బెంబేలెత్తిస్తున్న వాట్సాప్ ‘గోల్డ్ మెసేజ్’

16-01-201916-01-2019 18:11:48 IST
2019-01-16T12:41:48.943Z16-01-2019 2019-01-16T12:41:45.543Z - - 11-04-2021

ఒక బ్రాండ్‌కి మంచి ఆదరణ వచ్చిందంటే చాలు... ఆ వెంటనే నకిలీల బెడద మొదలైపోతుంది. దానికొచ్చిన క్రేజ్‌ని ఎన్‌క్యాష్ చేసుకోవడం కోసం... నకిలీ వ్యాపారం మొదలుపెట్టేస్తారు. ‘వాట్సాప్’ విషయంలోనూ ఇదే జరిగింది. ఈ ఇన్‌స్టంట్ మెసేజింగ్ యాప్‌కు వరల్డ్‌వైడ్‌గా విపరీతమైన క్రేజ్ ఉండడంతో... దానిలాగే మరెన్నో నకిలీ యాప్స్ పుట్టుకొచ్చేశాయి. వాట్సాప్‌కి మించి సౌకర్యాలు ఉంటాయంటూ మార్కెట్‌లో హల్‌చల్ చేస్తున్నాయి. అయితే... ఈ నకిలీ యాప్స్ మాటున హ్యాకర్లు దోపిడీలకు పాల్పడుతున్నారు. ‘వాట్సాప్’కి కొత్త అప్‌డేట్ వచ్చిందంటూ మెసేజ్‌లు పంపిస్తూ... వాటి ద్వారా మాల్‌వేర్‌ను ఫోన్‌లో జొప్పించేందుకు ప్రయత్నిస్తున్నారు.

అలాంటిదే ‘వాట్సాప్ గోల్డ్’ పేరుతో ఒక మెసేజ్ ఇప్పుడు ఇంటర్నెట్‌లో సర్క్యులేట్ అవుతోంది. ఈ మెసేజ్‌ని క్లిక్ చేసి ‘వాట్సాప్’ని అప్‌డేట్ చేసుకోమని, ఫలితంగా ఎన్నో అధునాతన సౌకర్యాలు పొందవచ్చని అందులో ఉంది. ‘వాట్సాప్’ గోల్డ్ కలర్‌లోకి మారుతుందని, ఒకేసారి 100 ఫోటోలు పంపుకునే వీలుంటుందని ఆ మెసేజ్‌లో ఉంది. ఇది చూసి టెంప్ట్ అయి దాన్ని క్లిక్ చేస్తే మాత్రం... హ్యాకర్ల చేతిలో అడ్డంగా బుక్ అవుతారని McAfee India వైస్ ప్రెసిడెంట్ ఆఫ్ ఇంజినీరింగ్ వెంకట్ కృష్ణాపూర్ హెచ్చరిస్తున్నారు. ఈ వాట్సాప్ గోల్డ్ మెసేజ్ ఒక పెద్ద స్కాం అని, ఆ మెసేజ్‌ని ఎట్టి పరిస్థితుల్లోనూ ఓపెన్ చేయొద్దని ఆయన సూచిస్తున్నారు. మన దేశంలో 20 కోట్లకుపైగా వాట్సాప్ వినియోగదారులున్నారని, ఇప్పటికే ఈ ఫేక్ మెసేజ్ చాలామందికి చేరినట్లు తాము గుర్తించామని, దీని ప్రభావం ఎక్కువగా ఉండే ఛాన్స్ ఉందని, కాబట్టి అది వచ్చినప్పుడు అప్రమత్తంగా ఉండాలని ఆయన వెల్లడించారు.

నిజానికి... ఈ వాట్సాప్ గోల్డ్ మెసేజ్ 2016లోనే వెలుగులోకి వచ్చింది. అప్పుడు ఇది సృష్టించిన రచ్చ అంతాఇంతా కాదు. వాట్సాప్ సంస్థ అధికారికంగా వెల్లడించిందేమోనని చాలామంది దాన్ని క్లిక్ చేసి... హ్యాకర్ల బారిన పడ్డారు. ఆ సమస్యను పరిష్కరించేందుకు నానాతంటాలు పడ్డారు. దాన్ని ఎలాగోలా కనిపెట్టి, నివారణ చర్యలు తీసుకున్నారు. ఇప్పుడు మళ్ళీ ఇది సర్క్యులేట్ అవుతుండడంతో... జాగ్రత్తగా ఉండాలని నిపుణులు సూచిస్తున్నారు.