కరోనా చీకట్లు తరిమేయండి.. దీపాలు వెలిగించండి

03-04-202003-04-2020 09:18:24 IST
Updated On 03-04-2020 11:46:59 ISTUpdated On 03-04-20202020-04-03T03:48:24.522Z03-04-2020 2020-04-03T03:48:19.993Z - 2020-04-03T06:16:59.211Z - 03-04-2020

కరోనా వైరస్ పై దేశం చేస్తున్న పోరాటం అందరికీ స్ఫూర్తిదాయకంగా ఉందన్నారు ప్రధాని మోడీ.  మార్చి 22 వ తేదీన జనతా కర్ఫ్యూ దేశమంతా ఒకటేనని చాటిచెప్పామని, మనం చేసినపని ఇతర దేశాలకు ఆదర్శంగా నిలిచిందన్నారు. ఏప్రిల్ 5న ఆదివారం కరోనా చీకట్లను తరిమేయాలి.. రాత్రి 9 గంటలకు 9 నిమిషాల పాటు లైట్లు ఆపేయాలని ప్రధాని నరేంద్ర మోడీ అన్నారు. ఆరోజున  లైట్లు ఆపేసి.. కొవ్వొత్తి, దీపం లేదా మొబైల్ ఫ్లాష్ లైట్లు ఆన్ చేయండి.. కరోనా చీకట్లను తరిమేయాలి, ఎవరు, ఎక్కడ ఉన్నా లైట్లు ఆపేయండి అని ప్రధాని మోడీ పిలుపునిచ్చారు. 

130 కోట్లమంది ఒకేస్ఫూర్తితో ముందుకు సాగండి అంటూ యావత్ జాతికి మోడీ వీడియో సందేశం అందించారు. గత నెలలో జనతా కర్ఫ్యూ తరహాలోనే మోడీ ముందుకు సాగారు. కరోనా లాక్ డౌన్ అమలవుతున్న వేళ మోడీ ఏం మాట్లాడతారోనని అంతా ఆసక్తిగా ఎదురుచూశారు. అయితే మోడీ లాక్ డౌన్ గురించి అంత సీరియస్ గా స్పందించలేదు. ఇంకా సమయం ఉందని భావించి వుంటారు. దేశవ్యాప్తంగా మోడీ సందేశం ఎంతో ఆసక్తిగా ఎదురుచూశారు. మార్చి 22న కూడా జనతా కర్ఫ్యూ విషయంలోనూ మోడీ ఆలోచన వినూత్నంగా సాగింది. జనమంతా ఒక్కటయ్యారు. ఉదయం అంతా స్వచ్ఛందంగా కర్ఫ్యూ పాటించారు. సాయంత్రం ఐదుగంటలకు బయటకు వచ్చిన చప్పట్లతో మారుమోగింది దేశం. 

లాక్ డౌన్ అమలవుతున్న వేళ సామాజిక దూరం పాటించండి. మీ కాలనీలో ఒకేచోట గుమిగూడకుండా దీపాలు వెలిగించండి. ఆ దీపాల కాంతిలో కరోనా మహమ్మారిని పారద్రోలాలి. భారతీయులంతా ఏకమయితే కరోనా తరిమికొట్టడం అసాధ్యం కాదన్నారు మోడీ. మేం ఒక్కరమే కదా ఇంట్లో వుండి ఏం సాధిస్తామని ప్రజలు అనుకుంటున్నారు. జనమంతా ఇంట్లోనే ఉంటే కరోనాను జయించినట్లేనని భావించండి.

జనతా కర్ఫ్యూ ద్వారా మన శక్తి సామర్ధ్యాలు అందరికీ చాటాం. లాక్ డౌన్ ప్రపంచం పాటిస్తోంది. ప్రపంచం మనవైపే చూస్తోంది. ఈ ఆదివారం కూడా మరోసారి మన సత్తా, మన ఐక్యత చాటుదాం. కరోనాను తిప్పికొట్టే సంకల్పం తీసుకోవాలి. ఆదివారం రాత్రి 9 గంటలకు అంతా ఏకం కావాలి. కొవ్వొత్తులు, దివ్వెలు, ప్రమిదలు వెలిగించండి. ఈ సమయం నాకివ్వండి. ఈ విపత్కర పరిస్థితుల్లో భారతీయుల శక్తిని, ఉత్సాహాన్ని ఈ సంకల్పం మరింత పెంచుతుంది. మన సంకల్పానికి మించిన శక్తి ఎక్కడా ఉండదు. కరోనాపై పోరాటం చేస్తున్న అందరికీ నా ధన్యవాదాలు అన్నారు మోడీ.