రాంచీ ముద్దుబిడ్డ... ధనా ధన్ ధోనీకి హ్యాపీ బర్త్ డే..

07-07-202007-07-2020 07:49:45 IST
Updated On 07-07-2020 07:50:08 ISTUpdated On 07-07-20202020-07-07T02:19:45.778Z07-07-2020 2020-07-07T02:19:25.210Z - 2020-07-07T02:20:08.210Z - 07-07-2020

క్రికెట్ ప్రపంచంలో కెప్టెన్ గా మూడు ఐసీసీ టౌర్నమెంట్స్ గెలిచిన ఒకే ఒక్కడు అతడే మహీంద్రా సింగ్ ధోనీ. టీం ఇండియాలో బాధ్యత ఏదైనా అందులో తన మార్క్ చూపిస్తాడు. 1981 జులై 7 జన్మించిన ధోని 39 వ యేటలోకి అడుగు పెడుతున్నాడు. మహేంద్రసింగ్ ధోనీ.. ఎక్కడో రాంచీలోని ఓ మారుమూల ప్రాంతం నుంచి వచ్చి క్రికెట్ ప్రపంచాన్ని ఓ ఊపుఊపిన పేరిది. దశాబ్దన్నర క్రితం పవర్ హిట్టర్లు అంటే.. వెస్టిండీస్, ఆస్ట్రేలియా క్రికెటర్లనే ఎక్కువగా చూపించేవారు. కానీ.. విదేశీ క్రికెటర్లకి ఏమాత్రం తీసిపోని విధంగా బంతిని భారతీయులు కూడా బలంగా బాదగలరని ధోనీ నిరూపించాడు.

కెరీర్‌ ఆరంభంలో జులపాల జట్టుతో ప్రత్యేక ఆకర్షణగా కనిపించిన ధోనీ భారీ సిక్సర్లు బాదుతుంటే..? పాకిస్థాన్ ప్రధాని సైతం ఫిదా అయిపోయి ప్రశంసలు కురిపించాడు. 2004 నుంచి టీమిండియాలో వికెట్ కీపర్, ఫినిషర్, కెప్టెన్, బౌలర్లకి సూచనలు, కెప్టెన్‌కి సలహాలివ్వడం.. ఇలా బాధ్యత ఏదైనా..? ధోనీ మార్క్ తప్పనిసరి. అందుకే ధోనీ అనేది కేవలం పేరు కాదు.. అది ఒక బ్రాండ్ గా మారిపోయింది.

డిసెంబరు 23, 2004లో బంగ్లాదేశ్‌తో జరిగిన మ్యాచ్‌తో భారత్ జట్టులోకి అరంగేట్రం చేసిన ధోని తొలి మ్యాచ్‌లోనే డకౌటయ్యాడు. కానీ.. ఆ తర్వాత పాకిస్థాన్‌పై మెరుపు శతకంతో వెలుగులోకి వచ్చిన ఈ పవర్ హిట్టర్.. ఏ దశలోనూ వెనుదిరిగి చూసుకోవాల్సిన అవసరం లేకపోయింది. క్రికెట్ ప్రపంచంలోనే ధోనీ తరహాలో మ్యాచ్‌ని ఆఖరి ఓవర్లలో ఎవరూ ఫినిష్ చేయలేదు.. చేయలేరని క్రికెట్ దిగ్గజాలు సైతం అంగీకరించిన వాస్తవం. అంతలా మ్యాచ్‌ల్ని ముగించడంలో ధోనీ తన మార్క్ చూపించాడు.

కెప్టెన్‌గా బాధ్యతలు చేపట్టిన తర్వాత 2007లో భారత్‌కి టీ20 ప్రపంచకప్ అందించిన ధోని.. 28 ఏళ్ల సుదీర్ఘ విరామం తర్వాత మళ్లీ 2011లో వన్డే ప్రపంచకప్‌ని టీమిండియా గెలవడంలో క్రియాశీలక పాత్ర పోషించాడు. ఆ తర్వాత ఛాంపియన్స్ ట్రోఫీలోనూ భారత్‌ని విజేతగా నిలిపి.. క్రికెట్ ప్రపంచంలోనే మూడు ఐసీసీ టోర్నమెంట్‌లు గెలిచిన ఏకైక కెప్టెన్‌గా రికార్డుల్లో ఇప్పటికీ కొనసాగుతున్నాడు.

వికెట్ కీపర్‌గా ధోనీకి కెరీర్ ఆరంభం నుంచి తిరుగులేదు. క్షణాల వ్యవధిలో బెయిల్స్‌ను గీరాటేసే ధోనీ.. ప్రత్యర్థి బ్యాట్స్‌మెన్ కదలికలకి అనుగుణంగా బౌలర్లకి సూచనలు ఇవ్వగల జ్ఞాని. కెప్టెన్సీ బాధ్యతల నుంచి తప్పుకున్నా.. ఇప్పటికే మైదానంలో ధోనీనే అనధికార కెప్టెన్. బౌండరీ లైన్ దగ్గర కోహ్లీ ఫీల్డింగ్ చేస్తుంటే..? ఫీల్డింగ్ కూర్పులు, బౌలింగ్‌ మార్పుల్ని ధోనీనే స్వయంగా పర్యవేక్షింస్తుంటాడు. అందుకే టీమ్‌లో ధోనీ ఉండటం కోహ్లీకి అదనపు బలమని మాజీ క్రికెటర్లు తరచూ చెప్తుంటారు.

క్రికెట్‌లో ఇన్ని ఘనతలు సాధించినా.. ధోనీకీ విమర్శల బాధ తప్పలేదు. గత ఏడాది పేలవ ప్రదర్శన కారణంగా కనీసం ప్రపంచకప్ జట్టులో కూడా చోటు దక్కదంటూ కొంత మంది మాజీ క్రికెటర్లు వెటకారంగా మాట్లాడారు. కానీ.. విమర్శలకి నోటితో కాకుండా బ్యాట్‌తో బదులివ్వడం ధోనీకి అలవాటే. 2019లో ఆస్ట్రేలియాపై వన్డేల్లో హ్యాట్రిక్ అర్ధశతకాలతో మళ్లీ ఫామ్ అందుకున్న ధోనీ.. ఆ తర్వాత కూడా జోరు కొనసాగించాడు. ప్రపంచకప్‌లో మునుపటిలా అతను దూకుడుగా ఆడలేకపోయినా.. ఇప్పటికీ జట్టులో ధోనీని మించిన ఫినిషర్ లేరు.

సుదీర్ఘ క్రికెట్ కెరీర్‌లో 90 టెస్టులాడిన ధోని.. 349 వన్డేలు, 98 టీ20లు ఆడాడు. 300పైచిలుకు వన్డేలాడినా.. ఇప్పటికీ అతని సగటు 50.58గా నిలకడకి నిదర్శనం. మొత్తంగా.. టీమ్‌కి తాను అవసరం లేదు అనుకుంటే.. రిటైర్మెంట్ ప్రకటించడానికి క్షణం కూడా ధోనీ ఆలోచించడని ఇటీవల ఓ మాజీ క్రికెటర్ చెప్పుకొచ్చాడు. నిజమే.. టెస్టులకి రిటైర్మెంట్.. వన్డే, టీ20ల కెప్టెన్సీ నుంచి తప్పుకోవడం తదితర నిర్ణయాలు ఈకోవకే చెందుతాయి.