షావోమీ ఫిట్‌నెస్‌ బ్యాండ్‌లో మైక్‌ వస్తోంది!

06-10-201906-10-2019 20:09:46 IST
2019-10-06T14:39:46.296Z06-10-2019 2019-10-06T14:39:16.119Z - - 17-04-2021

యువత మస్ట్‌ గ్యాడ్జెట్ల జాబితాలో ఇప్పుడు ఫిట్‌నెస్‌ బ్యాండ్‌ కూడా వచ్చి చేరింది. ఇటీవల కాలంలో కుర్రాకారును చూస్తుంటే ఒక చేతిలో మొబైల్‌, మరో చేతికి ఫిట్‌నెస్‌ బ్యాండ్‌ కనిపిస్తోంది. అందుకే గ్యాడ్జెట్‌ కంపెనీలు ఈ వైపు ఆలోచిస్తున్నాయి. బడ్జెట్‌ బ్యాండ్ల విభాగంలో చైనాకు చెందిన షావోమీ, హానర్‌ ఈ వ్యాపారంలో ముందున్నాయని చెప్పొచ్చు.  ఇటీవల హానర్‌ నుంచి బ్యాండ్‌ 5, షావోమీ నుంచి బ్యాండ్‌ 4 వచ్చాయి. ఇప్పుడు షావోమీ బ్యాండ్‌ 5 తీసుకురావడానికి ప్రయత్నాలు మొదలుపెట్టింది. అయితే ఈ బ్యాండ్‌ గతంలో కంటే మరింత ఆసక్తికరంగా ఉండబోతోందని తెలుస్తోంది.

షావోమీ ఎంఐ బ్యాండ్‌ 4 చైనా వెర్షన్‌ లో ఉన్న కొన్ని ముఖ్యమైన ఫీచర్లు ఇతర దేశాల్లో విడుదలైన వెర్షన్‌ లో లేవు. ముఖ్యంగా ఎన్‌ఎఫ్‌సి, మైక్రోఫోన్‌ ఫీచర్లను షావోమీ చైనాకు మాత్రమే పరిమితం చేసింది.  అయితే ఎంఐ బ్యాండ్‌ 5తో ఆ ఫీచర్ల ను కూడా ఇతర దేశాల మార్కెట్‌లోకి తీసుకురావాలని చూస్తోంది.  అంతర్జాతీయ మీడియా కథనాల ప్రకారం కొత్త ఎంఐ బ్యాండ్‌లో ఈ రెండు కీలకమైన ఫీచర్లు కచ్చితంగా ఉండనున్నట్లు తెలుస్తోంది. దీంతోపాటు కొత్త బ్యాండ్‌... గత వెర్షన్లతో పోలిస్తే మరింత దృఢంగా, అధునాతన ఫీచర్లతో రాబోతోందట. 

ఎంఐ బ్యాండ్‌ 5 ఎప్పుడు విడుదలయ్యేదనే విషయంలో షావోమీ ఎలాంటి సమచారం ఇవ్వలేదు. సాధారణంగా షావోమీ ఏటా మే, జూన్‌లో కొత్త బ్యాండ్‌లు విడుదల చేస్తుంటుంది. ఆ లెక్కన బ్యాండ్‌ 5  కూడా వచ్చ ఏడాది ప్రథమార్ధం ఆఖరులో లాంచ్‌ అవ్వొచ్చు. మన దేశంలో సెప్టెంబరు - అక్టోబరు మధ్యలో అందుబాటులో రావొచ్చు. దీని ధర సుమారు ₹2500 వరకు ఉండొచ్చని టెక్‌ వర్గాలు చెబుతున్నాయి.  ఇటీవల భారత మార్కెట్‌ లోకి విడుదలైన బ్యాండ్‌ 4కు మంచి ఆదరణ లభిస్తోందని షావోమీ వర్గాలు చెబుతున్నాయి. ₹2,299 ధరతో వచ్చిన ఈ బ్యాండ్‌ తొలిసారి రంగుల స్క్రీన్‌ తో రూపొందింది. బ్యాండ్‌ 5 లో కూడా ఇలానే రంగుల స్క్రీన్‌ ఉంటుంది.