‘మహా’ సంగ్రామంలో కాంగ్రెస్ భవిష్యత్తేంటి?

06-10-201906-10-2019 13:31:16 IST
2019-10-06T08:01:16.319Z06-10-2019 2019-10-06T08:00:40.233Z - - 12-04-2021

దేశమంతా కాషాయమయం అవుతోంది. రెండవసారి అధికారంలోకి వచ్చాక బీజేపీ మరిన్ని రాష్ట్రాలకు విస్తరించాలని తెగ ఆరాటపడుతోంది. మహారాష్ట్రలో మళ్ళీ విజయఢంకా మోగించాలని బీజేపీ ప్లాన్ చేస్తోంది. అందులో భాగంగా శివసేన-బీజేపీ కూటమి తమ ప్రయత్నాలను మరింత ముమ్మరం చేసింది. ఇటు కాంగ్రెస్ సైతం ఏ అవకాశాన్నీ వదులుకోదలుచుకోవడం లేదు.

మహారాష్ట్ర ఎన్నికల నేపథ్యంలో మహారాష్ట్ర యూత్‌ కాంగ్రెస్‌ యువతకు గాలం వేసింది.  తాము అధికారంలోకి వస్తే నిరుద్యోగ యువతకు నెలకు రూ. 5,000 నిరుద్యోగ భృతి ఇస్తామని ప్రకటించింది. రాష్ట్రంలోని సంస్థల్లో 80 శాతం ఉద్యోగాలు స్థానిక యువతకే ఇస్తామని హామీ ఇచ్చింది.

ఉన్నత విద్య చదివే యువతకు, ఇతర దేశాల్లో ఉన్నత విద్యను అభ్యసించేవారికి స్కాలర్‌షిప్‌లు ఇస్తామని ప్రకటించింది.దివ్యాంగులైన యువత ఉన్నత విద్యకు అయ్యే మొత్తం తామే భరిస్తామని కాంగ్రెస్ ప్రకటించడంతో బీజేపీ కూడా ఇలాంటి హామీల వైపు ఫోకస్ పెడుతోంది. 

‘మేలుకో మహారాష్ట్ర.. రేపటి కోసం ఇప్పుడే పనిచేయి’ అన్న ప్లాట్‌ఫాం కింద మూడు కోట్ల మంది యువత పాల్గొన్నారని, వారి ఆలోచన ప్రతిబింబమే తాము ప్రకటించిన యూత్‌ కాంగ్రెస్‌ మేనిఫెస్టో అని యూత్‌ కాంగ్రెస్‌ అధ్యక్షుడు సత్యజీత్‌ తంబే అంటున్నారు. అంతేకాదు, యువత లక్ష్యంగా విద్యార్థులకు ఉచిత బస్‌ సౌకర్యం వంటివి కల్పిస్తామని హామీ ఇచ్చారు. లైఫ్‌స్టైల్‌ మేనేజ్‌మెంట్, సివిక్స్‌ వంటి సబ్జెక్టులను విద్యలో భాగం చేస్తామన్నారు.

ఇదిలా ఉంటే... ఎన్నికలకు మొత్తం 5534 మంది అభ్యర్థులు తమ నామినేషన్లు దాఖలు చేశారు. ముఖ్యమంత్రి దేవేంద్ర ఫడ్నవీస్‌, శివసేన అభ్యర్థి ఏక్‌నాథ్‌ షిండే, ఎన్‌సిపి నేత అజిత్‌ పవార్‌ నామినేషన్లు వేశారు. ఈ ఎన్నికలలో బీజేపీ-కాంగ్రెస్ మధ్యే ప్రధానంగా పోటీ ఉంటుందని భావిస్తున్నారు.