పది వేల అప్లికేషన్లు తొలగించిన ఫేస్‌బుక్‌..

24-09-201924-09-2019 09:26:37 IST
2019-09-24T03:56:37.796Z24-09-2019 2019-09-24T03:56:36.031Z - - 12-04-2021

కేంబ్రిడ్జ్‌ అనలిటికా ఇష్యూ తర్వాత ఫేస్‌బుక్‌ వాడేవాళ్లలో చిన్న భయం మొదలైంది. వ్యక్తిగత సమాచారాన్ని ఫేస్‌బుక్‌ నుంచి కేంబ్రిడ్జ్‌ అనలిటికా దారిమళ్లిస్తోందని ఆరోపణలు వచ్చాయి. దీనిపై విచారణ కూడా జరిగింది. సుదీర్ఘ విచారణల తర్వాత విషయం నిజమే అని తేలింది. దీంతో ఫేస్‌బుక్‌ రక్షణ చర్యలు ప్రారంభించింది. ఫేస్‌బుక్‌లో మీ సమాచారం భద్రం అని స్పష్టం చేసింది. అయినప్పటికీ యూజర్లలో డేటా భయం ఉంది. అందుకే ఫేస్‌బుక్‌ వ్యక్తిగత సమాచారానికి మరింత రక్షణ కల్పించింది. తాజాగా పది వేల అప్లికేషన్లను తొలగించింది.

ఫేస్‌బుక్‌లో వ్యక్తిగత సమాచారం లీక్‌ అవుతోందంటూ గత ఏడాది మార్చిలో వివాదం రేగింది. ఫేస్‌బుక్‌తో కలసి పని చేస్తున్న కేంబ్రిడ్జ్‌ అనలిటికా కారణంగా ఈ వివాదం రేగిన విషయం తెలిసిందే. ఈ క్రమంలో దర్యాప్తు చేపట్టిన ఫేస్‌బుక్‌ కీలక చర్యలకు ఉపక్రమించింది. ఇందులో భాగంగా 400 మంది డెవలపర్లకు చెందిన యాప్స్‌ను తొలగిస్తూ ఫేస్‌బుక్‌ నిర్ణయం తీసుకుంది. ‘‘వినియోగదారుల అంతర్గత భద్రతకు ఈ యాప్స్‌ అంతగా ప్రమాదకరం కానప్పటికీ... చాలావరకు ఆ యాప్‌లు పరీక్షల దశలో ఉన్నాయి. దీంతోపాటు ఆ యాప్‌లు వినియోగదారులకు పూర్తిగా అందుబాటులోకి రాలేదు. అందుకే వాటిని ఫేస్‌బుక్‌ నుంచి తొలగిస్తున్నాం’’ ఫేస్‌బుక్‌ సంస్థ బ్లాగులో రాసుకొచ్చింది. 

‘‘సంస్థ విధివిధానాలకు విరుద్ధంగా  ఫేస్‌బుక్‌ నుంచి వినియోగదారుల వ్యక్తిగత వివరాలను సేకరించి వాటిని  బహిర్గతం చేస్తున్న కొన్ని యాప్స్‌ని పూర్తిగా తొలగించాం. ఇంతటితో మా దర్యాప్తు పూర్తికాలేదు. ఈ చర్యల్లో భాగంగా యాప్‌ డెవలపర్స్‌కి వినియోగదారులకు సంబంధించిన వ్యక్తిగత వివరాలు తెలుసుకునే అవకాశం ఉన్న అప్లికేషన్‌ ప్రోగ్రామ్‌ ఇంటర్‌ఫేస్‌ (ఏపీఐ)లను తొలగించాం’’ అని ఫేస్‌బుక్‌ తన బ్లాగ్‌లో పేర్కొంది. 

ఇకపై వినియోగదారుల వివరాలను సేకరించే అప్లికేషన్లు... ఏ విధంగా తమ యాప్‌నకు ఉపయోగకరమనేది తెలిజేయాల్సి ఉంటుందని ఫేస్‌బుక్‌ తెలిపింది. ఈ సంవత్సరం మొదట్లో కేంబ్రిడ్జ్‌ అనలిటికా కేసులో ఫెడరల్‌ ట్రేడ్‌ కమిషన్‌ (ఎఫ్‌టిసి) ఫేస్‌బుక్‌కు ఐదు బిలియన్‌ డాలర్ల జరిమానా విధించింది. వీటితో పాటు కంపెని వ్యాపార నిర్వహణపై కూడా ఆంక్షలు విధించింది.