‘టిక్‌ టాక్‌ యాప్‌’‌కు షాక్... కేంద్రం కీలక నిర్ణయం

16-04-201916-04-2019 16:19:35 IST
Updated On 16-04-2019 16:19:34 ISTUpdated On 16-04-20192019-04-16T10:49:35.781Z16-04-2019 2019-04-16T10:49:03.387Z - 2019-04-16T10:49:34.125Z - 16-04-2019

దేశవ్యాప్తంగా యువతను ఆకట్టుకుంటున్న టిక్ టాక్ యాప్ పట్ల కేంద్రం తీవ్రంగా స్పందించింది. డైలాగ్స్, ఎమోషన్స్, సాంగ్స్ ఇలా అన్ని ఉన్న ఈ యాప్ యువతను విపరీతంగా ఆకర్షిస్తోంది. ఈ యాప్‌ అనతి కాలంలోనే ఎంతో ఆదరణ పొందింది. దీని వల్ల పిల్లల్లో పెడధోరణులు పెరిగిపోతున్నాయని దేశవ్యాప్తంగా నిరసనలు వెల్లువెత్తుతున్నాయి. టిక్‌ టాక్‌ యాప్‌ను ప్లేస్టోర్ల నుంచి తొలగించాలని కేంద్ర ఎలక్ట్రానిక్స్‌ అండ్‌ ఇన్ఫర్మేషన్‌ టెక్నాలజీ మంత్రిత్వ శాఖ గూగుల్‌, యాపిల్‌ సంస్థలను ఆదేశించింది.

చైనాకు చెందిన ఈ వీడియో షేరింగ్‌ యాప్‌పై సర్వత్రా అభ్యంతరం వ్యక్తం అవుతోంది.  దీంతో దీన్ని నిషేధించేలా ఆదేశాలు జారీ చేయాలంటూ మదురైకి చెందిన సీనియర్‌ న్యాయవాది, సామాజిక కార్యకర్త ముత్తు కుమార్‌ మద్రాసు హైకోర్టులో ప్రజాప్రయోజన వ్యాజ్యం దాఖలు చేశారు. దీనిపై విచారణ చేపట్టిన న్యాయస్థానం టిక్‌టాక్‌పై నిషేధం విధించాలని కేంద్రాన్ని ఇంతకుముందే ఆదేశించింది. 

ఈ యాప్‌ ద్వారా రూపొందించిన వీడియోలను ప్రసారం చేయకూడదని మీడియాకు సూచించింది. చిన్న పిల్లలు సైబర్‌ నేరగాళ్ల బారిన పడకుండా తీసుకోవాల్సిన చర్యలపై ఏప్రిల్‌ 16లోగా స్పందన తెలియజేయాలని కేంద్ర ప్రభుత్వానికి ఆదేశాలు జారీ చేసింది. కోర్టు తీర్పు మేరకు చర్యలకు ఉపక్రమించిన ప్రభుత్వం తాజా ఆదేశాలను జారీ చేసింది. ఇదిలా ఉంటే.. మద్రాసు హైకోర్టు తీర్పుపై స్టే విధించాలని టిక్‌ టాక్‌ సంస్థ.. సుప్రీం కోర్టును ఆశ్రయించింది. పిటిషనర్ తరుపున సీనియర్ లాయర్ అభిషేక్ మను సింఘ్వీ వాదనలు వినిపించారు. భావ ప్రకటన స్వేచ్చను ఉల్లంఘిస్తున్నాయంటూ సింఘ్వీ పిటిషనర్ తరపున వాదించారు.

దీనిపై విచారణ చేపట్టిన కోర్టు స్టే ఇవ్వడానికి నిరాకరించింది. దీనిపై తదుపరి విచారణను ఏప్రిల్‌ 22న జరుపుతామని తెలిపింది. థర్డ్‌ పార్టీ అప్‌లోడ్‌ చేసే వీడియోలకు తమల్ని బాధ్యులను చేయడం ఎంతవరకూ సమంజసమని టిక్‌టాక్‌ ప్రశ్నించింది.కొద్ది రోజుల ముందే టిక్ టాక్‌లో అభ్యంతరకర వీడియోలు ఉన్నాయంటూ ఫిర్యాదు అందడంతో 6 మిలియన్ వీడియోలను తొలగించింది టిక్ టాక్. ఇందులో ఖాతాదార్లుగా 90 మిలియన్ యూజర్లు ఉన్నారని సమాచారం. ఇప్పటికే యూఎస్, యూకే, హాంకాంగ్, ఇండోనేషియా దేశాల్లో ఈ యాప్‌లపై పూర్తిగా నిషేధం ఉంది.