ముందొక తెర... వెనుకొక తెర.. అదిరెను కదరా..!

15-10-201915-10-2019 11:32:27 IST
2019-10-15T06:02:27.037Z15-10-2019 2019-10-15T06:02:22.254Z - - 12-04-2021

చిత్రవిచిత్రమైన మొబైల్స్ తీసుకురావడంలో నుబియా పెట్టింది పేరు. నుబియాకి వచ్చే ఆలోచనలు చాలా తక్కువ మందికి వస్తుంటాయి. అయితే ఫీచర్ల దగ్గర కొంచెంది పిసినారి తనానికి పోయి అంతగా ఆదరణ పొందలేకపోతున్నాయి. ఈ క్రమంలో నుబియా నుంచి మరో ఆసక్తికరమైన మొబైల్ అంతర్జాతీయ మార్కెట్ లోకి వచ్చింది. ‘నుబియా జెడ్ 20’ పేరుతో వచ్చిన ఈ మొబైల్ లో ముందువైపు ఒక తెర, వెనుకవైపు మరో తెర ఉంటాయి.  ఆగస్టులో చైనాలో లాంచ్ చేసిన ఈ మొబైల్ ను ఇప్పుడు ఉత్తర అమెరికా, యూరప్, ఆసియా ఖండాల్లో కి తీసుకొచ్చారు. 

నుబియా జెడ్ 20 లో ముందువైపు 6.42 అంగుళా ఆమోలెడ్ స్క్రీన్ ఉంటుంది. వెనుకవైపు కెమెరాల కింద 5.1 అంగుళాల ఆమోలెడ్ స్క్రీన్ ఉంటుంది. ఇందులో క్వాల్ కోమ్ స్నాప్ డ్రాగన్ 855 ప్లస్ ప్రాసెసర్ ఉంటుంది. వెనువైపు మూడు కెమెరాలు ఉంటాయి. 4000 ఎంఏహెచ్ బ్యాటరీతో తీసుకొస్తున్నారు. రెండు వైపులా స్క్రీన్ ఉండటం వల్ల ఇందులో పాప్ అప్ లు, నాచ్ లు ఉండవు.

సెల్ఫీ తీసుకోవాలంటే ఫోన్ వెనక్కి తిప్పితే సరి. బ్యాక్ కెమెరా ఫ్రంట్ కెమెరా అవుతుంది. ఎలాగూ అటువైపు కూడా డిస్ ప్లే ఉంటుంది. వెనుకవైపు 48 ఎంపీ ప్రధాన కెమెరా ఉంటుంది. 8 ఎంపీ టెలీ ఫొటో లెన్స్ ఉంటుంది. దీంతో 3 ఎక్స్ ఆప్టికల్ జూమ్ చేసి ఫొటోలు తీయొచ్చు. దీంతోపాటు 16 ఎంపీ అల్ట్రా వైడ్ సెన్సర్ ఉంటుంది. 

నుబియా యూఐ 7 తో ఇది పని చేస్తుంది. ఆండ్రాయిడ్ ‘పై’ ఆపరేటింగ్ సిస్టమ్ ఉంటుంది. ఈ మొబైల్ 27వాట్ ఫాస్ట్ ఛార్జింగ్ ను సపోర్టు చేస్తుంది.  అమెరికా, కెనడా, యూరప్, బ్రిటన్, ఆస్ట్రేలియా, హాంగ్ కాంగ్, ఇజ్రాయిల్, జపాన్, సింగపూర్, ఇండోనేసియా, టైవాన్, మకావ్ దేశాల్లో నుబియా కొత్త మొబైల్ లభిస్తుంది. ట్విలైట్ బ్లూ, డైమండ్ బ్లాక్ రంగుల్లో అందుబాటులో ఉంది. 8 జీబీ ర్యామ్, 128 ఇంటర్నల్ మెమొరీ వెర్షన్ ను మాత్రమే సేల్ కి తీసుకొచ్చారు. దీని ధర 549 డాలర్లు. అంటే మన ధరలో సుమారు రూ. 40 వేలు.