పవన్ ఢిల్లీ టూర్.. అనూహ్య పరిణామాలుంటాయా?

15-11-201915-11-2019 13:43:08 IST
Updated On 15-11-2019 16:58:45 ISTUpdated On 15-11-20192019-11-15T08:13:08.769Z15-11-2019 2019-11-15T08:13:06.759Z - 2019-11-15T11:28:45.658Z - 15-11-2019

ప్రస్తుతం ఏపీలో ప్రధాన ప్రతిపక్షం టీడీపీ ప్రభుత్వం మీద ఎంత పోరాటం చేస్తుందో జనసేన పార్టీ నుండి ఆ పార్టీ అధినేత పవన్ కళ్యాణ్ అంతకు రెట్టింపు పోరాటమే చేస్తున్నారు. నల్లమలలో యురేనియం తవ్వకాలపై మొదలైన పవన్ పోరాటం.. సమస్య మారుతున్నా పోరాటం మాత్రం ఆపడం లేదు. ఇసుక సమస్యపై తీవ్రంగా స్పందించిన జనసేన లాంగ్ మార్చ్ తలపెట్టి ప్రభుత్వానికి తలపోటు తెప్పించింది.

ఇక తాజాగా సీఎం జగన్మోహన్ రెడ్డి తీసుకొచ్చిన తెలుగు మీడియా రద్దు నిర్ణయంపై కూడా జనసేన అధినేత పవన్ కళ్యాణ్ తీవ్రంగానే స్పందించారు. అదే సమయంలో సీఎం స్థాయి వ్యక్తి తనను వ్యక్తిగతంగా టార్గెట్ చేసి మాట్లాడినా పవన్ సంయమనంతోనే చురకలంటిస్తూ తిప్పికొట్టారు. ఈ వ్యవహారంలో సోషల్ మీడియాలో పెద్ద యుద్ధమే నడుస్తుంది. ఇది నేతలను మించి కుటుంబాలను కూడా అందులోకి ఈడ్చేసి కంపు కొట్టించేశారు.

సోషల్ మీడియా వ్యవహారాన్ని పక్కనపెడితే రాష్ట్రంలో ఇసుక కొరతతో కార్మికుల ఆత్మహత్యలు, సంప్రదాయాలకు విరుద్ధంగా బలవంతపు పోకడలు, రాజధాని వ్యవహారంపై పవన్ కళ్యాణ్ కేంద్ర పెద్దల దృష్టికి తీసుకెళ్లాలని భావించారని ఆ మధ్య గూగుసలు వినిపించాయి. అయితే అది అప్పటి నుండి సాధ్యం కాలేదు. కానీ ఇప్పుడు ఆకస్మాత్తుగా పవన్ కళ్యాణ్ ఢిల్లీ టూర్ ఖరారైంది.

పవన్ ఢిల్లీ ప్రయాణం అధికారికం కాదని.. ఓ ప్రైవేట్ కార్యక్రమం కోసమేనని జనసేన వర్గాలు చెబుతున్నా.. అంతకు మించి ఢిల్లీలో ఏదో జరగబోతుందని పవన్ సన్నిహిత వర్గాలు గుసగుసలాడుకుంటున్నాయి. పవన్ ఈ టూర్లోనే ప్రధాని మోడీ, హోంమంత్రి అమిత్ షాలను కలిసే అవకాశం ఉందని, ఇప్పటికే అపాయింట్ మెంట్లు కూడా ఖరారయ్యాయని రాజకీయ వర్గాలలో వినిపిస్తుంది.

2014 ఎన్నికలకు ముందు పవన్ అహ్మాదాబాద్ వెళ్లి మోడీతో ప్రత్యేకంగా సమావేశమై టీడీపీ-బీజేపీ కూటమికి మద్దతిచ్చారు. ఆ ఎన్నికల ప్రచారంలో కూడా పవన్ మోడీతో సన్నిహితంగానే మెలిగారు. గత ఐదేళ్లలో విబేధించిన పవన్ మోడీని మాత్రం తనకు ఎంతో ఇష్టమైన వ్యక్తిగా పలుసందర్భాలలో పేర్కొన్నారు. ఈ సందర్భంగానే ఇప్పుడు ఢిల్లీలో అపాయింట్ మెంట్లు ఖరారయ్యాయని చెప్తున్నారు.

ఇక పవన్ ఢిల్లీ పర్యటన అనంతరం రాష్ట్రంలో అనూహ్య పరిస్థితిలు రానున్నట్లుగా ప్రచారం చేస్తున్నారు. మరి పవన్ ఢిల్లీ పెద్దలకు ఏం చెప్పబోతున్నారు? అసలు ఢిల్లీ ఎందుకు వెళ్తున్నారు? బీజేపీ పెద్దలను కలుస్తారా? లేక ప్రైవేట్ కార్యక్రమంతోనే వెనుదిరుగుతారా? ఏపీ రాజకీయాలలో పవన్ ఢిల్లీ టూర్ కాసింత ఉత్కంఠను కలిగిస్తుందని చెప్పకతప్పదు.