మెట్టుపాళ్యంలో కూలిన భవనం.. 15 మంది దుర్మరణం

02-12-201902-12-2019 12:09:33 IST
2019-12-02T06:39:33.421Z02-12-2019 2019-12-02T06:39:31.774Z - - 30-05-2020

భారీవర్షాలు తమిళనాడు వాసులను కంటిమీద కునుకులేకుండా చేస్తున్నాయి. కోయంబత్తూరు మెట్టుపాళ్యంలో ఘోర ప్రమాదం సంభవించింది. భారీ వర్షాల కారణంగా నాలుగు భవనాలు కూలిపోయాయి. ఈ దుర్ఘటనలో కనీసం 15 మంది మృతి చెందినట్టు అధికారులు అంచనా వేస్తున్నారు. ప్రమాద సమయంలో వారంతా నిద్రలో ఉండడంతో అక్కడికక్కడే ప్రాణాలు కోల్పోయారు. శిథిలాల కింద మరికొందరు ఉన్నట్లు అధికారులు చెబుతున్నారు. 

స్థానికులు, అగ్నిమాపక సిబ్బంది సహాయక చర్యల్లో నిమగ్నమయ్యారు. ఈ ప్రమాదంలో ఎంతమంది చనిపోయారనేది ఇంకా అధికారిక సమాచారం లేదు. రెండురోజుల నుంచి తమిళనాడులోని పలు ప్రాంతాల్లో ఎడతెరిపి లేకుండా వర్షాలు కురుస్తున్నాయి.

దీంతో పలు జిల్లాలు జలదిగ్బంధంలో చిక్కుకున్నాయి. రాకపోకలకు తీవ్ర అంతరాయం కలుగుతోంది. ఇది చాలదన్నట్టు ప్రస్తుతం కురుస్తున్న భారీ వర్షాలు మరో రెండు రోజులు పాటు కొనసాగే అవకాశం ఉందని చెన్నైలోని వాతావరణ పరిశోధన కేంద్రం ప్రకటించడంతో అధికారులు అలర్ట్ అయ్యారు.

భారీ వర్షాల దృష్ట్యా పుదుచ్చేరితో పాటు ఐదు జిల్లాల్లోని విద్యాసంస్థలకు ఆయా జిల్లాల కలెక్టర్లు సోమవారం సెలవు ప్రకటించారు. రాష్ట్రంలోని పలు జిల్లాల్లో కొన్ని రోజులుగా వర్షాలు కురుస్తున్నాయి. చెన్నై, కాంచీపురం, కడలూరు, మదురై, కోయంబత్తూరు తదితర ప్రాంతాల్లో శనివారం సాయంత్రం నుంచి వర్షం కురుస్తోంది. ఆదివారం కూడా కొనసాగింది.

జనం బయటకు రావడానికి కూడా అవకాశం లేకపోవడంతో నిత్యావసరాలకు ఇబ్బంది ఏర్పడుతోంది. ఈ నెల 15నుంచి మరోసారి వర్ష సూచన ఉందని చెన్నైలోని వాతావరణ కేంద్రం తెలిపింది. ఈ నేపథ్యంలో మత్స్యకారులెవరూ వేటకు వెళ్లొద్దని అధికారులు హెచ్చరికలు జారీ చేశారు.