కానిస్టేబుళ్లకు హోంమంత్రి ప్రశంసలు

17-07-202017-07-2020 14:34:59 IST
2020-07-17T09:04:59.475Z17-07-2020 2020-07-17T09:04:57.492Z - - 14-04-2021

ఒళ్లు తుడిచి.. షర్ట్ తొడిగి.. ఛాయ్ తాగించి.. వర్షంలో తడిసిన ఓ అభాగ్యుడికి మన భాగ్యనగర పోలీసులు చేసిన సపర్యలివి. చిన్న పిల్లాడికి చేసినట్లు అతడికి సేవ చేశారు. నెటిజన్ల నీరాజనాలు అందుకుంటున్నారు. 

బాధితుడు గత మూడు రోజులుగా వర్షంలో తడుస్తూ ఓ దుకాణం ముందు పడుకున్నాడని స్థానికులు తెలిపారు. హైదరాబాద్‌లోని చాంద్రాయణగుట్ట పోలీస్ స్టేషన్ పరిధిలో ఈ ఘటన చోటు చేసుకుంది. 

తలదాచుకోవడానికి గూడు లేక వర్షంలో తడిసి ముద్దవుతున్న ఓ వ్యక్తిని గమనించిన కానిస్టేబుళ్లు బి రమేశ్, ఎండీ సయ్యద్.. పరుగు పరుగున అతడి వద్దకు చేరుకున్నారు.

వర్షానికి తడవకుండా అతడిని ఓ హోటల్ వద్దకు తీసుకొచ్చి టీషర్ట్‌తో ఒళ్లు తుడిచారు. ఆ తర్వాత అతడికి షర్ట్ వేశారు. కానిస్టేబుళ్ల సపర్యలు గమనించి అక్కడే ఉన్న స్థానికులు కూడా చేయూత అందించారు.

శానిటైజర్‌ను తీసుకొచ్చి పోలీసులకు అందించాడు ఓ వ్యక్తి. జీహెచ్‌ఎంసీలో కరోనా వైరస్ విజృంభిస్తున్న నేపథ్యంలో తమ చేతులు శానిటైజ్ చేసుకున్న కానిస్టేబుళ్లు ఆ వ్యక్తికి కూడా శానిటైజ్ చేశారు.

ఆ తర్వాత అతడికి ఛాయ్ తాగిపించి ఉస్మానియా ఆస్పత్రికి తరలించారు. పోలీసులు అతడి వివరాల గురించి ఆరా తీయగా.. తన పేరు శేఖర్ అని మాత్రమే చెప్పగలిగినట్లు సమాచారం.

నిర్భాగ్యుడి పట్ల మానవత్వం ప్రదర్శించిన కానిస్టేబుళ్లిద్దరినీ హోం మంత్రి మహమూద్ అలీ ప్రశంసించారు.