ఫాస్టాగ్‌ గురించి మీకు తెలుసా.. ఇదిగో ఆసక్తికర విషయాలు

24-11-201924-11-2019 11:52:34 IST
2019-11-24T06:22:34.838Z24-11-2019 2019-11-24T04:30:47.835Z - - 22-04-2021

టోల్‌గేట్‌ చెల్లింపు ఝంఝాటాలు లేకుండా చాలా రోజుల క్రితమే కేంద్ర ప్రభుత్వం ఫాస్టాగ్‌ వ్యవస్థను తీసుకొచ్చింది. చాలా రోజులుగా దీని గురించి వార్తలు వస్తూనే ఉన్నాయి. తాజాగా డిసెంబర్‌ 1 నుంచి వాహనాలకు ఫాస్టాగ్‌ తప్పనిసరి చేస్తూ కేంద్రం నిర్ణయం తీసుకుంది. అసలు ఫాస్టాగ్‌ అంటే ఏమిటి? దీనిని ఎలా వాడాలి? వీటిని ఎక్కడ నుంచి కొనుగోలు చేయొచ్చు? ఈ వివరాలు మీ కోసం!

జాతీయ రహదారుల మీద వాహనాల్లో ప్రయాణం చేసేవాళ్లు టోల్‌గేట్‌ వచ్చిందంటే భయపడే రోజులూ ఉన్నాయి. పెద్ద పెద్ద క్యూలు దాటుకొని వెళ్లి టోల్‌ పేమెంట్‌ చేసి వెళ్లాలి. ఈ ఇబ్బందులు లేకుండా నేషనల్‌ పేమెంట్స్‌ కార్పొరేషన్‌ ఆఫ్‌ ఇండియా (ఎన్‌పీసీఐ) ... నేషనల్‌ ఎలక్ట్రానిక్‌ టోల్‌ కలెక్షన్‌ (ఎన్‌ఈటీసీ) అనే కార్యక్రమానికి శ్రీకారం చుట్టింది. ఈ కార్యక్రమంలో భాగంగా 2014లో ఫాస్టాగ్‌ను పైలట్‌ ప్రాజెక్టుగా తీసుకొచ్చారు.

ఇక్కడ దొరుకుతాయి:

బ్యాంకుల నుంచి ఫాస్టాగ్‌ను సులభంగా పొందొచ్చు. దీని కోసం ప్రభుత్వం ఇప్పటికే 23 బ్యాంకులతో ఒప్పందం చేసుకుంది. ఎస్‌బీఐ, ఐసీఐసీఐ, హెచ్‌డీఎఫ్‌సీ, యాక్సిస్‌ వంటి బ్యాంకుల నుంచి వీటిని కొనుగోలు చేయొచ్చు. వాహనం ముందు భాగంలో అద్దంపై ఫాస్టాగ్‌ను అతికించాలి. ఆ తర్వాత ఫాస్టాగ్‌ అతికించిన వాహనం టోల్‌ ప్లాజా దాటి వెళ్లినప్పుడు రేడియో ఫ్రీక్వెన్సీ ఐడెంటిఫికేషన్‌ (ఆర్‌ఎఫ్‌ఐడీ) టెక్నాలజీ ద్వారా చెల్లింపులు జరుగుతాయి. టోల్‌ ఫీజ్‌ డబ్బులు ఫాస్టాగ్‌కు లింక్‌ చేసిన బ్యాంకు ఖాతా నుంచి డెబిట్‌ అవుతాయి.

మరోవైపు అమెజాన్‌తో కూడా నేషనల్‌ హైవే అథారిటీ ఆఫ్‌ ఇండియా (ఎన్‌హెచ్‌ఏఐ) ఒప్పందం కుదుర్చుకుంది. దీంతోపాటు పేటీఎంలోనూ ఫాస్టాగ్‌ లభిస్తోంది. ఫాస్టాగ్‌ను వాడటానికి ముందుగా దానిని మీ బ్యాంకు ఖాతాతో జత చేయాలి. దీని కోసం ‘My FASTag’ అనే యాప్‌ను మీ మొబైల్‌లో ఇన్‌స్టాల్‌ చేసుకోవాలి. అక్కడ మీ వాహన రిజిస్ట్రేషన్‌ నెంబరు ఎంటర్‌ చేసి అడిగిన వివరాలతో లాగిన్‌ ప్రక్రియ పూర్తి చేయాలి. దీంతోపాటు ఈ యాప్‌ను ఉపయోగించి యూపీఐ పేమెంట్స్‌ విధానం ద్వారా ఫాస్టాగ్‌ను రీఛార్జి చేసుకోవచ్చు.

డీఫాల్ట్‌గా ఇస్తారు...

ఒక వాహనానికి తీసుకున్న పాస్టాగ్‌ను వేరే వాహనానికి ఉపయోగించకూడదు. ఫాస్టాగ్‌ వినియోగాన్ని ప్రోత్సహించడానికి ప్రభుత్వం క్యాష్‌బ్యాక్‌ ఇస్తోంది. ఈ ఆర్థిక సంవత్సరమంతా 2.5 శాతం చొప్పున ప్రభుత్వం క్యాష్‌బ్యాక్‌ ఇవ్వనుంది. ఫాస్టాగ్‌ ఉన్న వాహనం టోల్‌ప్లాజా గుండా వెళ్లినప్పుడు ట్యాగ్‌ ఐడీతో పాటు, బండి వివరాలు ఈటీసీ వ్యవస్థ ద్వారా సంబంధిత బ్యాంకుకు వెళ్తాయి. ఆ వివరాలను నేషనల్‌ ఎలక్ట్రానిక్‌ టోల్‌ కలెక్షన్‌ (ఎన్‌ఈటీసీ)తో సరిపోల్చి అంతా సవ్యంగా ఉంటే నిర్దేశించిన రుసుము మొత్తం బ్యాంకు ఎన్‌ఈటీసీకి చేరుతుంది. కొత్తగా తయారయ్యే వాహనాలకు డీఫాల్ట్‌గా ఫాస్టాగ్‌ను ఇస్తారు.