భారత్‌లో రెండు కరోనా వైరస్ కేసులు... హైఅలర్ట్

02-03-202002-03-2020 18:41:54 IST
Updated On 03-03-2020 15:59:22 ISTUpdated On 03-03-20202020-03-02T13:11:54.568Z02-03-2020 2020-03-02T13:11:46.442Z - 2020-03-03T10:29:22.463Z - 03-03-2020

ప్రపంచవ్యాప్తంగా మృత్యుఘంటికలు మోగిస్తోంది కోవిడ్ 19 వైరస్. తాజాగా ఈ వైరస్ తెలంగాణలోకి ప్రవేశించింది. భారత్‌లో కొత్తగా రెండు కరోనా కేసులు నమోదయ్యాయని కేంద్ర వైద్యఆరోగ్యశాఖ ప్రకటించింది. దుబాయ్ నుంచి హైదరాబాద్‌కి వచ్చిన ఓ వ్యక్తికి కరోనా వైరస్ ఉందని తెలిపింది. అంతేకాకుండా ఢిల్లీలో మరో వ్యక్తికి కరోనావైరస్ సోకిందని కేంద్రం ఓ ప్రకటనలో తెలిపింది.

 కరోనావైరస్ సోకిన ఢిల్లీ వ్యక్తి ఇటలీ నుంచి వచ్చాడని కేంద్రం వివరించింది. ప్రస్తుతం వీరిద్దరిని ఐసోలేషన్ వార్డుల్లో ఉంచి చికిత్స అందిస్తున్నారు. కోవిడ్ అనుమానితులను వెంటనే ఆస్పత్రులకు తరలించేందుకు అప్రమత్తంగా ఉండాలని కేంద్రం సూచించింది. ఆదివారం దుబాయ్‌ నుంచి హైదరాబాద్‌ వచ్చిన ఐదుగురికి కోవిడ్‌-19 పరీక్షలు జరపగా నలుగురికి నెగిటివ్‌గా తేలింది.

వారిలో ఒకరికి మాత్రమే పాజిటివ్‌ వచ్చినట్లు నిర్ధారించారు. వీరిని గాంధీ ఆసుపత్రిలోని ఐసోలేషన్‌ వార్డులో ఉంచి ప్రత్యేకంగా వైద్య పరీక్షలు నిర్వహిస్తున్నారు. కరోనా కేసు నమోదు కావడంతో అప్రమత్తమైన రాష్ట్ర ప్రభుత్వం ఉన్నతాధికారులతో అత్యవసర సమావేశం ఏర్పాటు చేసింది. గాంధీ ఆస్పత్రి వైద్యులు అప్రమత్తం అయ్యారు. ఇటు ఏపీలోనూ కోవిడ్ 19 బారిన పడకుండా జాగ్రత్తలు తీసుకోవాలని ఏపీ వైద్య ఆరోగ్య శాఖ అధికారులను ఆదేశించారు మంత్రి ఆళ్ల నాని.

తెలంగాణ రాష్ట్రంలో కోవిడ్ వైరస్ కేసు నమోదు కావడంతో వైద్య ఆరోగ్య శాఖ అధికారులతో ఫోన్లో సమీక్ష చేశారు మంత్రి ఆళ్ల నాని. రాష్ట్రవ్యాప్తంగా అన్ని జిల్లా కేంద్ర ప్రభుత్వ ఆసుపత్రులలో ఇప్పటికే ఏర్పాటు చేసిన స్పెషల్ వార్డులలో  కోవిడ్ 19 వైరస్ వ్యాధికి సంబంధించి మందులు,పరికరాలు ఉండేలా చర్యలు తీసుకోవాలని ఆదేశించారు.