భారత్‌లో తొలి ఎలక్ట్రిక్‌ ట్రాక్టర్‌.. సరకు రవాణాకు సాటిలేని వాహనం

14-03-202014-03-2020 09:17:47 IST
2020-03-14T03:47:47.027Z14-03-2020 2020-03-14T03:47:39.753Z - - 17-04-2021

ఎలక్ట్రిక్ బైక్, ఎలక్ట్రిక్ కారు, ఎలక్ట్రిక్ స్టౌ.. ఇలా డీజిల్, పెట్రోల్ తదితర ఇంధనాలతో పనిలేకుండా విద్యుత్‌తో పనిచేసే వాహనాలు, ఉపకరణాలన గురించి చాలాకాలంగా వింటున్నాం. కానీ దేశచరిత్రలో మొట్టమొదటి ఎలక్ట్రిక్‌ ట్రాక్టర్‌ గురించి ఇప్పుడే వింటున్నాం. 

హైదరాబాద్‌కు చెందిన స్టార్టప్‌ సెలెస్ట్రియల్‌ ఈ–మొబిలిటీ రూపొందించింది. వినియోగానికి వీలున్న నమూనాను బుధవారమిక్కడ ఆవిష్కరించింది. ఉద్యానవనాలు, విమానాశ్రయాలు, ఫ్యాక్టరీలు, గిడ్డంగుల్లో సరుకు రవాణాకు వీలుగా 6 హెచ్‌పీ సామర్థ్యంతో తయారు చేశారు. 21 హెచ్‌పీ డీజిల్‌ ట్రాక్టరుకు సమానంగా ఇది పనిచేస్తుందని కంపెనీ సహ వ్యవస్థాపకుడు సిద్ధార్థ దురైరాజన్‌ మీడియాకు తెలిపారు. 

‘ధర రూ.5 లక్షల లోపు ఉంటుంది. ప్రభుత్వం నుంచి సబ్సిడీ కూడా అందుకోవచ్చు. డీజిల్‌ ట్రాక్టరుతో గంటకు రూ.150 ఖర్చు వస్తే, దీనికి రూ.20–35 మధ్య ఉంటుంది. ఒకసారి చార్జింగ్‌ చేస్తే 75 కిలోమీటర్లు ప్రయాణిస్తుంది. వేగం గంటకు 20 కిలోమీటర్లు. 5–8 ఏళ్లు బ్యాటరీ మన్నికగా ఉంటుంది. నెలకు 100 ట్రాక్టర్ల తయారీ సామర్థ్యంతో బాలానగర్‌లో ఫ్యాక్టరీ ఉంది. రూ.60 కోట్ల దాకా నిధులు సమీకరించనున్నాం’ అని వివరించారు.

అయితే సెలెస్టియల్ ఎలక్ట్రిక్ ట్రాక్టర్ నమూనా భారత్‌కు కొత్త కాదు. 2017లోనే ట్రాక్టర్ ఉత్పత్తి సంస్థ ఎస్కార్ట్స్ తన తొలి ఎలక్ట్రిక్ ట్రాక్టర్‌ను ప్రదర్శించింది. కానీ ఆ మోడల్ సీరీస్ ఉత్పత్తికి ఇంకా నోచుకోలేదు. ఈ నేపథ్యంలో సెలెస్టియల్ ఇ-మొబిలిటీ సంస్థ 2020 చివరినాటికి తన కొత్త ఇ-ట్రాక్టర్‌ను తీసుకురావాలని పథకం రచన చేస్తోంది. 

అన్నీ సజావుగా జరిగితే వచ్చే మూడేళ్లలో 8,000ల ఇ- ట్రాక్టర్లను తయారు చేస్తామని కంపెనీ చెబుతోంది. ఇప్పటికైతే నమూనాగా మాత్రమే ఉన్న ఇ-ట్రాక్టర్ని సరైన మార్కెట్లో లాంచ్ చేయడానికి అవసరమైన సర్టిఫికెట్ల సాధనపై కంపెనీ దృష్టి పెడుతోంది.

దేశీయ ట్రాక్టర్ల మార్కెట్లో 2019లో 8,78,999 ట్రాక్టర్లను వాహన తయారీ సంస్థలు అమ్మాయి. కాబట్టి ఈ తరుణంలో ఎలక్ట్రిక్ ట్రాక్టర్లకు మంచి డిమాండ్ ఉంటుందని మార్కెట్ వర్గాల ఆశ. జీరో ఎమిషన్ పర్యావరణ అనుకూల లక్ష్యంతో కూడిన ఇ-ట్రాక్టర్ వ్యవసాయపరంగా, పారిశ్రామిక పరంగా అన్నిరకాల అవసరాలకు ఉపయోగపడతుందని సెలెస్ట్రియల్‌ ఈ–మొబిలిటీ ధీమాగా చెబుతోంది.