తెలంగాణ‌లో ఇంట‌ర్ ఫ‌లితాలు.. ఫస్టియర్ 60 శాతం.. సెకండియర్ 69 శాతం

18-06-202018-06-2020 15:27:40 IST
Updated On 18-06-2020 18:51:30 ISTUpdated On 18-06-20202020-06-18T09:57:40.802Z18-06-2020 2020-06-18T09:53:02.506Z - 2020-06-18T13:21:30.225Z - 18-06-2020

తెలంగాణ‌లో విద్యార్ధులు ఎంతో ఉత్కంఠగా ఎదురుచూస్తున్న ఇంట‌ర్ ఫ‌లితాలు విడుద‌ల‌య్యాయి.  ఇంటర్ మొదటి సంవత్సరంలో 60.01 శాతం, ద్వితీయ సంవ‌త్స‌రంలో 68.86 శాతం ఉత్తీర్ణ‌త సాధించారు. రాష్ట్ర విద్యాశాఖ మంత్రి సబితా ఇంద్రారెడ్డి నాంపల్లి ఇంటర్మీడియెట్ కార్యాలయంలో మధ్యాహ్నం 3 గంటలకు ఈ ఫలితాలను విడుదల చేశారు. ఇంటర్‌ ప్రథమ, ద్వితీయ సంవత్సర పరీక్ష ఫలితాలను ఈ ఏడాది ఒకేసారి విడుదల చేశారు.

రాష్ట్రవ్యాప్తంగా సుమారు 9.50 లక్షలమంది విద్యార్థులు పరీక్షలకు హాజరయ్యారు. రెండేళ్ళ ఫలితాలను ఒకేమారు విడుదల చేసేందుకు అధికారులు సిద్ధపడ్డారు. లాక్ డౌన్ వున్నా త్వరగానే ఫలితాలు విడుదలచేశామని మంత్రి తెలిపారు. ఈ సారి కూడా బాలికలే పై చేయి సాధించారు. బాలికలు మొదటి సంవత్సరంలో 67.4 శాతం పాసవ్వగా బాలురు 52.30 శాతం ఉత్తీర్ణత సాధించారు.సెకండియర్‌లో బాలికలు 75.15, బాలురు 62.10 శాతం ఉత్తీర్ణత సాధించారు.తొలి ఏడాది 75 శాతం ఉత్తీర్ణతతో మేడ్చల్ జిల్లా ఫస్ట్, రెండో ఏడాది ఫలితాల్లో 76 శాతం ఉత్తీర్ణతతో కొమురం భీం జిల్లా మొదటి స్థానంలో నిలిచిందని మంత్రి సబితా ఇంద్రారెడ్డి తెలిపారు. సప్లిమెంటరీ పరీక్షలు ఎప్పుడు నిర్వహించేది త్వరలో ప్రకటిస్తామన్నారు మంత్రి. 

ఈ ఫలితాలను తెలంగాణ ఇంటర్ బోర్డు అధికారిక వెబ్‌సైట్‌ https://tsbie.cgg.gov.in/ తో పాటు ఇతర వెబ్‌సైట్లలో తెలుసుకోవచ్చు. అలాగే తెలంగాణ ఇంటర్ బోర్డు అధికారిక యాప్‌లో కూడా తెలుసుకోవచ్చు. ఇందుకోసం విద్యార్థులు ముందుగా గూగుల్ ప్లేస్టోర్‌లో TSBIE m-Services యాప్‌ను డౌన్‌లోడ్ చేసుకోవాలి. ఈ యాప్ సైజ్ 4 ఎంబీ లోపే ఉంటుంది. ఇంటర్‌ఫేజ్‌ కూడా సులభంగా ఉంటుంది. ఫలితాలు విడుదలైన వెంటనే ఈ యాప్‌లో చెక్‌ చేసుకోవచ్చు. ఎలాంటి సాంకేతిక ఇబ్బందులకు తావులేకుండా అధికారులు ఏర్పాట్లు చేశారు.

TSBIE m-Services యాప్ ఓపెన్ చేసిన వెంటనే Results ఆప్షన్ పై క్లిక్ చేయాలి. ఆ తర్వాత విద్యా సంవత్సరాన్ని సెలక్ట్‌ చేసుకుని హాల్ టికెట్ నెంబర్ ఎంటర్ చేయాలి. అనంతరం Search బటన్‌ క్లిక్‌ చేస్తే ఫలితాలు కనిపిస్తాయి. విద్యార్థుల కోసం తెలంగాణ రాష్ట్ర ఇంటర్మీడియట్ విద్యామండలి ప్రత్యేకంగా రూపొందించిన యాప్ ఇది.