సీఎం కేసీయార్ ఆరోగ్యంపై పిటిషన్... హైకోర్టు ఫైర్

11-07-202011-07-2020 10:40:09 IST
Updated On 11-07-2020 11:39:57 ISTUpdated On 11-07-20202020-07-11T05:10:09.495Z11-07-2020 2020-07-11T05:09:57.877Z - 2020-07-11T06:09:57.834Z - 11-07-2020

తెలంగాణలో కరోనా కేసులు పెరిగిపోవడంతో ఆందోళన వ్యక్తం అవుతోంది. తాజాగా సీఎం కేసీయార్ ఎర్రవల్లి ఫాంహౌస్ కు వెళ్లిపోయారు. కేసీయార్ ఎక్కడ అంటూ సోషల్ మీడియా వేదికగా ప్రశ్నలు ఉదయిస్తున్నాయి.  ఈనేపథ్యంలో కేసీయార్ ఆరోగ్యంపై హైకోర్టులో పిటిషన్ దాఖలైంది. అయితే ఈ పిటిషన్ పై కోర్టు కీలక వ్యాఖ్యలు చేసింది.

రాజకీయ జిమ్మిక్కులకు హైకోర్టును వేదికగా మారనివ్వబోమని హైకోర్టు ధర్మాసనం తేల్చిచెప్పింది. సీఎం కేసీఆర్‌ ఆరోగ్య వివరాలు కోరుతూ నవీన్‌కుమార్‌ అనే వ్యక్తి దాఖలు చేసిన పిటిషన్‌పై విచారణకు హైకోర్టు నిరాకరించింది. శుక్రవారం ఉద యం కేసుల ప్రస్తావన సమయంలో తాము 8వ తేదీన పిటిషన్‌ దాఖలు చేశామని, ఇంకా విచారణకు రాలేదని పిటిషనర్‌ తరఫు న్యాయవాది పేర్కొన్నారు. 

ఈ పిటిషన్‌ను లంచ్‌ మోషన్‌లో విచారణకు స్వీకరించాలని చీఫ్‌ జస్టిస్‌ రాఘవేంద్రసింగ్‌ చౌహాన్‌, జస్టిస్‌ బీ విజయ్‌సేన్‌రెడ్డి నేతృత్వంలోని ధర్మాసనానికి విజ్ఞప్తి చేశారు. ‘ముఖ్యమంత్రి ఆరోగ్యంగా, ఆనందంగా ఉండాలి. ఆయన ఆరోగ్యం గురించిన ఏదైనా సమాచారం ఉంటే అధికార వర్గాలు సమయానుగుణంగా తెలియజేస్తాయి.

ఈ అంశంలో అత్యవసరం ఏమున్నది? ’ అని ప్రశ్నించింది. ‘నా కోర్టును రాజకీయ జిమ్మిక్కులకు వేదిక కానివ్వను. ప్రస్తుతం అత్యవసర కేసులు నిబంధనల ప్రకారం లిస్ట్‌ అయితేనే విచారణ చేపడతాం’ అని చీఫ్‌ జస్టిస్‌ ఘాటుగా స్పందించారు. ముఖ్యమంత్రి కనిపించక పోతే హెబియస్ కార్పస్ ధాఖలు చేసుకోవాలని పిటిషనర్‌కు హైకోర్టు సూచించింది. సీఎం కేసీఆర్‌ పై అనుచిత వ్యాఖ్యలు చేసిన నవీన్‌కుమార్‌పై నారాయణపేట జిల్లా కోటకొండ గ్రామానికి చెందిన కావలి వెంకటేశ్‌ శుక్రవారం పోలీసులకు ఫిర్యాదు చేశారు. నవీన్‌కుమార్‌ ఓ యూట్యూబ్‌ చానల్‌ను ప్రారంభించి ప్రభుత్వంపై, సీఎం కేసీఆర్‌పై, టీఆర్‌ఎస్‌ కార్యకర్తలపై అనుచిత వ్యాఖ్యలు చేస్తున్నారని పేర్కొన్నారు.