 లక్షలు దాటింది. బుధవారం 2.29 లక్షల నమూనాలను పరీక్షించినట్లు ఐసీఎంఆర్‌ తెలిపింది. 

మే 25 నాటికి రోజువారీ సామర్థ్యం లక్షన్నర పరీక్షలు కాగా, ఈ నెల 1 నాటికి అది రెట్టింపైంది. అనుమానిత లక్షణాలతో ఎవరైనా చనిపోతే వైరస్‌ నిర్ధారణ పరీక్షల ఫలితం కోసం ఆగకుండా మృతదేహాలను వెంటనే బంధువులకు అప్పగించాలని రాష్ట్రాలకు కేంద్రం సూచించింది. అంత్యక్రియలు మాత్రం కొవిడ్‌ నిబంధనలకు అనుగుణంగా జరగాలని స్పష్టం చేసింది.

కాగా, మహారాష్ట్రలో వైరస్‌ కారక మరణాలు 8 వేలు దాటాయి. ఆ రాష్ట్రంలో కొత్తగా 5,537 మంది కొవిడ్‌ బారినపడ్డారు. జైళ్లలో ఖైదీలకు కరోనా సోకకుండా.. ఐసీఎంఆర్‌ మార్గదర్శకాలను పాటించాలని ప్రభుత్వానికి బాంబే హైకోర్టు సూచించింది. 

ఢిల్లీలో.. వైరస్‌ ఉధృతి క్రమంగా తగ్గుతున్నట్లు కనిపిస్తోంది. అక్కడ తాజాగా 2,373 మందికి వైరస్‌ సోకింది. వజ్రాల పరిశ్రమలకు పేరుగాంచిన ఆరోగ్య కార్యకర్తలకు ప్రైవేటు ఆస్పత్రులు, నర్సింగ్‌ హోంలు ఎన్‌-95 మాస్క్‌లు, పీపీఈ కిట్లు సమకూర్చకుంటే ఫిర్యాదు చేసేందుకు హెల్ప్‌లైన్‌ నంబరు వంటి యంత్రాంగం ఏర్పాటు చేయాలని ఢిల్లీ హైకోర్టు ప్రభుత్వానికి సూచించింది. ఢిల్లీలో గురువారం ప్లాస్మా బ్యాంక్‌ను సీఎం కేజ్రీవాల్‌ ప్రారంభించారు. గుజరాత్‌లోని సూరత్‌లో కేసులు 5 వేలు దాటాయి. 

కర్ణాటకలో కొత్తగా 1,502 కేసులు నమోదయ్యాయి. ఇందులో బెంగళూరువే 889 కేసులున్నాయి. నగరంలో ప్రభుత్వ, ప్రైవేటు ఆసుపత్రులు రద్దీగా మారాయి. నెగిటివ్‌ నివేదిక ఉన్నా బెంగళూరులో ఓ మహిళ ప్రసవం కోసం 16 గంటల పాటు ఐదు ఆసుపత్రుల చుట్టూ తిరగాల్సి వచ్చింది. తమిళనాడులో 32 వేల మందికి జరిపిన  పరీక్షల్లో 4,343 కేసులు వెలుగుచూశాయి. చెన్నైలో 2,027 కేసులు నమోదయ్యాయి. 58మంది ప్రాణాలు కోల్పోయారు.

ముమ్మరంగా కోవిడ్‌-19 టెస్ట్‌లు.. కోటి దాటనున్న కరోనా టెస్టుల సంఖ్య

కరోనా మహమ్మారిని నిరోధించడంలో కీలకమైన కోవిడ్‌-19 పరీక్షలను పెద్దసంఖ్యలో చేపట్టేందుకు చర్యలు చేపడుతున్నట్టు ప్రభుత్వం పేర్కొంది. త్వరలోనే దేశవ్యాప్తంగా కరోనా పరీక్షల సంఖ్య కోటి దాటనుందని ప్రభుత్వం గురువారం వెల్లడించింది. జులై 2 నాటికి దేశవ్యాప్తంగా పలు ల్యాబ్‌ల్లో మొత్తం 90,56,173 కోవిడ్‌-19 పరీక్షలను నిర్వహించినట్టు ప్రభుత్వం తెలిపింది. ప్రస్తుతం దేశవ్యాప్తంగా మొత్తం 1065 టెస్టింగ్‌ ల్యాబ్‌లకు ఐసీఎంఆర్‌ అనుమతి లభించగా వాటిలో 768 ప్రభుత్వ ల్యాబ్‌లు కాగా, 297 ప్రైవేట్‌ ల్యాబ్‌లున్నాయి. 

రోజురోజుకూ టెస్టింగ్‌ సామర్థ్యం మెరుగుపడుతుండగా ఈనెల 1న 2,29,598 కోవిడ్‌-19 టెస్టులు నిర్వహించారు. మరోవైపు పరీక్షల వేగం పెంచేందుకు కోవిడ్‌-19 పరీక్షను కేవలం ప్రభుత్వ వైద్యుల ప్రిస్క్రిప‍్షన్‌తోనే కాకుండా ఏ నమోదిత డాక్టర్‌ ప్రిస్క్రిప్షన్‌తో అయినా నిర్వహించే వెసులుబాటును కల్పించినట్టు ప్రభుత్వం పేర్కొంది. ఐసీఎంఆర్‌ మార్గదర్శకాలకు అనుగుణంగా కోవిడ్‌-19 పరీక్షలను ముమ్మరంగా చేపట్టాలని కేంద్ర ప్రభుత్వం రాష్ట్రాలు, కేంద్ర పాలితప్రాంతాలను కోరింది.

ప్రధానమంత్రి నరేంద్ర మోదీ లడఖ్‌లో శుక్రవారం భారత జవాన్లను ఉద్దేశించి మాట్లాడుతూ చైనాపై విరుచుకుపడటం పట్ల పొరుగు దేశం స్పందించింది. తమను ఉద్దేశించి మోదీ చేసిన విస్తరణవాద దేశాలనే వ్యాఖ్యలపై డ్రాగన్‌ బదులిచ్చింది. చైనా తన 14 పొరుగు దేశాల్లో 12 దేశాలతో శాంతియుత సంప్రదింపుల ద్వారా సరిహద్దు రేఖలను నిర్ధారించిందని, భౌగోళిక సరిహద్దులను స్నేహపూర్వక సహకారానికి అనుబంధంగా మార్చిందని వ్యాఖ్యానించింది. చైనాను విస్తరణ కాంక్ష కలిగిన దేశంగా పేర్కొనడం నిరాధారం, అతిశయమని అభివర్ణించింది. ఈ వ్యాఖ్యల ద్వారా పొరుగుదేశంతో భారత్‌ తమ వివాదాలను పెంచుకోవడమేనని చైనా రాయబార కార్యాలయ ప్రతినిధి జి రోంగ్‌ అన్నారు.

ప్రధానమంత్రి నరేంద్ర మోదీ లద్దాఖ్‌ పర్యటపై చైనా ఘాటుగా స్పందించింది. ఇరు దేశాల మధ్య దౌత్యపరమైన చర్చలు జరుగుతున్న తరుణంలో వివాదాస్పద ప్రాంతాల్లో పర్యటించడం సరైనది కాదని మోదీ పర్యటనపై తీవ్ర అభ్యంతరం వ్యక్తం చేసింది. సరిహద్దు ప్రాంతాల్లో ఇరు దేశాల నడుమ ఉద్రిక్త పరిస్థితులు నెలకొన్న నేపథ్యంలో భారత్‌ రెచ్చగొట్టేలా వ్యవహరిస్తోందని పేర్కొంది. ఈ మేరకు చైనా విదేశాంగ ప్రతినిధి చావో లిజియన్ శుక్రవారం ఓ ప్రకటన విడుదల చేశారు. 

మోదీ లద్దాఖ్‌ అనూహ్య పర్యటన చైనాను ఉలిక్కిపడేలా చేసింది. దాంతో, సరిహద్దుల్లో ఉద్రిక్తతలను మరింత పెంచే చర్యలు చేపట్టడం సరికాదని వ్యాఖ్యానించింది. రెండు దేశాలు కూడా ఉద్రిక్తతలు పెరిగేలా వ్యవహరించకూడదని పేర్కొంది. రెండు దేశాల మధ్య మిలటరీ, దౌత్య మార్గాల్లో చర్చలు కొనసాగుతున్నాయని, ఈ సమయంలో ఉద్రిక్తతలు పెరిగే చర్యలకు రెండు దేశాలు ఉపక్రమించడం మంచిది కాదని చైనా విదేశాంగ శాఖ అధికార ప్రతినిధి జావొ లిజియన్‌ వ్యాఖ్యానించారు. 

భారత్‌లోని వ్యాపారాలకు సంబంధించి న్యాయమైన హక్కుల పరిరక్షణ కోసం అవసరమైన చర్యలు తీసుకుంటామన్నారు. చైనాను విస్తరణ వాద దేశంగా భావించడం అర్థరహితమని భారత్‌లో చైనా రాయబార కార్యాలయ అధికార ప్రతినిధి జీ రాంగ్‌ ట్వీట్‌ చేశారు.

కాగా, అంతకుముందు లేహ్‌లో భారత జవాన్లను ఉద్దేశించి మోదీ మాట్లాడుతూ విస్తరణ కాంక్షకు కాలం చెల్లిందని, ఇది అభివృద్ధి యుగమని డ్రాగన్‌కు చురకలంటించారు. విస్తరణవాదులు ఓడిపోయి తోకముడిచిన ఘటనలు చరిత్రలో చోటుచేసుకున్నాయని చెప్పారు. భారత్‌ శాంతి యత్నాలకు స్పందించని చైనాపై మండిపడుతూ బలహీనులే శాంతి కోసం చొరవచూపరని ధైర్యవంతులే శాంతి కోసం పాటుపడతారని వ్యాఖ్యానించారు. భారత్‌ బలమేంటో ప్రపంచానికి తెలుసునన్నారు. భారత్‌లో లడఖ్‌ అంతర్భాగమని స్పష్టం చేశారు. విపత్కర పరిస్థితుల్లో జవాన్లు దేశానికి రక్షణగా ఉన్నారని, శత్రువులకు భారత సైనికులు గట్టి గుణపాఠం చెప్పారని ప్రశంసించారు.

శుక్రవారం ఉదయం మూడోకంటికి కూడా తెలియకుండా సీడీఎస్‌ చీఫ్‌ బిపిన్‌ రావత్‌తో కలిసి మోదీ లద్దాఖ్‌లోని నిము స్థానిక స్థావరంకు చేరుకున్న విషయం తెలిసిందే. జూన్‌ 15న గల్వాన్‌ లోయలో చేసుకున్న హింసాత్మక ఘటనపై గాయపడిన జవాన్లను పరామర్శించారు. వాస్తవాధీన రేఖ (ఎల్‌ఏసీ) వెంట తాజా పరిస్థితుల గురించి ఆరా తీశారు. మరోవైపు మోదీ లద్దాఖ్ ఆకస్మిక  పర్యటనతో చైనాతో పాటు పాకిస్తాన్‌, నేపాల్‌కు మోదీ గట్టి సందేశం ఇచ్చారు.

దేశంలో మహమ్మారి కరోనా వైరస్‌ ఉదృతి రోజురోజుకు పెరుగుతోంది. కొన్ని రోజులుగా నిత్యం 19వేలకు పైగా కొత్త పాజిటివ్‌ కేసులు బయటపడుతున్నాయి. తాజాగా రికార్డు స్థాయిలో కరోనా కేసులు నమోదయ్యాయి. గడిచిన 24 గంటల్లో 20,903 కొత్త కరోనా పాజిటివ్‌ కేసులు నమోదైనట్లు శుక్రవారం ఉదయం విడుదల చేసిన కరోనా హెల్త్‌ బులిటెన్‌లో వెల్లడించింది. దేశంలో కోవిడ్‌ వెలుగుచూసినప్పటి నుంచి ఇంతపెద్ద మొత్తంలో పాజిటివ్‌ కేసులు నమోదవ్వడం ఇదే తొలిసారి. కొత్త పాజిటివ్‌ కేసులతో కలుపుకొని దేశంలో కరోనా బాధితుల సంఖ్య 6,25,439కు చేరింది. 

అంతేకాకుండా గురువారం ఉదయం నుంచి శుక్రవారం ఉదయం వరకు ఈ మహమ్మారి కారణంగా 379 మంది మృత్యువాత పడ్డారు. దీంతో దేశంలో కరోనా బారినపడి మృతి చెందిన వారి సంఖ్య 18,213కు చేరింది. ఇక దేశంలో ఇప్పటివరకు 3,79,892 మంది కరోనా నుంచి పూర్తిగా కోలుకొని డిశ్చార్జ్‌ కాగా 2,27,439 మంది వివిధ ఆస్పత్రులలో చికిత్స పొందుతున్నారు. ఇక అగ్రరాజ్యం అమెరికాలో కూడా కరోనా విలయతాండవం చేస్తోంది. గడిచిన 24 గంటల్లో రికార్డు స్థాయిలో 54 వేల కొత్త పాజిటివ్‌ కేసులు వెలుగుచూశాయి. ఇప్పటి వరకు ఇంత భారీ స్థాయిలో కరోనా పాజిటివ్‌ కేసులు ఏ దేశంలో కూడా నమోదు కాలేదని రాయిటర్స్‌ సంస్థ పేర్కొంది. 

మహారాష్ట్రలో రికార్డు స్థాయిలో ఒక్క రోజే 6,330 కొత్త కరోనా కేసులు వెలుగుచూశాయి. రాష్ట్రంలో ఇంత పెద్ద మొత్తంలో కేసులు బయటపడటం ఇదే తొలిసారి. ఒక్క ముంబైలోనే కొత్తగా 1554 మందికి వైరస్​ సోకినట్లు నిర్ధారణ అయింది. దీంతో ముంబైలో మొత్తం బాధితుల సంఖ్య 80,262కు చేరగా, రాష్ట్రంలో కరోనా సోకిన వారి సంఖ్య 1.86 లక్షలకు చేరింది. ఇప్పటిదాకా మహమ్మారి వల్ల ఎనిమిది వేల మంది ప్రాణాలు కోల్పోయారు. గత 24 గంటల్లో 124 మంది ప్రాణాలు వదలగా, 8,018 మంది కోలుకుని ఆసుపత్రుల నుంచి డిశ్చార్జ్ అయ్యారు. మహారాష్ట్రలో ప్రస్తుతం కోవిడ్–19 రికవరీ రేటు 54.21 శాతంగానూ, మరణాలు రేటు 4.38 శాతంగానూ ఉంది.

గురువారం బృహన్ ముంబై కార్పొరేషన్ విడుదల చేసిన వివరాల ప్రకారం ఇప్పటిదాకా ముంబైలో 4,686 మంది కోవిడ్​కు బలయ్యారు. కరోనా కేసులు క్రమంగా పెరుగుతుండటంతో మహారాష్ట్ర రాష్ట్రవ్యాప్త లాక్​డౌన్​ను జులై 31 వరకూ పెంచిన సంగతి తెలిసిందే. మహారాష్ట్ర, తమిళనాడు, ఢిల్లీల్లో భారీగా కరోనా కేసులు బయటపడుతుండటంతో ఇండియాలో కేసుల సంఖ్య ఆరు లక్షల మార్కును దాటేసింది. కరోనా బాధిత దేశాల్లో అమెరికా, బ్రెజిల్​, రష్యా, ఇండియా కంటే ముందు ఉన్నాయి.

కోవిడ్‌-19 : 60.73 శాతానికి చేరిన రికవరీ రేటు

కరోనా పాజిటివ్‌ కేసులు పెరుగుతున్నా మహమ్మారి బారినపడి కోలుకునే వారి సంఖ్య గణనీయంగా పెరగడం ఊరట ఇస్తోంది. కోవిడ్‌-19 రోగుల రికవరీ రేటు శుక్రవారం 60.73 శాతానికి చేరిందని ఆరోగ్య మంత్రిత్వ శాఖ పేర్కొంది. గడిచిన 24 గంటల్లో కరోనా వైరస్‌ నుంచి 20,033 మంది కోలుకోగా యాక్టివ్‌ కేసుల కంటే కోలుకున్న వారిసంఖ్య 1,50,000 అధికంగా ఉంది. ఇప్పటివరకూ దేశవ్యాప్తంగా 3,79,891 మంది కరోనా నుంచి కోలుకోగా 2,27,439 యాక్టివ్‌ కేసులున్నాయి.

మరోవైపు కోవిడ్‌-19 శాంపిల్స్‌ పరీక్షల సంఖ్య కూడా రోజురోజుకూ పెరుగుతోంది. గడిచిన 24 గంటల్లో 2,41,576 శాంపిల్స్‌ను పరీక్షించగా ఇప్పటివరకూ మొత్తం 92,97,749 శాంపిల్స్‌ను పరీక్షించారు. మరోవైపు గడిచిన 24 గంటల్లో రికార్డు స్ధాయిలో 20,903 తాజా పాజిటివ్‌ కేసులు నమోదయ్యాయి. తాజా కేసులతో దేశంలో కరోనా బాధితుల సంఖ్య 6,25,439కు చేరింది. ఇక కరోనా వ్యాప్తిని అరికట్టేందుకు చేపట్టాల్సిన చర్యలపై రాష్ట్రాలు, కేంద్రపాలిత ప్రాంతాలతో కేబినెట్‌ కార్యదర్శి అధ్యక్షతన అత్యున్నత సమీక్షా సమావేశం నిర్వహించారు.

భారత ప్రభుత్వం ఒకే ఒక్క నిర్ణయంతో చైనా, పాకిస్తాన్ దేశాల నఢ్డి విరిచేసినంత పని చేసింది. సరిహద్దుల్లో ఉద్రిక్తతల నేపథ్యంలో చైనా నుంచి భారత్‌ విద్యుత్‌ పరికరాలను దిగుమతి చేసుకోబోదని కేంద్ర విద్యుత్‌ శాఖ మంత్రి ఆర్‌కే సింగ్‌ స్పష్టం చేశారు. అలాగే, చైనా, పాకిస్తాన్‌ల నుంచి వచ్చే పరికరాల దిగుమతులను కేవలం తనిఖీల ఆధారంగా అనుమతించేది లేదని పేర్కొన్నారు. తనిఖీల తర్వాతైనా అవసరమైతే అనుమతులు రద్దు చేస్తామన్నారు. రాష్ట్రాల విద్యుత్‌ శాఖల మంత్రులతో శుక్రవారం జరిగిన వర్చువల్‌ సమావేశంలో ఆయన ఈ విషయాలు తెలిపారు. 

‘మనం ఇక్కడ ప్రతీదీ తయారు చేసుకుంటున్నాం. అయినా కూడా భారత్‌ రూ. 71,000 కోట్ల విలువ చేసే విద్యుత్‌ పరికరాలను దిగుమతి చేసుకుంది. ఇందులో రూ.21,000 కోట్ల మేర చైనా నుంచి దిగుమతయ్యాయి. మన దేశంలోకి చొరబడే పొరుగు దేశం నుంచి ఈ స్థాయిలో దిగుమతులను అనుమతించలేం. చైనా, పాకిస్తాన్‌ల నుంచి ఏదీ కొనుగోలు జరిపే ప్రసక్తే లేదు. ఆయా దేశాల నుంచి దిగుమతులకు అనుమతులివ్వబోము. ఈ దిగుమతి చేసుకున్న వాటిల్లో (చైనా నుంచి) ఏ మాల్‌వేర్‌ ఉందో ట్రోజన్‌ హార్స్‌ ఉందో (వైరస్‌లు). వీటి సాయంతో వారు అక్కడెక్కణ్నుంచో మన విద్యుత్‌ వ్యవస్థలను చిన్నాభిన్నం చేయొచ్చు’ అని మంత్రి వ్యాఖ్యానించారు. 

టవర్‌ ఎలిమెంట్లు, కండక్టర్లు, ట్రాన్స్‌ఫార్మర్లు మొదలైనవి భారత్‌లోనే తయారవుతున్నా.. వాటిని దిగుమతి చేసుకోవడం ఆందోళనకరమైన విషయమన్నారు. ‘మీ డిస్కంలు చైనా కంపెనీల నుంచి పరికరాలను దిగుమతి చేసుకుంటున్నాయి. చైనా కంపెనీల నుంచి కొనుగోళ్లు చేయొద్దని కోరుతున్నాం’ అని రాష్ట్రాల విద్యుత్‌ శాఖ మంత్రులకు మంత్రి సూచించారు. స్వయం సమృద్ధి భారత్‌ నినాదంలో భాగంగా ఇక్కడ లభించే ఏ పరికరాన్నీ చైనా నుంచి భారత్‌ దిగుమతి చేసుకోబోదని చెప్పారు. దిగుమతి చేసుకున్న వాటిని కూడా క్షుణ్ణంగా తనిఖీ చేస్తుందని, ఆ తర్వాత అవసరమైతే వాటిని రద్దు కూడా చేయొచ్చని కూడా ఆయన తెలిపారు.

చైనా దిగుమతులకు ముందస్తు అనుమతులు తప్పవు..

చైనా, పాకిస్తాన్‌ వంటి దేశాల నుంచి విద్యుత్‌ పరికరాల దిగుమతులకు ముందస్తుగా అనుమతి తీసుకోవడం తప్పనిసరి చేస్తూ కేంద్ర విద్యుత్‌ శాఖ ఆదేశాలు జారీ చేసింది. భారత్‌తో సరిహద్దులున్న దేశాలు.. ముఖ్యంగా చైనా నుంచి దిగుమతులను తగ్గించే దిశగా ఈ నిర్ణయం తీసుకుంది. దీని ప్రకారం విద్యుత్‌ సరఫరా వ్యవస్థలో వినియోగించేందుకు దిగుమతి చేసుకున్న అన్ని రకాల యంత్రాలు, పరికరాలు, విడిభాగాలతో మాల్‌వేర్, ట్రోజన్లు, సైబర్‌ ముప్పులాంటివి పొంచి ఉన్నాయేమో తెలుసుకునేందుకు, భారత ప్రమాణాలకు అనుగుణంగా ఉన్నాయా లేవా అని చూసేందుకు దేశీయంగా పరీక్షించడం జరుగుతుందని కేంద్ర విద్యుత్‌ శాఖ పేర్కొంది. విద్యుత్‌ శాఖ నిర్దేశించిన అధీకృత ల్యాబొరేటరీల్లో టెస్టింగ్‌ చేయాల్సి ఉంటుంది.

టిక్‌టాక్‌కు... 45 వేల కోట్ల నష్టం! 

చైనా యాప్‌లపై భారత నిషేధం కారణంగా చైనాకు చెందిన బైట్‌డాన్స్‌ లిమిటెడ్‌కు రూ.45,000 కోట్లు(600 కోట్ల డాలర్లు) నష్టం వస్తుందని అంచనా. సరిహద్దుల ఉద్రిక్తతల నేపథ్యంలో టిక్‌టాక్‌తో సహా మొత్తం 59 చైనా యాప్‌లను భారత దేశం నిషేధించిన సంగతి తెలిసిందే. ఈ నిషేధ యాప్‌ల జాబితాలో బైట్‌డాన్స్‌కు చెందిన యాప్‌లు మూడు(టిక్‌టాక్, విగో వీడియో, హెలో యాప్‌) ఉన్నాయి. మిగిలిన యాప్‌ల నష్టాలతో పోల్చితే ఈ మూడు యాప్‌ల నష్టాలే అధికమని కైయాక్సిన్‌గ్లోబల్‌డాట్‌కామ్‌ పేర్కొంది.  విదేశాల్లో అత్యధికంగా ప్రాచుర్యం పొందిన చైనా యాప్‌ల్లో టిక్‌టాక్‌ కూడా ఒకటి. టిక్‌టాక్‌కు చైనా తర్వాత అత్యధిక యూజర్లు ఉన్నది భారత్‌లోనే. ఈ ఏడాది తొలి 3 నెలల కాలంలో 61.1 కోట్ల డౌన్‌లోడ్స్‌ జరిగాయి. ఇది ప్రపంచవ్యాప్త టిక్‌టాక్‌ డౌన్‌లోడ్స్‌లో 30 శాతం.

డిస్కంలకు కాస్త ఊరట

డిస్కంలకు ఆర్థికంగా ఊరటనిచ్చేలా కొత్త పథకాన్ని మంత్రి ప్రకటించారు. ప్రస్తుతం ఉన్న ఉదయ్, డీడీయూజీజేవై, ఐపీడీఎస్‌ పథకాల స్థానంలో ఇది అమల్లోకి వస్తుందని తెలిపారు. కొత్త స్కీమ్‌ కింద డిస్కంల నష్టాలను తగ్గించేందుకు రాష్ట్రాలు తగు ప్రణాళికలు సమర్పించాల్సి ఉంటుంది. నష్టాలను తగ్గించుకునే ప్రణాళికల్లో లేని డిస్కంలకు ఈ పథకం కింద రుణాలు గానీ గ్రాంట్లు గానీ ఇవ్వడం జరగదని సింగ్‌ స్పష్టం చేశారు. ఢిల్లీలో లాగా ప్రభుత్వ రంగ సంస్థ లేదా ప్రైవేట్‌ సంస్థల ద్వారానైనా డిస్కంలను లాభసాటిగా మార్చాల్సిన అవసరం ఉందన్నారు. డిస్కంలకు రూ. 90,000 కోట్ల మేర నిధులు అందిస్తున్నట్లు మంత్రి చెప్పారు. ప్యాకేజీ కింద రాష్ట్రాలు రూ. 93,000 కోట్లు అడిగాయని, ఇప్పటిదాకా రూ. 20,000 కోట్లు మంజూరు చేయడం జరిగిందని ఆయన పేర్కొన్నారు.

ఇండియా-చైనా-భూటాన్‌ ట్రై జంక్షన్‌ ప్రాంతంలో చైనా రోడ్డు నిర్మాణాన్ని భారత్ రెండు నెలలకుపైగా అడ్డుకున్న ఘటనతో చైనా షాక్ తిన్నది. అంతవరకు భారత్‌ను లెక్కచేయని చైనా.. ఇండియా తమను సవాలు చేయడం ఏంటని ఆశ్చర్యపోయింది. దీంతో చైనా నాయకత్వం అప్పటినుంచే తన వ్యూహాల్లో మార్పు తీసుకొచ్చింది. భారత్‌తో పరస్పరం చర్చలు జరపడానికి ముందుకు రావడం దానిలో భాగమే. చైనా వ్యవహారాల నిపుణురాలు ఒకరు ఈ విషయాన్ని ఆలస్యంగానైనా చేరవేయడం సంచలన కారణమైంది.

డోక్లామ్‌పై భారత్ దూకుడును చైనా అస్సలు ఊహించలేదని, పైగా దాదాపు 75 రోజులపాటు డోక్లాం వివాదాన్ని భారత్ కొనసాగించడం చైనాకు షాక్ కలిగించిందని అమెరికాలోని స్టిమ్సన్ సెంటర్‌లో ఈస్ట్ ఆసియా ప్రోగ్రాం సహ డైరెక్టర్ యున్‌ సన్‌ తెలిపారు. మూడేళ్ల క్రితం డోక్లాంలో భారత సైన్యం.. ఇండియా-చైనా-భూటాన్‌ ట్రై జంక్షన్‌ ప్రాంతంలో చైనా రోడ్డు నిర్మాణాన్ని అడ్డుకుంది. అయితే భారత్‌ చర్యలకు చైనా ఆశ్చర్యపోయిందని.. ఇండియా తమను సవాలు చేయడం ఏంటని చైనా షాక్‌కు గురయ్యిందని ఆ దేశ నిపుణురాలు, అమెరికాలోని స్టిమ్సన్ సెంటర్‌లో ఈస్ట్ ఆసియా ప్రోగ్రాం సహ డైరెక్టర్ యున్‌ సన్‌ తెలిపారు. 

భారతదేశానికి చెందిన ఓ ఆంగ్ల మీడియా సంస్థకు ఇచ్చిన ఇంటర్వ్యూలో ఆమె ఈ విషయాలను వెల్లడించారు. అంతేకాక అప్పటి నుంచి చైనా వ్యూహాల్లో మార్పు వచ్చిందని..  భారత్‌తో పరస్పరం చర్చలు జరపడానికి ముందుకు రావడం దానిలో భాగమే అన్నారు యున్‌ సన్‌. భారత్‌, చైనా మధ్య 2017లో డోక్లాం ప్రతిష్టంభన గురించి యున్ సన్ మాట్లాడుతూ.. ‘2017లో డోక్లాం వివాదం చైనాని ఆశ్చర్యానికి గురి చేసింది. ఎందుకంటే భారతదేశం తనను వ్యతిరేకిస్తుందని.. దాదాపు 72-73 రోజుల పాటు వివాదం నడుస్తుందని చైనా ఊహించలేదు. అది కూడా భూటాన్‌ సమీపంలోని బంజరు భూమి కోసం భారత్‌ తనను వ్యతిరేకిస్తుందని అస్సలు అనుకోలేదు. నిజంగా ఇది చైనాకు షాక్‌ లాంటిదే’ అన్నారు యున్‌ సన్‌.

వాస్తవాధీన రేఖ (ఎల్‌ఏసీ) వెంట తూర్పు లడాఖ్‌లో కొనసాగుతున్న చైనా తాజా దురాక్రమణ గురించి యున్‌ సన్‌ను ప్రశ్నించగా.. ‘సరిహద్దు సమీపంలో భారతదేశం  కార్యకలాపాలపై స్పందించాల్సిన అవసరం ఉందని చైనా అధికారులు భావించారు. దీని గురించి మీరు ఒక చైనా ప్రభుత్వ అధికారిని అడిగితే .. వారి సమాధానం ఎలా ఉంటుందంటే.. ‘వాస్తవ నియంత్రణ రేఖ వెంట భారతదేశం చర్యలు మాకు అంగీకారం కావు. వాటిపై చైనా స్పందిస్తోంది’ అని సమాధానమిస్తారు’ అన్నారు యున్‌ సన్‌. 

ప్రస్తుతం వివాదాస్పదంగా మారిన ఎల్‌ఏసీ వెంబడి ఉన్న ప్రదేశాల గురించి ఎన్నో ఏళ్లుగా వివాదం కొనసాగుతుందని తెలిపారు. అంతేకాక ‘భారతదేశం తమ ప్రాంతంలో రోడ్లు, ఇతర మౌలిక సదుపాయాల ప్రాజెక్టులను నిర్మిస్తోందని చైనీయులు గుర్తించినప్పుడు ఎలా స్పందించాలి అనేది వారి ఇష్టం. భారతదేశం తమను వెన్నుపోటు పొడిచిందని చైనీయులు భావించారు. ప్రస్తుతం భారతదేశం చైనాను ఒక అసాధారణస్థితిలో పెడుతోంది. అలాంటప్పుడు చైనా దూకుడుగా స్పందించి భారతదేశంపై దాడి చేయాలి.. లేదా ఏమి చేయకుండా భూభాగాన్ని వదులుకోవాలి’ అని యున్ సన్ అన్నారు. 

భారత్ - రష్యా ఎప్పటినుంచో స్నేహసంబంధాలతో కొనసాగుతున్నాయి. తాజాగా మోడీ అధికారంలోకి వచ్చాక ఇరుదేశాల మధ్య వ్యూహాత్మక భాగస్వామ్యం కొనసాగుతోంది. తాజాగా రష్యా అధ్యక్షుడిగా వ్లాదిమిర్‌ పుతిన్‌ మరో 16 ఏండ్లపాటు కొనసాగనున్నారు. ఈ మేరకు తీసుకువచ్చిన రాజ్యాంగ సంస్కరణలకు రష్యా ప్రజలు ఆమోదం తెలిపిన సంగతి తెలిసిందే. 

పుతిన్‌ రష్యా అధ్యక్షుడిగా 2036 వరకు కొనసాగేలా రాజ్యాంగ సంస్కరణలు చేశారు. దీనిపై ప్రజాభిప్రాయ సేకరణకు వారం రోజులపాటు ఎన్నికలు నిర్వహించారు. ఇవి బుధవారంతో ముగిశాయి. ఇందులో 60 శాతం మంది తమ ఓటు హక్కును వినియోగించుకున్నారు. తాజా సంస్కరణలకు అనుకూలంగా 76.9 శాతం మంది ఓటేశారు. 

పుతిన్‌ అధ్యక్ష పదవీకాలం 2024లో ముగియనుంది. కాగా, ఈ ఎన్నికలు ఏప్రిల్‌ 22నే జరగాల్సి ఉన్నప్పటికీ కరోనా వైరస్‌ విజృంభణతో వాయిదావేశారు. ప్రస్తుతం 79 ఏండ్ల వయస్సులో ఉన్న పుతిన్‌, 2000 సంవత్సరం నుంచి రష్యా అధ్యక్షుడిగా కొనసాగుతున్నారు. ఈ సందర్భంగా మోడీ ఫుతిన్ కి శుభాకాంక్షలు తెలిపారు. రష్యా అధ్యక్షుడు వ్లాదిమిర్‌ పుతిన్‌తో ప్రధాని మోదీ చర్చలు జరిపారు.ఇరు దేశాల అధ్యక్షులు ఫోన్‌ ద్వారా సంప్రదింపులు జరిపారు. ఈ సందర్భంగా కీలక అంశాలు చర్చకు వచ్చినట్టు తెలుస్తోంది.

తాజాగా భారత్- చైనా మధ్య నెలకొన్న ఉద్రిక్తతలు, చైనా సైనికుల దాడి , భారతసైనికులు మరణించిన ఉదంతాలను ప్రస్తావించారు. సరిహద్దులో ఉద్రిక్తత వాతావరణం నెలకొని ఉన్న వేళ ఇరు దేశాల చర్చలకు ప్రాధాన్యం సంతరించుకుంది. రష్యాలో రాజ్యాంగ సవరణలపై విజయవంతంగా ఓటింగ్‌ను పూర్తి చేసినందుకు అధ్యక్షుడు పుతిన్‌ను ప్రధాని అభినందించారు. రెండో ప్రపంచ యుద్ధంలో విజయం సాధించి 75 సంవత్సరాలు పూర్తయిన సందర్భంగా జూన్24న మాస్కోలో విక్టరీ పరేడ్ ఘనంగా నిర్వహించారు. ఈ వేడుకల్లో భారత్ తరఫున రక్షణ శాఖా మంత్రి రాజ్‌నాథ్ సింగ్ పాల్గొన్నారు. ఈ వేడుకల గురించి కూడా పుతిన్‌తో మోదీ ప్రస్తావించారు. 

ఈ ఏడాది చివర్లో భారత్‌లో ఇరుదేశాల మధ్య వార్షిక ద్వైపాక్షిక సదస్సు నిర్వహించే అంశంపై ఇరువురు నేతలు చర్చించారు. ద్వైపాక్షిక సదస్సుకు భారత్‌కు రావాలని రష్యా అధ్యక్షుడు పుతిన్‌ను ప్రధాని మోదీ ఆహ్వానించగా... పుతిన్ అందుకు ధన్యవాదాలు తెలిపారు. కోవిడ్ 19 ప్రభావం తగ్గించేందుకు ఇరుదేశాలు కలిసి పనిచేయాలని నిర్ణయించాయి. 

ప్రధానమంత్రి నరేంద్రమోడీ లడాఖ్ చేరుకున్నారు. ఆయన పర్యటన గురించి రక్షణ శాఖ అధికారులకు కూడా తెలీకపోవడం విశేషం. వాస్తవాధీన రేఖ వద్ద చైనాతో యుద్ధ వాతావరణం నెలకొన్న ప్రస్తుత పరిస్థితుల్లో ఆయన లఢక్ పర్యటనకు పూనుకున్నారు. ఢిల్లీ నుంచి ప్రత్యేక విమానంలో బయలుదేరి వెళ్లిన ఆయన లేహ్ చేరుకున్నారు. ఈ పర్యటనలో ఆయన వెంట చీఫ్ ఆఫ్ డిఫెన్స్ స్టాఫ్ (సీడీఎస్) బిపిన్ రావత్, ఆర్మీ చీఫ్ మనోజ్ ముకుంద్ నరవణె ఉన్నారు. నరేంద్ర మోడీ లేహ్ పర్యటనకు వెళ్తున్నట్లు చివరి నిమిషం వరకూ ఎవరికీ తెలియదు.

లడాఖ్ లో తాజా పరిస్థితిని అంచనా వేసేందుకు మోడీ రంగంలోకి దిగారు. రక్షణ శాఖ మంత్రి రాజ్‌నాథ్ సింగ్‌కు కూడా మోడీ పర్యటనకు సంబంధించిన సమాచారం తెలియదంటే.. ఆయన ఎంత హఠాత్తుగా ఈ నిర్ణయాన్ని తీసుకున్నారనేది అర్థం చేసుకోవచ్చు. లేహ్ చేరుకున్న వెంటనే ఆయన 14 కార్ప్స్ సైన్యాధికారులతో సమావేశం అయ్యారు.

చైనా దుశ్చర్యలను ఎండగడుతున్న భారత్ డ్రాగన్ దేశానికి సరైన సమాధానం చెప్పేందుకు వ్యూహాత్మకంగా వ్యవహరిస్తోంది. అక్కడ మన దేశం హై పవర్‌‌ బోట్స్‌ను మోహరిస్తోంది.తూర్పు లడాఖ్‌లోని పాంగోంగ్‌ సరస్సు పీపుల్స్‌ లిబరేషన్‌ ఆర్మీ దురాక్రమణకు కేంద్రంగా ఉంది, భూభాగాన్ని విడిచిపెట్టాలని భారతీయులని బెదిరిస్తోంది.ఒక వైపు చర్చలు జరుపుతున్న చైనా తన సైన్యాన్ని బోర్డర్‌‌లో మోహరిస్తున్నట్లు తెలుస్తోంది

దీంతో అక్కడ పటిష్టమైన చర్యలు తీసుకుంటున్నారు. ఈ మేరకు బరువును మోయగలిటే విమానాలు, హెలికాప్టర్ల ద్వారా భారీ సంఖ్యలో వాటిని అక్కడికి చేరుస్తున్నారు. ఇప్పటికే టీ–90 లాంటి బాహుబలి యుద్ధ ట్యాంక్‌లను కూడా బోర్డర్‌‌లో ఉంచారు. లడాఖ్ లో ఏం చేయాలనేదానిపై మోడీ రక్షణ శాఖ అధికారులతో చర్చించారు. సరిహద్దుల్లో ఉద్రిక్తతలు పెరిగిన వేళ ప్రధాని టూర్ ప్రాధాన్యత సంతరించుకుంది. గాయపడ్డ సైనికులను ఆయన పరామర్శించారు. సైనిక అధికారులతో కలిసి సరిహద్దులను పరిశీలించారు. ఆర్మీ కమాండెంట్లతో మోడీ భేటీ అయి వ్యూహాలను అమలుచేయనున్నారు.